وحدت نیوز(ٹنڈو محمد خان) مجلس وحدت مسلمین کیجانب بعد نمازی جمعہ امریکی صدر ڈونلڈ ٹرمپ کی وطن عزیز پاکستان کیخلاف ہرزاسرائی اور سازشوں کیخلاف احتجاجی مظاہرہ کیا گیا۔احتجاجی مظاہرے سے خطاب کرتے ہوۓ مجلس وحدت مسلمین کے ضلعی رہنما مولانا محمد بخش غدیری،مولانا امیر حسین رحمانی،محمد اشرف خاصخیلی اور محب بھٹو نے خطاب کرتے ہوئے کہا کہ وطن عزیز پاکستان کی ڈونلڈ ٹرمپ کیجانب سے ہرزاسرائی کی سخت لفظوں میں مذمت کرتے ہیں اور انکا مزید کہنا تھا کہ امریکا ایک عالمی دہشتگرد ملک ہے جو کہ مختلف حربوں سے عالم اسلام پر اپنی بادشاہت قائم کرنا چاہتا ہے امریکی صدر ڈونلڈ ٹرمپ کیجانب سے پاکستان  کو دھمکیوں کے بعد سویلین حکومت کی خاموشی قابل مذمت ہے۔امریکا ناقابل اعتماد اور سازشی ملک ہے۔ہم چیف آف آرمی کی امریکا کو دو ٹوک جواب کی حمایت کرتے ہیں۔اور اس جنگ میں پاک فوج کے شانہ بشانہ کھڑے ہیں۔امریکا عالمی امن کا دشمن ہے۔ہم پاکستانی قوم متحد ہیں امریکا اور اور ڈونلڈٹرمپ کو انکے ناپاک عزائم میں ہرگزکامیاب ہونے نہیں دینگے۔

وحدت نیوز(پاراچنار) امریکی صدر ڈونلڈ ٹرمپ کی جانب سے پاکستان پر دہشت گردوں کی مدد کے الزامات کے خلاف پاراچنار پریس کلب کے سامنے مجلس وحدت مسلمین نے احتجاجی مظاہرہ کیا، جس میں مظاہرین نے پلے کارڈ اور بینرز اٹھا رکھے تھے, جن پر امریکہ کے خلاف نعرے درج تھے۔ مظاہرین نے پریس کلب کے باہر امریکہ کے خلاف شدید نعرے بازی بھی کی۔ اس موقع پر شفیق طوری سیکریٹری وحدت یوتھ کے پی کے،مجلس علما کے صدر مولانا باقر حیدری اور تحریک حسینی کے صدر مولانا یوسف حسین  نے  اپنے خطاب میں کہاکہ داعش، طالبان اور القاعدہ جیسی دہشت گرد تنظیموں کا خالق ملک امریکہ، پاکستان پر الزامات عائد کر رہا ہے, جو افسوسناک ہے۔ ان کا کہنا تھا کہ پاکستان کی عوام اور فورسز نے بڑی بہادری سے دہشت گردی کا مقابلہ کرکے شدت پسندوں کی کمر توڑ دی ہے، امریکی الزامات سے امن کو فروغ نہیں ملے گا بلکہ دہشت گردوں کی حوصلہ افزائی ہوگی۔ مقررین  نے مطالبہ کیا کہ امریکی صدر اپنا متنازعہ پالیسی بیان فی الفور واپس لیں۔

وحدت نیوز(کوئٹہ) سربراہ مجلس وحدت مسلمین پاکستان علامہ راجہ ناصر عباس جعفری کے فرمان پر مردہ باد امریکہ کےموقع پر  کوئٹہ کے مومنین نے نماز جمعہ کے بعدبھرپور احتجاج کیا، جامع مسجد کلاں کے باہر احتجاج کے دوران خطاب کرتے ہوئے امام جمعہ کوئٹہ ورکن شوریٰ عالی مجلس وحدت مسلمین پاکستان علامہ سید ہاشم موسوی نے کہا جس دن امریکہ پاکستان کو اپنے اتحادی ممالک سے نکال دے گا اس دن ہم پاکستانیوں کیلئے عید ہوگی اور پاکستان تعمیر و ترقی کی راہوں کو طے کرےگا۔ امریکہ کی دوستی کسی بھی ملک کیلئے بہت خطرناک ہے۔ احتجاج میں پاکستان زندہ باد، امریکہ، اسرائیل، انڈیا مردہ باد کے نعرے لگائے گئے۔ رضا ربانی اور جنرل قمر باجوہ زندہ باد کے نعرے بھی لگاََئے گئے۔

