وحدت نیوز (اسلام آباد) شیعہ لاپتہ افراد کے اہل خانہ نے وزیراعظم، آرمی چیف جنر قمر جاوید باجوہ اور چیف جسٹس آف پاکستان سے اپنے پیاروں کی بازیابی کا مطالبہ کیا ہے۔ اہل خانہ کا کہنا تھا کہ ان کے پیاروں کو بازیاب نہ کرایا گیا تو وہ احتجاج پر مجبور ہوں گے۔ اسلام آباد میں پریس کانفرنس کرتے ہوئے فیصل آباد، چنیوٹ اور کبیروال سے تعلق رکھنے والے لاپتہ افراد راغب عباس، اختر عمران، وقار حیدر اور اسد عباس کے اہل خانہ کا کہنا تھا کہ ان کے پیارے گذشہ کئی ماہ سے لاپتہ ہیں لیکن ان کا بارے میں کچھ نہیں بتایا جارہا، اہل خانہ کا کہنا تھا کہ ملک میں جاری دہشت گردی سے سب سے زیادہ متاثر ہونے والے اہل تشیع ہیں، ہمارے ڈاکٹرز اور انجئیرز تک قتل کردئیے گئے، اب ہمارے پیاروں کو بھی لاپتہ کیا جا رہا ہے۔ اہل خان نے وزیراعظم نواز شریف، آرمی چیف اور چیف جسٹس آف پاکستان سے اپنے پیاروں کی بازیابی کا مطالبہ کیا ہے، ان کا کہنا تھا اگر ان کے بچوں پر کوئی الزام ہے تو ان پر مقدمات درج کرکے انہیں عدالت میں پیش کیا جائے۔

وحدت نیوز(کوئٹہ) مجلس وحدت مسلمین پاکستان کے مرکزی رہنما وامام جمعہ کوئٹہ علامہ ہاشم موسوی نے اپنے خطاب میں کہا کہ نصف صدی سے زائد عرصہ گزرنے کے باوجود بھی اقوام متحدہ سے مسئلہ کشمیر حل نہ ہوسکا اور آئے دن بھارت کی ریاستی دہشت گردی کے سبب بیگناہ کشمیری مسلمانوں کا قتل عام جاری ہے اور مقبوضہ کشمیر میں انسانی حقوق کی بدترین پامالی ہو رہی ہے جو اقوام متحدہ اور عالمی انسانی حقوق کے اداروں کی کارکردگی پر سوالیہ نشان ہے پاکستان اپنے کشمیر موقف سے ایک انچ بھی پیچھے نہیں ہٹے گا اور پاکستانی عوام مقبوضہ کشمیر میں جاری تحریک آزادی کی اپنی مکمل حمایت جاری رکھے گی مقبوضہ کشمیر بارے ہمارا موقف انسانی اور جمہوری اصولوں کے عین مطابق ہے ہر قوم کو اپنی تقدیر کا فیصلہ کرنے کا مکمل اختیار حاصل ہے کشمیری عوام بھارت کے ناجائز قبضے اور ظلم سے تنگ ہو چکیہیں اور وہ کسی بھی صورت انڈیا کیساتھ رہنا نہیں چاہتے اپنی مرضی کے مطابق آزاری کے زندگی بسر کرنا اور اپنی تقدیر کا فیصلہ کرنا کشمیری عوام کا انسانی اور جمہوری حق ہے ۔

انہوں نےمزید کہاکہ سب سے بڑے جمہوریت کے دعویدار انڈیا مقبوضہ جموں و کشمیر میں انکے حق خودارادیت سے انکار کرکے جمہوریت کا قتل کر رہی ہیں اور نام نہاد جمہوری دنیا خاموش تماشائی بنے ہوئے ہیں ہم چاہتے ہیں کہ اقوام متحدہ کی قراردادوں کے مطابق کشمیری عوام اپنی تقدیر کا فیصلہ خود کریں اقوام متحدہ اگر اپنے قرادادوں پر عملدرآمد نہیں کروا سکتی تو عالمی سطح پر اپنے قیام کی افادیت اور اعتبار کھو بیٹھے گی ۔انہوں نے مزید کہاکہ پاکستان اپنے کشمیری بھائیوں کی کی ہر سطح پر اخلاقی اور سفارتی حمایت جاری رکھے گا موجودہ حکومت کی مسئلہ کشمیر کے سلسلے میں سفارتی کوششیں نہ ہونے کے برابر ہے لہذا حکومت اپنی سفارتی کوششیں تیز کر کے اقوام متحدہ پر زور دے کہ وہ جلد از جلد مسئلہ کشمیر حل کریں علامہ ہاشم موسوی نے عوام پر زور دیا کہ یوم یکجہتی کشمیر کو شایان شان طریقے سے منا کر اپنے مظلوم کشمیری بھائیوں کو یہ پیغام دے کہ پاکستان قوم آپ کے ساتھ شانہ بشانہ کھڑی ہے.

