وحدت نیوز (اسلام آباد) مجلس وحدت مسلمین پاکستان کے مرکزی ڈپٹی سیکریٹری امور خارجہ،چیئرمین المصطفیٰ فائونڈیشن نارتھ امریکہ اور ولایت ٹی وی علامہ سید ظہیر الحسن نقوی کے والد گرامی طویل علالت کے بعد کمالیہ میں انتقال کرگئے، مرحوم سید محمد اسلم شاہ نقوی کی رحلت پر مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری سمیت دیگر مرکزی قائدین بشمول علامہ حسن ظفر نقوی، علامہ امین شہیدی، علامہ احمد اقبال رضوی،علامہ شفقت حسین شیرازی، علامہ باقر زیدی، علامہ اعجاز بہشتی،علامہ اصغر عسکری، علامہ ہاشم موسوی، علامہ مختار امامی، ناصر شیرازی، مہدی عابدی، علی احمر زیدی، نثار فیضی، ملک اقرار حسین ، علامہ عبدالخالق اسدی، علامہ مبارک موسوی، علامہ آغا علی رضوی، علامہ مقصودڈومکی، علامہ اقبال بہشتی،علامہ تصور جوادی، آغا محمد رضا اور دیگر نے مرکزی سیکریٹریٹ سے جاری اپنے مشترکہ تعزیتی بیان میں علامہ سید ظہیر الحسن نقوی اور ان کے اہل خانہ سے انکے والد مرحوم سید محمداسلم شاہ نقوی کی دلسوز رحلت پر رنج وغم اور افسوس کا اظہارکیا ہے ، رہنماوں نے کہا کہ اس عظیم سانحے پر مجلس وحدت مسلمین کے تمام ذمہ داران اور کارکنان غم زدہ ہیں ، خدا وند متعال مرحوم کے تمام گناہان کبیرہ و صغیرہ کو معاف فرمائے اورانہیں جوار معصومین ؑ میں محشور فرمائے ساتھ ہی پسماندگان کو صبر جمیل عنایت فرمائے ۔

وحدت نیوز(سرگودھا) مجلس وحدت مسلمین کی مرکزی پولیٹیکل کونسل کے کوآرڈینیٹر آصف رضاایڈووکیٹ نے گذشتہ روز سرگودھا میںاین اے 68سرگودھاسےمنتخب سابق رکن قومی اسمبلی سید نصرت علی شاہ سے ان کی رہائش گاہ پر ملاقات کی اور دنوں شخصیات کے درمیان قومی وبین الاقوامی صورت حال سمیت دو طرفہ دلچسپی کے امور پر تبادلہ خیال کیا گیا، آصف رضا نے سید نصرت علی شاہ کو مجلس وحدت مسلمین میں باقائدہ شمولیت کی دعوت دی اور کہاکہ ہماری خواہش ہے کہ آپ مجلس وحدت مسلمین کے پلیٹ فارم سے سیاسی جدوجہد اور عوامی خدمت جاری رکھیں ،اس موقع سید نصرت علی شاہ کا کہنا تھاکہ میں ذاتی طور پر ایم ڈبلیوایم کی جدوجہد سے بہت متاثر ہوں،شیعہ سنی یونٹی کے لئے ایم ڈبلیوایم کی کاوشیں قابل تحسین ہیں میں ہر سطح پر ایم ڈبلیوایم کے ساتھ تعاون کیلئے تیار ہوں فل وقت باقائدہ شمولیت سے قاصر ہوں انشاءاللہ جلد کوئی فیصلہ کرکے آپ کو آگاہ کروں گا۔

واضح رہے کہ سید نصرت علی شاہ ماضی میں قومی اسمبلی کی نشست حلقہ این اے 68سرگودھا سے آزاد حیثیت سے منتخب ہوئے تھے،جبکہ گذشتہ انتخابات میں انہوں نے اسی حلقے میں وزیر اعظم میاں محمد نواز شریف کے مقابل الیکشن لڑاتھا جس میں تیسری پوزیشن حاصل کی تھی،نصرت علی شاہ علاقے میں سماجی وسیاسی حوالے سے منفرد مقام رکھتے ہیں اور اچھی شہرت کے حامل فرد ہیں سب سے بڑھ کر مجلس وحدت مسلمین کی کارکردگی سے انتہائی متاثر ہیں ۔

وحدت نیوز (سکردو) مجلس وحدت مسلمین پاکستان گلگت بلتستان کے سیکرٹری جنرل آغا علی رضوی نے اپنے بیان میں کہا کہ عدالتی نظام کی خامیوں نے کئی بے گناہوں کو اب تک بہیمانہ عدالتی قتل کی نوبت تک پہنچائی ہے۔ ہم شہید نوید حسین کے بہیمانہ عدالتی قتل کی بھرپور مذمت کرتے ہیں۔ ہم مطالبہ کرتے ہیں کہ انکے جیل میں ہوتے ہوئے الزام عائد کرنیوالوں اور جیل انتظامیہ کے خلاف کارروائی عمل میں لاکر اصل مجرموں کو سزا دلائیں۔