وحدت نیوز(کراچی) ناصرِ ملت علامہ راجہ ناصر عباس جعفری کی جانب سے 25 اگست بروز جمعہ یومِ مردہ امریکہ منائے جانے کی اپیل پر مجلس وحدت مسلمین ضلع وسطی کی جانب سے آج بعد نماز جمعہ مسجدِ نورِ ایمان ناظم آباد پر احتجاجی مظاہرہ کیا گیا، مظاہرے سے مجلس وحدت مسلمین کراچی ڈویژن کے رہنماء علامہ سید اظہر حسین نقوی اور امامِ جمعہ مسجدِ نورِ ایمان علامہ مرزا زاہد حسین نے خطاب کیا، اس موقع پر مجلس وحدت مسلمین ضلع وسطی کے سیکریٹری جنرل ثمر زیدی اور ضلعی کابینہ کے اراکین اور کارکنان سمیت مومنین کی کثیر تعداد موجود تھی۔

وحدت نیوز(مظفرآباد/میرپور/ باغ/ ہٹیاں بالا) علامہ راجہ ناصر عباس کے حکم پر ریاست گیر امریکہ مخالف احتجاجی مظاہرے، مجلس وحدت مسلمین آزاد کشمیر نے دیگر ملی تنظیمات کے ہمراہ مظاہروں کا انعقاد کیا۔خطباء نے جمعہ کے خطبوں میں امریکی ہرزہ سرائی کی شدید الفاظ میں مذمت کی۔ ریاست کی فضا مردہ باد امریکہ کے نعروں سے گونج اٹھی۔ تفصیلات کے مطابق مجلس وحدت مسلمین پاکستان کے سربراہ علامہ راجہ ناصر عباس جعفری کی اپیل پر ریاست گیر یوم احتجاج، امریکہ مردہ باد کے نعروں سے ریاست کی فضا گونج اٹھی ، مرکزی احتجاجی ریلی کا انعقاد دارالحکومت مظفرآباد میں کیا گیا ، ریلی مرکزی مسجد و امام بارگاہ پیر سید علم شاہ بخاری سے نکالی گئی ، ریلی کی قیادت سینئر ممبر اسلامی نظریاتی کونسل آزاد کشمیر علامہ مفتی سید کفایت حسین نقوی ،ڈپٹی سیکرٹری جنرل مجلس وحدت مسلمین آزاد جموں و کشمیر مولانا سید طالب حسین ہمدانی، سینئروائس چیئرمین جعفریہ سپریم کونسل آزاد کشمیرعلامہ سید فرید عباس نقوی، صدر مرکزی انجمن جعفریہ مظفرآباد ڈی ایس پی (ر) سید نذیر حسین نقوی و دیگر نے کی ، ریلی سی ایم ایچ چوک پہنچ کر احتجاجی جلسے کی شکل اختیار کر گئی ۔ علامہ مفتی سید کفایت حسین نقوی نے خطاب کرتے ہوئے کہا کہ امریکہ بھارتی ایما پر یہ سب کچھ کر رہا ہے، امریکی بیان ناقابل برداشت عمل ہے، ہم امریکہ کو بتا دینا چاہتے ہیں ہمیں تمہاری ضرورت نہیں ۔ دہشتگردی کی اس جنگ میں جتنی قربانیاں ہم نے دیں ہیں تاریخ گواہ ہے اتنی کسی اور ملک نہیں ۔ یہ پاکستانی افواج اور قوم کی قربانیاں ہیں کہ ہم نے دہشتگردوں کو عملاً شکست دی۔ہم راجہ ناصر عباس کو سلام پیش کرتے ہیں کہ انہوں نے قوم کی بہترین ترجمانی میں یوم مردہ باد امریکہ کا اعلان کیا۔