وحدت نیوز (کراچی) مسلم لیگ (ن) کے رہنما محمد زبیر عمر نے سندھ کے 32 ویں گورنر کی حیثیت سے حلف اٹھا لیا۔ تفصیلات کے مطابق گورنر ہاؤس کراچی میں گورنر سندھ محمد زبیر کی حلف برداری کی تقریب منعقد ہوئی، جس میں چیف جسٹس سندھ ہائی کورٹ جسٹس سجاد علی شاہ نے محمد زیبر سے حلف لیا۔ اس موقع پر وزیراعلیٰ سندھ سید مراد علی شاہ، صوبائی وزرا، مسلم لیگ (ن) کے اہم رہنماؤں سمیت اہم سیاسی شخصیات، اعلیٰ سرکاری حکام اور معززین کے علاوہ ان کے اہل خانہ بھی موجود تھے۔ نئے گرور سندھ محمد زبیر عمر 23 مارچ 1956ء كو ایبٹ آباد میں پیدا ہوئے۔ انہوں نے ابتدائی تعلیم ایبٹ آباد اور راولپنڈی میں حاصل كی، 1984ء میں کراچی کے معروف تعلیمی ادارے آئی بی اے سے پبلک ایڈمنسٹریشن میں ماسٹرز كی ڈگری حاصل كی، وہ امریكی كمپنی آئی بی ایم سے وابستہ رہے اور پیرس، روم، میلان اور دبئی میں تعینات رہے۔

حلف لینے کے بعد گورنر سندھ محمد زبیر نے مزار قائد پر حاضری دی، پھول چڑھائے اور فاتحہ خوانی کی، اس موقع پر وزیر مملکت مریم اورنگزیب سمیت مسلم لیگ (ن) کے رہنما دانیال عزیز، طارق فضل چودھری بھی ان کے ہمراہ تھے۔ مزار قائد پر میڈیا سے بات کرتے ہوئے گورنر سندھ کا کہنا تھا کہ وزیراعظم پاکستان کے اعتماد پر ان کا شکرگزار ہوں، میرے اور میرے خاندان کیلئے یادگار دن ہے، جبکہ وزیراعظم اور عوام کی امیدوں پر پورا اترنے کی کوشش کروں گا۔ انہوں نے کہا کہ اپنے عہدے کا پورا حق ادا کرنے اور قائداعظمؒ کے نقش قدم پر چلتے ہوئے سندھ کی ترقی کیلئے کوشش کروں گا۔ واضح رہے 14 سال تک سندھ کے گورنر رہنے والے ڈاکٹر عشرت العباد خان کے بعد جسٹس (ر) سعید الزماں صدیقی کو سندھ کا 31 واں گورنر مقرر کیا گیا تھا، جنہوں نے 11 نومبر 2016ء کو اپنے عہدے کا حلف اٹھایا، تاہم وہ خرابی صحت کی بنا پر زیادہ عرصے تک گورنر کی ذمہ داریاں نہ نبھا سکے اور 12 جنوری 2017ء کو انتقال کرگئے۔

وحدت نیوز (آرٹیکل) جب رسول خدا (ص) حضرت زینب سلام اللہ علیہا کی ولادت کے موقع پر علی (ع) و فاطمہ (س) کے گھر تشریف لائے تو آپ نے نومولود بچی کو اپنی آغوش میں لیا۔ اس کو پیار کیا اور سینے سے لگایا۔ اس دوران علی (ع) و فاطمہ (س) نے کیا دیکھا کہ رسول خدا (ص) بلند آواز سے گریہ کر رہے ہیں۔ جناب فاطمہ (س) نے آپ سے رونے کی وجہ پوچھی تو آپ نے فرمایا "بیٹی، میری اور تمہاری وفات کے بعد اس پر بہت زیادہ مصیبتیں آئیں گی۔" کتب تاریخی میں شریکۃ الحسین کے ذکر شدہ القاب کی تعداد تقریباً 61 ہے۔ ان میں سے کچھ مشہور القاب درج ذیل ہیں، عالمہ غیر معلمہ، نائبۃ الزھراء، عقیلہ بنی ھاشم، نائبۃ الحسین، صدیقہ صغریٰ، محدثہ، کاملہ، عاقلہ، عابدہ، زاھدہ، فاضلہ، شریکۃ الحسین، راضیہ بالقدر والقضاء۔