 انہوں نے کہا کہ قابل غور بات ہے کہ پہلے سے جیل میں قید ایک ملزم کو ایک جج کے قتل کا مرتکب ٹھہرایا گیا اور اسی الزام کو لیکر اپیل کا حق بھی دیئے بغیر تختہ دار پر چڑھایا گیا۔ کیا جی بی کے عوام کو حق نہیں کہ جو حکمران انکی مرضی کے بغیر منتخب ہوتے ہیں، ان سے اپیل بھی کرے۔ کیا وفاقی حکومت گلگت بلتستان کو اپنی نو آبادیاتی سمجھتی ہے، کہ وہ جب چاہے، جیسا چاہے، اپنے خودساختہ قوانین کو یہاں نافذ کر دے۔ ہم سوال کرتے ہیں کہ اڈیالہ جیل کے حکام نے شہید نوید حسین سے اپیل کا حق کیوں چھینا۔ کیا وہ کسی اور دنیا کے باسی تھے۔ وزیراعظم اور صدر ان بہیمانہ اقدامات پر تماشائی کب تک رہیں گے اور سپریم کورٹ آف پاکستان جو ایک تھپڑ پر سوموٹو لیتی تھی، اس عدالتی بربریت پر کیوں چپ کا روزہ رکھا ہوا ہے۔

وحدت نیوز (لاہور) حکومت دہشتگردی کیخلاف جنگ کو منطقی انجام تک پہنچانے کے لئے دہشتگردوں کے سیاسی سرپرستوں اور سہولت کاروں کیخلاف کاروائی کرے،فوجی عدالتوں میں من پسند مقدمات کو بھیج کر دہشتگردی کے سب سے زیادہ متاثرہ فریق ملت جعفریہ کو حکمرانوں نے مایوس کیا،ہمارے چوبیس ہزار سے زائد شہداء کے لواحقین اب بھی انصاف کے منتظر ہیں،ان خیالات کا اظہار مجلس وحدت مسلمین پنجاب کے ڈپٹی سیکرٹری ڈاکٹر افتخار حسین نقوی نے سانحہ کوئٹہ کی برسی کے موقع پر تعزیتی اجلاس سے خطاب میں کیا انہوں نے کہا کہ سانحہ کوئٹہ،سانحہ شکار پور،سمیت ملک بھر میں جاری شیعہ ٹارگٹ کلنگ کے مقدمات کو فوجی عدالتوں کے سپرد کرکے لواحقین کو فوری انصاف دلایا جائے،دہشتگردی کیخلاف جنگ میں سب سے زیادہ قربانی دینے والی قوم ملت جعفریہ کو بیلنس پالیسی کے تحت ہراساں کرنے کا عمل بند کیا جائے،ہمیں فخر ہے کہ ہم نے ہمیشہ اس ملک کے لئے اپنی جانوں کا نذرانہ دیا ،ہمارے شہداء نے اپنا خون دے کر ملکی سلامتی پر وار کرنے والوں کا راستہ روکا، آج ستم ظریفی یہ ہے کہ ظالم اور مظلوم کو ایک ہی لاٹھی سے ہانکنے کا عمل جاری ہے،ہمیں کسی سے حب الوطنی کی سرٹیفیکٹ کی ضرورت نہیں،پاکستان کو ہمارے آباو اجداد نے جانی و مالی قربانیاں دے کر حاصل کی ہے ،اور اس کی نظریاتی و جغرافیائی سرحدوں کی حفاظت کو ہم اپنے ایمان کا حصہ سمجھتے ہیں۔

وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصرعباس جعفری نے لاپتہ سماجی کارکنوں اور دیگر افرادکی تاحال عدم بازیابی پر سخت تشویش کا اظہار کرتے ہوئے کہا ہے کہ سپریم کورٹ اس لاقانونیت کا از خود نوٹس لے۔ریاست کے ہر شہری کی جان و مال کاتحفظ ریاست کی اولین ذمہ داری ہے۔اگر کوئی شخص قومی مفاد کے منافی کسی غیر قانونی سرگرمی میں ملوث ہو تو اس کے خلاف طے شدہ ضابطے کے مطابق کاروائی ہونی چاہیے۔اس ملک میں جنگل کا قانون نافذ نہ کیا جائے۔سپریم کورٹ متعلقہ انتظامیہ کو عدالت میں طلب کریں لاپتہ افراد کا سراغ چند دنوں میں مل جائے گا۔