 مظاہرے سے خطاب کرتے ہوئے ڈپٹی سیکرٹری جنرل مجلس وحدت مسلمین آزاد کشمیر مولانا سید طالب حسین ہمدانی نے کہا کہ پاکستان کے خلاف ہرزہ سرائی ، صلاح الدین اور حزب المجاہدین پر پابندی امریکہ نوازوں کے منہ پر طمانچہ ہے، امریکہ کی آؤ بھگت کرنے والے، اسے سر پر بٹھانے والے آج منہ چھپاتے پھر رہے ہیں ، ہم کل بھی امریکہ مردہ باد کہتے تھے آج بھی امریکہ مردہ باد کہتے ہیں ، اور انشاء وہ وقت دور نہیں جب دنیا تسلیم کرے گی کہ واقعاً امریکہ مردہ باد ہے، پاکستان میں پاک فوج کے بعد سب سے بڑا قدم علامہ راجہ ناصر عباس جعفری نے اٹھایا ، یوم مردہ باد امریکہ کی کال دیکر ہمارے قائد نے امریکی صدر کو منہ توڑ جواب دیا ہے، لیکن دوسری طرف ہماری سیاسی قیادت نے اس بار بھی بہت دیر کر دی۔ ہونا تو یہ چاہیے تھا کہ وزیراعظم شاہد خاقان عباسی فوری طور پر امریکی صدر کو جواب دیتے ، وزیر خارجہ و وزیر دفاع بیان دیتے مگر یہ سعودی یاترا کو چلتے بنے۔ ہماری وفاقی حکومت سفارتی طور پر بھی نااہل ہو چکی ہے، وزیر خارجہ ایک نا تجربہ کار شخص ہے، خواجہ آصف کسی طور پر بھی وزارت کے اہل نہیں۔

 انہوں نے کہا کہ جب سے تحریک آزادی کشمیر کو امریکہ دبانے کی کوشش کر رہا ہے تب سے ہم نے اسے اپنا دشمن کہا ، ٹرمپ کے جارحانہ عزائم سے ہم پہلے سے واقف تھے، امریکی صدر کو دعوتوں پر بلانے والے مقبوضہ کشمیر کے لیے کیوں کوئی اتحاد تشکیل نہیں دیتے ، کیوں امریکہ نوازی اپنے لیے فخر سمجھتے ہیں ، انہوں نے کہا کہ ہم مطالبہ کرتے ہیں کہ عرب ممالک باقی سارے کام چھوڑتے ہوئے کشمیر و فلسطین کے لیے اتحاد کا اعلان کریں ۔ کشمیری و پاکستان قوم کو صف اول کا سپاہی دیکھیں گے ، مگر امریکی خوشنودی کے لیے بننے والے اتحاد اپنی موت آپ مر جائیں گے ۔ہمارے میدان میں رہنے سے دہشت گرد اور امریکہ کے ایجنٹ خائف ہیں ، آئی ایس پی آر کی پریس کانفرنس اس بات کی واضح دلیل ہے کہ مکتب تشیع مظلوم ہے ، ہم ظالم کے مخالف اور مظلوم کے حامی اور خود بھی مظلوم ہیں ،آزاد کشمیر میں ہونے والی دہشتگردی کا تدارک کیا جانا بھی ضروری ہے ، ہم یہ سمجھتے ہیں کہ علامہ تصور حسین نقوی الجوادی پر حملہ تکفیری امریکی ایجنٹوں کی کارستانی ہے، پہلے انتظامیہ کی بات کرتے تھے اب کہتے ہیں کہ حکومت اپنی اہلیت کھو چکی ، علامہ تصور نقوی پر حملہ کرنے والوں گرفتاری کے ہم عید تک کا وقت دیتے ہیں ، ورنہ ہم تاریخ ساز احتجاج ریکارڈ کروائیں گے۔علامہ فرید عباس نقوی نے اپنے خطاب میں کہا کہ ہم کربلائی ہیں ، ہمارا درس کربلا سے ہے، ہم سپر پاور صرف اللہ کو مانتے ہیں ، امریکہ ہمارے مقابلے کچھ نہیں ہے۔  مظاہرے سے علامہ ممتاز حسین الحسینی اور ڈی ایس پی (ر) سید نذیر حسین نقوی نے بھی خطاب کیا۔