عالمہ غیر معلمہ کا بچپن معصومین کی زیرنگرانی رہا۔ آپکی خوش قسمتی کا اندازہ اس بات سے لگایا جا سکتا ہے کہ آپ کی تربیت کرنے والی ماں سیدہ نساءالعالمین حضرت فاطمہ (س) ہیں، وہ فاطمہ جو دختر رسول ہے، جس کی رضا میں خدا راضی اور جسکے غضب سے خدا غضبناک ہوتا ہے۔ وہ فاطمہ جو بضعۃ الرسول ہے، جو خاتون جنت ہے، وہ فاطمہ کہ جس کی عبادت پر پروردگار مباہات فرماتا ہے، وہ فاطمہ جس کی چکی جبرئیل علیہ السلام چلاتے ہیں۔ اگر باپ کو دیکھیں تو حیدر کرار جیسا باپ ہے، آپ نے امام علی (ع) جیسے باپ کی زیر نگرانی پرورش پائی ہے۔ اس کے علاوہ پیغمبر اکرم (ص)، جو تمام انسانوں کے لئے "اسوہ حسنہ" ہیں، نانا کی حیثیت سے آپ کے پاس موجود ہیں۔ لہذٰا یہ آپ کے افتخارات میں سے ہے کہ آپ نے رسول خدا (ص)، امام علی (ع) اور فاطمہ زہرا (س) جیسی بےمثال شخصیات کی سرپرستی میں پرورش پائی۔ اس سے بخوبی اندازہ لگایا جا سکتا ہے کہ آپ کی تربیت کس قدر بہترین اور مقدس ماحول میں ہوئی۔

آپ کی شادی 17 ہجری میں آپ کے چچازاد بھائی عبداللہ ابن جعفر ابن ابیطالب سے ہوئی۔ عبداللہ حضرت جعفر طیار کے فرزند اور بنی ہاشم کے کمالات سے آراستہ تھے۔ آپ کے چار فرزند تھے، جن کے نام محمد، عون، جعفر اور ام کلثوم ہیں۔ (البتہ آپکی اولاد کی تعداد میں اختلاف پایا جاتا ہے) کربلا کا واقعہ انسانی تاریخ میں ایک بےمثال واقعہ ہے۔ لہذٰا اس کو تشکیل دینے والی شخصیات بھی منفرد حیثیت کی حامل ہیں۔ امام حسین (ع) اور ان کے جانثاروں نے ایک مقدس اور اعلٰی ہدف کی خاطر یہ عظیم قربانی دی، لیکن اگر حضرت زینب سلام اللہ علیہا اس عظیم واقعے کو زندہ رکھنے میں اپنا کردار ادا نہیں کرتیں تو بلاشک وہ تمام قربانیان ضائع ہو جاتیں۔ کسی شاعر نے کیا خوب کہا ہے، "کربلا در کربلا می ماند گر زینب نبود۔" لٰہذا اگر ہم آج شہدائے کربلا کے پیغام سے آگاہ ہیں اور ان کی اس عظیم قربانی کے مقصد کو درک کرتے ہیں تو یہ سب عقیلہ بنی ہاشم سلام اللہ علیہا کی مجاہدت اور شجاعانہ انداز میں اس پیغام کو دنیا والوں تک پہنچانے کا نتیجہ ہے۔

بلاشبہ اسی وجہ سے انہیں "شریکۃ الحسین" کا لقب دیا گیا ہے۔ اگر امام حسین علیہ السلام اور ان کے جانثاروں نے اپنی تلواروں کے ذریعے خدا کی راہ میں جہاد کیا تو شریکۃ الحسین سلام اللہ علیہا نے اپنے کلام اور اپنے خطبات کے ذریعے اس جہاد کو اس کی اصلی منزل تک پہنچایا۔ کربلا میں سیدالشہداء حضرت امام حسین علیہ السلام اور آپ کے ساتھیوں کو شہید کرنے کے بعد دشمن یہ سمجھ رہا تھا کہ اس کو ایک بے نظیر فتح نصیب ہوئی ہے اور اس کے مخالفین کا ہمیشہ کے لئے خاتمہ ہوگیا ہے، لیکن نائبۃ الحسین سلام اللہ علیہا کے پہلے ہی خطبے کے بعد اس کا یہ وہم دور ہوگیا اور وہ یہ جان گیا کہ یہ تو اس کی ہمیشہ کیلئے نابودی کا آغاز ہے، یزید کا نام ہمیشہ ہمیشہ کے لئے ختم ہوگیا اور حسین آج بھی زندہ ہے۔
قتل حسین اصل میں مرگِ یزید ہے
اسلام زندہ ہوتا ہے ہر کربلا کے بعد