انہوں نے وزیر داخلہ کی طرف سے کالعدم جماعت کے سربراہ کو تمام الزامات سے بری الذمہ قرار دیے جانے کو نیشنل ایکشن پلان کی توہین قرار دیتے ہوئے کہا کہ فقہی اختلافات اور چیز ہے اور اس اختلاف کی بنیاد پرکسی فرقہ پر تکفیر کا فتوی دینا الگ شے ہے۔وزیر داخلہ جس شخصیت کی وکالت کر رہے ہیں اس کے زیر قیادت اجتماعات میں نیشنل ایکشن پلان کی سرعام دھجیاں اڑائی جاتی ہے۔کافر کافر کے سرعام نعرے لگائے جاتے ہیں اور ان کے باقاعدہ عسکری ونگز ہونے کے باعث اس جماعت پر پابندی لگائی گئی۔حکومتی وزرا کی اس آشیرباد نے ان ملک دشمن عناصر کے حوصلے بلند کر رکھے ہیں۔انہوں نے کہا کہ وطن عزیز کو کسی بھی صورت تکفیری سٹیٹ نہیں بننے دیا جائے گاوزیر داخلہ چوہدری نثار علی خان کے واضح احکامات کے باوجود متعلقہ اداروں کا پیش و پس اس حقیقت کا بین ثبوت ہے کہ حکومتی وزرا کے احکامات اسٹیبلشمنٹ کے لیے کوئی معنی نہیں رکھتے۔

انہوں نے کہا کہ نیشنل ایکشن پلان پر اس کی روح کے مطابق عمل کرتے ہوئے دہشت گردوں اور سہولت کاروں کے گرد گھیرا تنگ کیا جائے۔نیپ کے نام پر غریب کرایہ داروں کے خلاف ایف آئی آریں کاٹی جا رہی ہیں جبکہ تکفیری فکر کا سرعام پرچار کرنے والوں کو کھلی چھوٹ حاصل ہے۔انہوں نے کہا ذمہ دار ادروں کا یہ غیر سنجیدہ پن قانون و انصاف کی راہ میں سب سے بڑی رکاوٹ ہے۔انہوں نے مطالبہ کیا ہے نیشنل ایکشن پلان کے تمام نکات پر عمل کرایا جائے تاکہ ملک میں امن قائم ہو سکے۔

وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا ہے کہ ملکی ترقی کے حکومتی دعوے محض اخباری بیانات اور جلسوں تک ہی محدود دکھائی دے رہے ہیں۔سرکاری اداروں کا کوئی پُرسان حال ہیں۔ صحت،توانائی اور تعلیم سمیت بنیادی ضروریات کے تمام شعبے عوام کو سہولیات کی بجائے مشکلات سے دوچار کرنے میں مگن ہیں۔ملک کے بیشتر حصوں میں سوئی گیس کی عدم فراہمی ،طبی سہولتوں کے فقدان اور تعلیمی اداروں کی حالت زار نے عام عادمی کی زندگی اجیرن کر رکھی ہے۔انہوں نے کہا کہ پُر تعیش سفری سہولیات کا نام ترقی نہیں بلکہ عام آدمی کے معمولات زندگی کو بہتر بنایا جائے۔جہاں عوام بھوک اور بے روزگاری سے تنگ آکر خودکشیاں کرنے لگے۔مائیں بچوں کو زہر دے کر خود بھی ابدی نیند سو جائیں۔جہاں عصمت دری کی شکار خواتین کو انصاف نہ ملنے پر خودکشی کرنا پڑے۔جہاں دودھ کے نام پر مُردوں کو حنوط کرنے والے کیمیکل سے تیار شدہ محلول فروخت ہوتا ہو ۔جہاں عوام کو حلال کی بجائے حرام جانوروں کا گوشت فروخت کیا جائے وہاں ترقی کے بلند و بانگ دعوے عوام کا تمسخر اڑانے کے مترادف ہے۔انہوں نے کہا کہ آئے روز لوگ لاپتا ہو رہے ہیں۔تحقیقاتی ادارے سمجھنے سے قاصر ہیں کہ اس کاروائی میں خفیہ ایجنسیاں ملوث ہیں یا کوئی دوسرا گروہ ایسے غیر قانونی عمل سے عوام میں بے چینی پیدا کر رہا ہے۔ملک کے حالات سے ایسا لگتا ہے جیسے یہاں قانون وانصاف کی بجائے اختیارات کی حکمرانی ہے۔

انہوں نے کہا کرپٹ حکمران کا واحد ہدف اقتدار کو بچانا ہے۔انہیں ملک کی عوام سے کوئی غرض نہیں۔سیاسی اشرافیہ نے ’’لوٹو اور لوٹنے دو کی پالیسی ‘‘ کو شعار بنا رکھا ہے۔اہم قومی اداروں کے قلمدان نااہل افراد کو محض اس لیے سونپے جا رہے ہیں تاکہ میڈیا میں حکومت کا بھرپور دفاع ہو سکے ۔انہوں نے کہا کہ حکومت کو اگر’’ ذاتی کاموں‘‘ سے فرصت ملے تو قومی امور پر بھی توجہ دے۔ سکولوں اور ہسپتالوں کی حالت کو بہتر بنایا جائے۔ پڑھے لکھے بے روزگار افراد کو باوقار روزگار فراہم کرنابھی ریاست کی ہی ذمہ داری ہے