وحدت نیوز(کراچی) مجلس وحدت مسلمین نے ملک کی اعلیٰ ترین عدلیہ، الیکشن کمیشن اور حکومت سے مطالبہ کیا ہے کہ زیادہ سے زیادہ ٹرن آؤٹ کے لئے بلدیاتی انتخابات ماہ ربیع الثانی میں منعقد کرائے جائیں۔ کراچی پریس کلب میں پریس کانفرنس سے خطاب کرتے ہوئے مجلس وحدت پاکستان صوبہ سندھ کے ڈپٹی سیکریٹری جنرل علامہ سید صادق رضا تقوی، ڈپٹی سیکریٹری جنرل کراچی علامہ دیدار جلبانی، سیکریٹری سیاسیات کراچی علی حسین کا کہنا تھا کہ ہم بلدیاتی انتخابات کے جلد انتخابات کے مخالف نہیں لیکن مسئلہ یہ ہے کہ ملک بھر میں محبان اہل بیت علیہم السلام عزاداری میں مصروف ہیں،یہ غم کے ایام ہیں، محرم اور صفر میں عزاداران حسینی عزاداری شہدائے کربلا کو ہر دوسرے کام پر ترجیح دیتے ہیں گو کہ ملک میں پانچ کروڑ آبادی شیعہ مسلمانوں پر مشتمل ہے لیکن عزاداری سید الشہداء ایک ایسا مذہبی فریضہ ہے کہ جس میں سنی مسلمانوں کی کثیر تعداد بھی شریک ہوتی ہے۔ لہذا ہم یہ سمجھتے ہیں کہ محرم اور صفر میں بلدیاتی انتخابات کی صورت میں مملکت خداداد پاکستان کی غالب اکثریت اس جمہوری عمل میں شرکت نہیں کرپائے گی۔

مجلس وحدت مسلمین کے رہنماؤں نے کہا کہ ربیع الاول میں عید میلاد النبی (ص) کی محفلیں اور جلوس برپا کئے جاتے ہیں اور ملک کی غالب اکثریت جشن عید میلاد النبی (ص) کی وجہ سے دیگر سیاسی سرگرمیوں میں حصہ نہیں لے سکے گی۔ لہذا یہ ممکن نہیں کہ ان تین مہینوں میں بلدیاتی انتخابات میں بھرپور عوامی شرکت ہوسکے۔ مذکورہ حقائق کے علاوہ یہ حقیقت بھی اپنی جگہ موجود ہے کہ صوبائی حکومتیں بلدیاتی انتخابات کے لئے ضروری و لازمی اقدامات نہیں کر پائی ہیں۔ ابھی تک بیلٹ پیپرز کی چھپائی ایک مسئلہ بنا ہوا ہے اور الیکشن کمیشن کو آگاہ کیا جاچکا ہے کہ بلدیاتی انتخابات کی تیاریاں نہیں ہو پائی ہیں۔ ان انتخابات کا مقصد نچلی ترین سطح پر عوام کی اقتدار میں شرکت ہے اور اگر عوام کی بھرپور شرکت نہ ہو تو پھر ان انتخابات کا مقصد ہی فوت ہوجاتا ہے۔

رہنماؤں کا کہنا تھا کہ ہم ملک کی اعلیٰ ترین عدلیہ سے یہ درخواست کرتے ہیں کہ ان حقائق کی روشنی میں ربیع الثانی کے آ غاز میں بلدیاتی انتخابات منعقد کرائے جائیں اور نئے شیڈول کا اعلان کیا  جائے تاکہ بلدیاتی انتخابات میں ووٹرز کا ٹرن آؤٹ زیادہ سے زیادہ ہوسکے۔ اس طرح ملک کے سنی و شیعہ مسلمانوں کی بھرپور شرکت سے بلدیاتی انتخابات کا بنیادی مقصد جوکہ عوام کی نچلی ترین سطح پر اقتدار میں شرکت ہے وہ بنیادی مقصد بھی حاصل ہوگا اور پاکستان میں آئینی اسلامی جمہوریت مضبوط ہوگی اور عوام کے گلی محلوں کی سطح کے مسائل بھی حل ہوسکیں گے۔