دوسرا بڑا احتجاجی مظاہرہ کچھا سیداں امام بارگاہ کے باہر سرینگر روڈ پر ہوا۔ مظاہرے کی قیادت سیکرٹری ویلفیئر مجلس وحدت مسلمین آزاد کشمیر سید عاطف حسین ہمدانی نے کی۔ انہوں نے بھی امریکہ کی شدید الفاظ میں مذمت کی۔ نمب سید اں ضلع باغ میں احتجاجی مظاہرے سے سیکرٹری تر بیت مجلس وحدت مسلمین آزاد کشمیر مولانا سید افتخار الحسن گردیزی نے خطاب کیا۔ جبکہ میرپور میں خطیب جامع مسجد و امام بارگاہ بیت الحزن علامہ سید تنویر حسین شیرازی او رسیکرٹری جنرل مجلس وحدت مسلمین ضلع میرپور سید ناظر عباس کاظمی نے مظاہرے کی قیادت کی اور شرکائے احتجاج سے خطاب کیا۔

وحدت نیوز(لاہور) مجلس وحدت مسلمین کے زیراہتمام سربراہ مجلس وحدت مسلمین علامہ راجہ ناصر عباس جعفری کی اپیل پر امریکہ کی جانب سے پاکستان کیخلاف ہرزہ سرائی اور سویلین حکمرانوں کی مجرمانہ خاموشی کیخلاف ملک بھر میں "یوم مردہ باد امریکہ" منایا گیا۔ چاروں صوبوں، آزاد کشمیر اور گلگت بلتستان کے مختلف اضلاع میں احتجاجی مظاہرے و ریلیاں نکالی گئیں۔ نماز جمعہ کے اجتماعات میں امریکی صدر کی ہرزہ سرائی کی بھرپور مذمت کرتے ہوئے اس دھمکی کو پاکستانی عوام کی توہین قرار دیا گیا۔ لاہور پریس کلب کے سامنے احتجاجی مظاہرہ کیا گیا۔ مظاہرے میں مرد، خواتین اور بچوں کی بڑی تعداد اور جماعت الدعوۃ کی سیاسی جماعت "ملی مسلم لیگ" کے رہنماؤں نے بھی شرکت کی۔ شرکاء امریکہ مردہ باد اور امریکہ کا جو یار ہے وہ قوم کا غدار ہے کے نعرے لگاتے اپنے غم و غصے کا اظہار کرتے رہے۔ شدید گرمی کے باوجود بڑی تعداد میں شہریوں نے احتجاج میں شرکت کی۔ احتجاجی مظاہرے کی قیادت مرکزی سیکرٹری سیاسیات سید اسد عباس نقوی، سیکرٹری جنرل پنجاب علامہ مبارک موسوی اور سیکرٹری جنرل لاہور علامہ سید حسن ہمدانی نے کی۔