تحریر۔۔۔۔ محمد جان حیدری

وحدت نیوز (پنجاب) مجلس وحدت مسلمین پاکستان صوبہ پنجاب نے تنظیمی فعالیت کو بہتر بنانے اور عوامی رابطہ کو مزید مستحکم و مفیدکرنے کے لئے مرکزی سیکرٹری جنرل علامہ راجہ ناصر عباس جعفری کے دورہ سینٹرل پنجاب کا انتظام کیا جس میں 23جنوری سے 28جنوری تک مرکز ی سیکرٹری جنرل علامہ راجہ ناصر عباس جعفری نے منڈی بہاوالدین ، فیصل آباد ، جھنگ ، ساہیوال اور لاہور کے دورہ جات کئے ہیں اس دورہ کے مقاصد میں جہاں اتحاد بین المسلمین کا حصول تھا وہاں اتحاد بین المسلمین کی فضاء کو سازگار کرنے کے لئے اور مجلس وحدت مسلمین کے پروگرام سے علاقہ جات کے اہم شیعہ حضرات کو آگاہ کرنے کا بھی پروگرام مرتب کیا گیا تھا ، اس حوالے سے بار کونسلز سے خطابات اور علماء اہل سنت اور ملت جعفریہ کے اکابرین سے ملاقاتیں اپنی اہمیت کی حامل تھیں جن سے دورس نتائج حاصل کئے جاسکیں گے ۔ ان مقاصد کو مد نظر رکھتے ہوئے دورہ کے پہلے مرحلہ میں پنجاب کے اہم اضلاع جن میں لاہور، فیصل آباد، منڈی بہاوالدین ، جھنگ ، ساہیوال شامل تھے کا انتخاب کیا گیا ۔تفصیلات کے مطابق مرکزی سیکرٹری جنرل علامہ راجہ ناصر عباس جعفری کا وفد جس میں مرکزی ترجمان علامہ مختار احمد امامی ، صوبائی سیکرٹری جنرل علامہ سید مبارک علی موسوی ، صوبائی ڈپٹی سیکرٹری جنرل مولانا سید ملازم حسین نقوی صاحب، صوبائی سیکرٹری تنظیم سازی مولانا سید نیاز حسین بخاری صاحب شامل تھے ۔

دورہ ضلع منڈی بہاوالدین  

23جنوری کو صبح 10بجے منڈی بہاوالدین میں تحصیل ملکوال میں میانی بھیرہ میں اہل علاقہ اور تنظیمی کارکنان کی بڑی تعداد نے مرکزی سیکرٹری جنرل کا پرتپاک استقبال کیا اور استقبال کے لئے آنے والے شرکاء موٹر سائیکل ، گاڑیوں پر سوار تھے اور کارکنان پر جوش نعرے لگا کر اپنے قائدین کا استقبال کر رہے تھے ۔ملکوال میلاد چوک میںامن کانفرنس منعقد ہوئی جس میں محمد احسان رضوی منہاج القرآن  معروف نعت خواں مارب مدنی ، سید اسد عباس نقوی ضلعی ترجمان ، راجہ یاسر حسین، ذاکرین کے نمائندہ سید سجاد شماری نے خطاب کیئے اس کے علاوہ اکبر علی گو گا صاحب پولیٹیکل فگر ، راجہ عمیر آف ملکوال شامل تھے۔علاقہ شماری میں معززین اور اہل علاقہ سے مقامی امام بارگاہ میں ملاقات کی گئی ۔اس کی بعد سید نجم الحسن ضلعی وائس چیئر مین کے ڈیرہ پر معززین اور اہل علاقہ سے ملاقات کی گئی ۔اس کے بعد سید ذکی الحسن کی رہائش گاہ پر معززین اور اہل علاقہ سے ملاقات کی گئی اور مقامی امام بارگاہ میں خواتین سے نشست کی گئی اور درس دیا گیا ۔امام بارگاہ مونا سیداں میں نماز مغربین کے بعد شرکاء کی ایک بڑی تعداد سے مرکزی سیکرٹری جنرل علامہ راجہ ناصر عباس جعفری صاحب نے خطاب کیا ۔