وحدت نیوز(چنیوٹ) مجلس وحدت مسلمین پنجاب کے سیکرٹری جنرل علامہ عبدالخالق اسدی نے ضلع چنیوٹ کا تنظیمی دوہ کیا، جہاں انہوں نے ایم ڈبلیو ایم کے ذمہ داروں، کارکنوں اور مومنین سے ملاقاتیں کیں اور ان سے ملکی، قومی اور تنظیمی امور پر تبادلہ خیال کیا۔ اس موقع پر انہوں نے بھوانہ میں مقامی تنظیم کی تنظیم نو کے اجلاس میں بطور مہمان خصوصی شرکت کی اور نئے منتخب ہونے والے سیکرٹری جنرل برادر علی عمران سے عہدے کا حلف لیا۔ حلف کی تقریب کے بعد علامہ عبدالخالق اسدی نے اجلاس میں شریک مومنین سے خطاب کرتے ہوئے کہا کہ دھاندلی کے ذریعے حکومت میں آنے والے  حکمرانوں کی انسداد دہشت گردی کی پالیسیوں پر اعتماد نہیں کیا جا سکتا۔ طالبان کے ساتھ مذاکرات کی حکومتی حکمت عملی پر تنقید کرتے ہوئے مجلس وحدت مسلمین کے راہنما کا کہنا تھا کہ ہزاروں پاکستانیوں کے قاتلوں کے ساتھ بات چیت کا کوئی جواز نہیں لیکن پھر بھی حکومتی جماعت کو مذاکرات کی جلدی ہے جس سے یہ ثابت ہوتا کہ حکمرانوں کو عوام کے جان و مال کی کوئی پروا نہیں۔ انہوں نے اس بات پر زور دیا کہ دہشت گردوں کے خلاف قانونی کاروائی کی جائے ورنہ ملک میں پائیدار امن قائم نہیں ہو سکتا۔

اپنے دورے کے دوران علامہ عبدالخالق اسدی نے شہید علی ناصر صفوی اور ساتھ ہی شہید ہونے والی شہید کی زوجہ کے مزاروں پر حاضری دی اور فاتحہ خوانی کی۔ انہوں نے شہید کے درجات کی بلندی کی دعا کرتے ہوئے انکی خدمات کو خراج تحسین پیش کیا۔

وحدت نیوز(کراچی) وحدت یوتھ پاکستان صوبہ سندھ کے سیکرٹری مہدی عباس نے کہا ہے کہ وحدت یوتھ اور وحدت اسکاؤٹس کے جوان سندھ بھر میں عزاداری کے اجتماعات کے تحفظ کو یقینی بنائیں اور عزاداری کا تحفظ ہمارا شرعی فریضہ ہے جس سے کوتاہی در اصل خیانت کے مترادف ہو گا۔رپورٹ کے مطابق وحدت یوتھ پاکستان سندھ کے سیکرٹری یوتھ برادر مہدی عباس کراچی میں ڈسٹرکٹ اور کراچی ڈویژن کے ذمہ داروں سے خطاب کر رہے تھے۔

برادر مہدی عباس کاکہنا تھا کہ شہید قائد علامہ عارف حسین الحسینی (رح) کے فرمان کے مطابق ہم عزاداری سید الشہداء امام حسین علیہ السلام کو شہہ رگ حیات سمجھتے ہیں اور دشمن اسلام اور عزاداری کے دشمنوں کو یہ بات جان لینی چاہئیے کہ ہم اپنی شہہ رگ تک کسی دشمن کے ہاتھ کو پہنچنے سے پہلے ہی کاٹ دیں گے۔انہوں نے سید حسن نصر اللہ کے ایک بیان کو دہراتے ہوئے کہا کہ دشمن یہ بات جان لیں کہ ہمیں موسم کی سختیاں (گرمی و سردی) اور حالات کی کشدگی اور دہشت گردی سمیت بم دھماکوں کے خطرات عزاداری سید الشہداء ابا عبد اللہ الحسین علیہ السلام سے نہیں ڈرا سکتے۔ہمارا سر تن سے جدا تو ہو سکتا ہے لیکن ہم عزاداری سے انحراف برداشت نہیں کر سکتے۔

وحدت یوتھ کے صوبائی سیکرٹری نے سندھ بھر میں وحدت یوتھ اور وحدت اسکاؤٹس کے جوانو ں کے نام اپنے پیغام میں کہا ہے کہ وحدت یوتھ اور وحدت اسکاؤٹس کے جوان عزاداری سید الشہداء ابا عبد اللہ الحسین علیہ السلام کے اجتماعات کی حفاظت اور دفاع کو اولین ذمہ داری سمجھے ہوئے بھرپور خدمات انجام دیں۔

اس موقع پر کراچی ڈویژن کے سیکرٹری یوتھ برادر عباس صفوی سمیت ڈپٹی سیکرٹری یوتھ برادر محمود اور پانچوں اضلاع کے ضلعی سیکرٹری جنرل برادر حسن، برادر مرتضیٰ، برادر کلیم، برادر آغا کمیل اور برادر حسن موجود تھے۔