مظاہرین سے خطاب کرتے ہوئے مجلس وحدت مسلمین کے مرکزی سیکرٹری سیاسیات و رکن شوریٰ عالی سید اسد عباس نقوی نے کہا کہ ہم ڈونلڈ ٹرمپ کی جانب سے پاکستان کیخلاف ہرزہ سرائی کی شدید مذمت کرتے ہیں، پوری دنیا اس بات سے واقف ہے کہ امریکہ اور اس کے اتحادی استعماری طاقتوں کو دنیا بھر میں بدترین شکست کا سامنا ہے، ہم امریکہ کو ہرگز یہ اجازت نہیں دینگے کہ وہ اپنی شکست کا ملبہ پاکستان پر ڈالے، امریکی صدر کی ہرزہ سرائی پر ہمارے نااہل حکمرانوں کی مجرمانہ خاموشی قابل مذمت ہے اور پوری قوم کیلئے لمحہ فکریہ بھی ہے۔ انہوں نے کہا کہ سوائے چیف آف آرمی سٹاف کے کسی بھی ملکی ذمہ دار شخص نے امریکہ کو جواب نہیں دیا، کرپٹ حکمران کبھی بھی ملکی سلامتی اور قومی وقار کا دفاع نہیں کر سکتے، امریکہ اب سپر پاور نہیں رہا، شام، عراق، افغانستان میں اس کا غرور خاک میں مل چکا ہے، امریکہ اپنی ابدی موت مرنے کو ہے، ہم ٹرمپ کی ہرزہ سرائی کو پاکستانی عوام کی توہین سمجھتے ہیں، پاکستان کے حکمران امریکہ کے سامنے ڈٹ جائیں، امریکی صدر نے پاکستان کے غیور عوام کی توہین کی ہے، اس کا ازالہ یہ ہے کہ امریکن سفیر اور اس کے عملے کو ملک بدر کیا جائے، امریکی ویت نام، لبنان اور عراق میں اپنے حشر کو یاد رکھیں۔

علامہ مبارک موسوی نے کہا کہ امریکی سن لیں، ہم نے شام، عراق، ایران، افغانستان، لبنان میں تمھیں شکست دی اور تمھارا غرور خاک میں ملایا، اب اگر پاکستان کی طرف کسی بھی جارحیت کی کوشش کی تو ہم پاکستان کی سرزمین امریکیوں کیلئے قبرستان بنا دینگے، پاکستان کے بزدل حکمران امریکی کاسہ لیسی چھوڑ کر قومی غیرت و حمیت کا دفاع کریں، قوم کا بچہ بچہ مادر وطن کی دفاع کیلئے سربکف تیار ہے، ہم امریکہ اور انڈیا کی اس سازش سے بخوبی آگاہ ہیں، پاکستان میں معاشی ترقی کو دیکھ کر انڈیا اور امریکہ پاگل پن کا شکار ہے، امریکہ اور انڈیا شام اور عراق سے داعش کو لے کر افغانستان منتقل کر رہا ہے، حکمران ہوش کے ناخن لیں اور ان ناسوروں کے مقابلے کے لئے تیار رہیں۔

احتجاجی مظاہرے سے ضلع لاہور کے سیکرٹری جنرل علامہ حسن ہمدانی نے بھی خطاب کیا۔ انہوں نے کہا امریکہ کو ہم یاد دلاتے ہیں کہ ہم خیبر شکن کے ماننے والے ہیں، سرزمین پاک کی طرف ہم کسی کو میلی آنکھ سے دیکھنے کی اجازت نہیں دینگے، امریکہ اور اس حواری دنیا بھر میں رسوا ہو چکے ہیں اور ان شاءاللہ سرزمین پاک سے بھی ہم امریکہ کے ناپاک وجود کا خاتمہ کرکے دم لیں گے، دنیا بھر میں انسانیت کے سب سے بڑے دشمن امریکہ اسرائیل، انڈیا اور ان کے حواری ہیں، جو بے گناہ انسانوں کے خون سے ہولی کھیل رہے ہیں، پاکستانی حکمرانوں پر لعنت ہے جو امریکہ کی دھمکی کا جواب نہیں دے سکے، وقت آگیا ہے کہ ہم امریکن بلاک کو خیر باد کہہ دیں، مظاہرین نے امریکی پرچم اور ڈونلڈ ٹرمپ کی تصویریں بھی نذر آتش کی۔ اس موقع پر فضا مردہ باد امریکہ کے نعروں سے گونجتی رہی۔