تحصیل پھالیہ ضلع منڈی بہاوالدین میں قائد وحد ت کا بھرپور استقبال کیا گیا جہا ں کے مقامی امام بارگاہ میں اہل علاقہ کی بڑی تعداد سے خطاب کیا گیا۔ڈھوک شہانی میں مقامی شیعہ و سیا سی راہنماء سید عابد حسین کاظمی مرحوم کی رسم دسواں میں شرکت کی اور پسماندگان سید اکمل حسین کاظمی سے تعزیت کی جبکہ سید اکمل حسین کاظمی نے مجلس وحدت مسلمین کی تنظیم سازی اور کارکردگی کو بہتر بنانے کے لیے ہر قسم کے تعاون کی یقین دہانی کروائی ۔ضلع بار کونسل منڈی بہاوالدین میں بار کونسل سے خطاب کیا جس میں مقامی وکلاء نے بھر پور شرکت کی اور قائد وحدت علامہ راجہ ناصر عباس جعفری سے مجلس وحدت مسلمین اور پاکستان میں اہل تشیع کے کردار پر سوالات اٹھائے جن کے مرکزی سیکرٹری جنرل نے وضاحت کے ساتھ جوابات دیے ۔اس کے بعد آخر میں بار کونسل میں پریس کانفرنس منعقد کی گئی جس کی اختتام پر مقامی صحافی حضرات اور وکلاء سے ملاقاتیں کی گئیں ۔اس کے بعد محترم محمد اقبال ساہی کی رسم چہلم کی مجلس سے خطاب کیا ۔

دورہ ضلع فیصل آباد

فیصل آباد میں مرکزی سیکرٹری جنرل علامہ راجہ ناصر عباس جعفری کا استقبال ڈپٹی والا انٹر چینج پر کیا گیا جہاں ضلعی سیکرٹری جنرل سید صفدر رضا رضوی ، مولانا حبیب رضا ، مولانا سید کاظم حسین شاہ ، مولانا ریاض حسین معروف شخصیت شاہد حسین شاہ اور صوبائی کابینہ کے اراکین جن میںمولانا سید ملازم حسین نقوی صاحب، مولانا سید نیاز حسین بخاری صاحب ، برادر رائے ناصر علی ، برادر رانا ماجد علی و صوبائی سیکرٹری جنرل علامہ سید مبارک علی موسوی صاحب سمیت سینکڑوں کارکنان اور اہل علاقہ موجود تھے جس کے بعد علاقہ قاضی والا امام بارگاہ میں مقامی عمائدین اور عوامی اجتماع سے خطاب کیا ، مقامی بااثر شخصیات سید شاہد حسین شاہ صاحب کے ڈیرہ پر اہم علاقائی شخصیات بابا زوار حسین شاہ ، مولانا سید کاظم حسین شاہ ، منصب علی اور سید طاہر حسین شاہ سے ملاقات کی اور مجلس وحد ت مسلمین کی کا رکردگی اور فعالیت پر گفتگو کی گئی اس کے بعد چک جھمرہ میں قدیمی امام بارگاہ و مسجد سادات میں مقامی اہم شخصیت سید طاہر حسین کاظمی سے ملاقات کی ۔

 علی مسجد مدینہ ٹاون میں شیعہ خواتین سے تنظیمی زندگی کے فوائد پر گفتگو کی گئی اس کے بعد قومی نیوز چینل سٹی 41اور بول چینل کے دفاتر کا دورہ کیا اور انتظامیہ سے ملاقات کی اور ملکی مسائل میں میڈیا کے کردار کے حوالے سے گفتگو کی ۔

اس کے بعد فیصل آباد پریس کلب میں مجلس وحدت مسلین پاکستان اور سنی اتحاد کونسل کی مشترکہ پریس کانفرنس منعقد ہوئی جس میں سنی اتحاد کونسل کے راہنماوں صاحبزادہ حامد رضا ، صاحبزادہ حسین رضا اور مقامی اہل سنت علماء کرام اور مجلس وحدت مسلمین کے دورہ میں شریک اراکین نے مرکزی سیکرٹری جنرل علامہ راجہ نا صر عباس جعفری کی قیادت میں شرکت کی اور پریس کانفرنس سے خطاب کیا دونوں راہنماوں نے پاکستان میں شیعہ سنی اتحاد و یکجہتی کے لئے مل کر کام کرنے کا عہد کیا اور وطن عزیز کو درپیش مشکلات کے حل کیلئے مشترکہ جدو جہد کا عزم کیا ۔

