مجلس وحدت مسلمین پاکستان نے ملک بھر میں صوبے ،ضلع اور یونٹ کی سطح پر استقبال ماہ صیام کی روح پرور تقاریب کا انعقاد کیا ۔ جس میں رمضان المبارک کی برکتوں، دنیا وی و اخروی فوائد کے ساتھ ساتھ فلسفہ صیام پر مقررین نے خطابات کیے۔ مجلس وحدت مسلمین شعبہ خواتین ضلع راولپنڈی اسلام آبادکے زیر اہتمام ایک روح پرور تقریب کا انعقاد ایم ڈبلیو ایم کے مرکزی آفس اسلام آباد میں ہوا۔ جس میں ضلعی سیکرٹری جنرل راولپنڈی اسلام آباد سیدہ ام رباب زیدی، پرنسپل جامعہ الزھراء نصرت فاطمہ سمیت ضلع بھر کی یونٹ سیکرٹری اور کابینہ کی اراکین نے شرکت کی۔ تقریب میں کلیدی خطاب کے لئے مجلس وحدت مسلمین پاکستان کے مرکزی ڈپٹی سیکرٹری جنرل علامہ محمد امین شہیدی اور مولانا عابد بہشتی کو خصوصی طور پر مدعو کیا گیا تھا۔ تقریب کا آغاز تلاوت کلام پاک سے ہوا جس کی سعادت خواہر خدیجہ کاظمی نے حاصل کی۔ جس کے بعد تقریب سے خطابات کا سلسلہ شروع ہوا ۔ جامعہ الزھراء کی پرنسپل نصرت جعفری نے روزے کی اقسام اور افادیت پر روشنی ڈالتے ہوئے اپنے خطاب کا آغاز امیر کائنات حضرت علی ابن ابی طالب علیہ السلام کے پر مغز فرمان وحی ترجمان سے کیا جس میں زیب ممبر صاحب سلونی روزے کے بارے میں ارشاد فرماتے ہیں ''دل کا روزہ زبان کے روزے سے بہتر ہے۔ زبان کا روزہ شکم کے روزے سے بہترے ہے اور سب سے بہترین روزہ قلب کا روزہ ہے''۔ نصرت جعفری کاکہنا تھا کہ رمضان اسمائے حسنہ میں سے ہے لہٰذا یہ نہیںکہنا چاہیے کہ رمضان آ گیا بلکہ ماہ رمضان کہتے ہوئے اس کا استقبال کرنا چاہیے۔رمضان المبارک گناہوںکو جلانے اور مٹانے ولا مہینہ ہے۔ اس مہینے میں ہم خدا وند کریم کے مہمان بننے جا رہے ہوتے ہیں۔ روزہ داروںکی اقسام بیان کرتے ہوئے ان کا کہنا تھا کہ کچھ لوگ صرف شکم کا روزہ رکھتے ہیں،کچھ عذاب کے ڈر سے تو کچھ لوگوں کے ڈر۔ پست ترین افراد وہ ہیں جو صرف بطن کا روزہ رکھیں۔ جن کے لئے روزہ بس شکم پری سے احتراز کا نام ہے۔ سیدہ ام رباب زیدی نے اپنے خطاب میں ایم ڈبلیو ایم شعبہ خواتین کی طرف سے ماہ صیام میں تربیتی و روحانی محافل اور شب بیداریوں کے انعقاد کی ضرورت پر زور دیتے ہوئے کہا کہ معاشرے میں عورت کی تربیت ایک زی روح کی تربیت نہیں بلکہ معاشرے کو روح پرور بنانے میں نہایت اہمیت کی حامل ہے۔ کیونکہ انسان کی پہلی تربیت گاہ گود مادر ہوتی ہے۔ انہوں نے اس عزم اور امید کا اظہار کیا کہ ایم ڈبلیو ایم کی خواتین سیرت سیدہ الزھراء سلام اللہ علیھا اور سیرت حضرت زینب سلام اللہ علیھا کو دیگر خواتین میں عام کرنے کے لئے اپنی شرعی ذمہ داری کو پورا کرنے کے لئے بھرپور کوششیں کریں گی۔ سیدہ ساجدہ فاطمہ کاظمی نے فضائل و فلسفہ ماہ صیام پر روشنی ڈالتے ہوئے کہاکہ روزہ ایک ایسی عبادت ہے جو انسان کو بیک وقت مختلف الجہتی فوائد سے مستفید کرتا ہے۔ یہ جہاں انسان کے اندر روحانی و معنوی فضائل پیدا کرتا ہے وہاںروحانی و جسمانی بیماریوں سے نجات کا باعث بھی ہے۔روزہ انسان کے اندر الٰہی صفات پیدا کرتا ہے ،ایسی صفات جو ہمیں صرف آئمہ طاہرین علیھم السلام کی ذات پاک یا اقوال میں نظر آتی ہیں۔ انہوں نے کہا کہ روزہ ہمیں تحمل و برداشت کا درس بھی دیتا ہے لہٰذا ہمیں چاہیے کہ اپنے آپ کو سیرت اہل بیت علیھم السلام سے آراستہ کریں۔اس موقع پر مولانا عابد بہشتی سیرت اولیاء اللہ پر روشنی ڈالتے ہوئے کہاکہ نے اپنے خطاب میں کہا کہ آئمہ معصومین علیھم السلام ، اولیائے کرام اور بزرگ علمائے کرام سب روزے کی نذر مانا کرتے تھے۔ آپ کو اتقیاء کی زندگیوںمیں روزہ زیادہ نظر آئے گا۔ انہوں نے لبنان کی حزب اللہ کے سربراہ سید حسن نصراللہ اورمجاہدین کی مثال دیتے ہوئے کہا کہ صہیونی ریاست اسرائیل سے 35 روزہ جنگ کے دوران حزب اللہ کے تمام مجاہد روزے سے تھے اور اس جنگ میں فتح کے بعد سید حسن نصراللہ پورا ایک سال روزے سے رہے۔ انہوں نے کہا کہ روزہ قبولیت دعا کا باعث اور مصائب و مشکلات سے نجات کا ضامن ہے اس لیے جب بھی مشکل وقت یا پریشانی آئے تو عام دنوں میں بھی روزے کی منت مانی جائے۔ مجلس وحدت مسلمین پاکستان کے مرکزی ڈپٹی سیکرٹری جنرل علامہ محمد امین شہیدی نے اس تقریب میں خصوصی خطاب کیا جس میں انہوں نے ماہ رمضان کے فضائل، افادیت اور اس مبارک مہینے میں دعا و اذکار پر سیر حاصل گفتگو کی۔ علامہ امین شہیدی کا کہنا تھا کہ روزہ انسان کو گناہ سے بچاتے ہوئے خدا اوربندے کے درمیان مضبوط اورپرخلوص رشتے کو مزید مستحکم کرنے کا سبب بنتا ہے۔ روزہ خواہشات نفسانی کی مخالفت کادوسرانام ہے۔ ماہ صیام ماہ توبہ ہے اس مہینے میں رحمتوں کے دروازے خد اپنی مخلوق پر کھول دیتا ہے اور اپنے غضب و غصے کو کم کر دیتا ہے۔ ماہ صیام ہمیں خدا کی رحمتوں اور برکتوں کی طرف دعوت دینے آیا ہے۔ لہٰذا ہمیں چاہیے کہ خدا کے حضور توبہ و رجوع کے ذریعے سے،اعمال صالحہ کے ذریعے سے ، اہل بیت علیھم السلام اور بالخصوص اپنے زمانے کے امام حضرت ولی العصر علیہ السلام (عجل اللہ فرجہ الشریف)کو وسیلہ بنا کر اپنے گناہوںکی مغفرت اور اپنے مومنین بھائیوں اور بہنوں کے لئے خدا کی رحمت و کرم کے لئے دعا کریں۔ اپنی نمازوں کو خضوع و خشوع کے زیور سے آراستہ کریں، نماز شب کو اس مہینے میں باقاعدگی سے ادا کریں، تعقیبات نماز کثرت مگر خلوص سے ادا کریں۔ تلاوت قرآن پاک، دعائے کمیل، دعائے جوشن کبیر، دعائے سلامتی و ظہور امام عصر علیہ السلام، زیارت وارثہ، استغفار اور درود پاک کا وردکثرت سے کریں۔ دعا ہے خدا وند کریم بحق آئمہ معصومین علیھم السلام ہم ماہ صیام کی رحمتوں، برکتوں سے مستفید ہونے کی توفیق عطا فرمائے۔ تقریب کے اختتام پر خواہر نصرت زیدی سیکرٹری جنرل یونٹ آئی ٹین ٹو نے امسال یکم جولائی کو مینار پاکستان لاہور میں ہونے والی کامیاب قرآن و سنت کانفرنس کے انعقاد پر مبارکباد پیش کی اور تمام خواہران کی طرف سے پھولوںکا گلدستہ پیش کیا۔

شامی عوام اور حکومت کے دشمن شامی فوج کو کمزور بنانا چاہتے ہیں۔شام کا مسئلہ آج ایک اہم مسئلہ ہے۔ مغربی ممالک کے لئے بشار اسد مشکل ساز ہے ۔وہ نہیں چاہتے کہ اسرائیل دشمن بشارلااسد شام میں بر سر اقتدار رہے۔اسد اسلامی مقاومت کا حامی اور اسرائیل کادشمن ہے اور اس کو ہٹانے کی اصل وجہ یہی ہے کہ وہ شام میں ایک ایسے شخص کو اقتدار میں لانا چاہتے ہیں جو اسرائیل کا حامی اور مقاومت کا مخالف ہو۔ان خیالات کا اظہار حزب اللہ لبنان کے سربراہ سید حسن نصر اللہ نے شام کے دارالحکومت دمشق میں ہونے والے بم دھماکوں کی شدید مذمت کرتے ہوئے کہا ہے۔ان کا کہنا تھا کہ شام فلسطینیوں اور لبنانیوں کی پشت پناہی کرتا ہے اور اسلامی مقاومت کی تکیہ گاہ ہے۔ انھوں نے کہا کہ ہم نے اسرائیل کی مسلط کردہ 33 روزہ جنگ زیادہ تر ہتھیار شام سے لئے تھے اگر اس وقت امریکہ اور مغربی ممالک اسرائیل کے ساتھ تھے تو شام حزب اللہ کے ساتھ تھا۔انھوں نے کہا کہ امریکہ صرف اسرائیل کو بچانے کے لئے شام کی فوج کو کمزور کرنے کی کوشش کررہا ہے اور بعض سازش کار عرب امریکہ اور اسرائیل سے تعاون کررہے ہیں۔ انھوں نے اس امید کا اظہار کیا کہ  شامی عوام اور حکومت کامیاب ہوں گے جبکہ دشمنوں کے ہاتھ کچھ نہیں آئے گا۔