سدھو پورہ میں مقامی امام بارگاہ میں اہل علاقہ کے ایک بڑے اجتماع سے خطاب کیا گیا ،اور مقامی علماء کرام سے ملاقاتیں کی گئیں ۔

سنی اتحاد کونسل کی طرف سے مجلس وحدت مسلین کے قائدین ، دورہ میں شریک وفد کے اعزاز میں سربراہ سنی اتحاد کونسل صاحبزادہ حامد رضا کی رہائش گاہ پر عشائیہ دیا گیا جس میں علامہ راجہ ناصر عباس جعفری مرکزی کابینہ اراکین میں سے مولانا مختار احمد امامی صاحب ، سید ناصر عباس شیرازی صاحب اور صوبائی سیکرٹری جنرل علامہ سید مبارک علی موسوی صاحب و صوبائی کابینہ کے اراکین ، علامہ سید نیاز حسین بخاری صاحب ، برادر رائے ناصر علی صاحب، برادر مظاہر شگری صاحب،برادر رانا ماجد صاحب اور سنی اتحاد کونسل کے مقامی و مرکزی عہدیداران نے شرکت کی ۔

دورہ ضلع ساہیوال

ضلع ساہیوال میں پاکپتن چوک پہنچنے پر مقامی اہل تشیع حضرات و ضلعی عہدیداران نے ضلعی سیکرٹری جنرل غلام اصغر عابدی کی قیادت میں مرکزی سیکرٹری جنرل علامہ راجہ ناصر عباس جعفری سمیت وفد میں شامل افراد کا استقبال کیا جس کے فوراً بعد شہید خالد محمود بٹ کے گھر پرجا کر شہید کے اہل خانہ اور بیٹے علی رضا بٹ سے اظہار تعزیت کی ا ور فاتحہ خوانی کی گئی ، شہر ساہیوا ل کے معروف عزادارن اور امام بارگاہوں کی انتظامیہ کے عہدیداران سے ملاقات کی گئی جس کے بعد وفد جس میں مرکزی سیکرٹری جنرل علامہ راجہ ناصر عباس جعفری صاحب ، مرکزی ترجمان مولانا مختار احمد امامی صاحب ، صوبائی سیکرٹر جنرل علامہ سید مبار ک علی موسوی صاحب ، صوبائی روابط سیکرٹری برادر رائے ناصر علی نے امام بارگاہ قصر بتول ؑ میں نماز جمعہ میں شرکت کی اس موقعہ پر ناصر ملت علامہ راجہ ناصر عباس جعفری نے شرکاء سے خطاب کیا اور مقامی عمائدین سے ملاقاتیں کیں ۔

اس کے بعد مرکزی و صوبائی وفد 68-4Rمیں عوام کے ایک بڑے اجتماع میں شرکت کی اور مرکزی سیکرٹری جنرل علامہ راجہ ناصر عباس جعفری صاحب نے شرکاء سے خطاب کیا ۔ اس کے بعد ساہیوال میں اتحاد بین المسلمین فورم کے راہنماء سید ضیاء اللہ شاہ بخاری ، شیخ اعجاز احمد جنرل سیکرٹری اتحاد بین المسلمین فورم کی دعوت پر مقامی سطح پر تما م مسالک کے علماء کر ام سے ملاقات کی اور اتحاد بین المسلمین کے حوالے سے فورم کی کاوششوں کی تعریف و قدردانی کی گئی ۔

اس کے بعد شعبہ خواتین مجلس وحد ت مسلمین ضلع ساہیوال کی خصوصی نشست میں شرکت کی اور شعبہ خواتین کی اہمیت اور فعالیت کے حوالے سے شرکاء سے خطاب کیا  اس کی بعد مقامی قصبہ نور شاہ کا دورہ کیا گیا جس میں مقامی علماء اور بااثر شخصیات کے اجتماع سے خطاب کیا گیا جبکہ مقامی کارکنان نے وفد کا بھر پور استقبال کیا اور پر جوش نعرے بازی کی گئی ، اس کے بعد یوسف والا میں بھی دورہ کیا گیا جہاں مقامی افراد نے وفد کا بھرپور استقبال کیا اور مقامی راہنماوں و عوام کے اجتماع سے خطاب کیا گیا۔

دورہ ضلع جھنگ

جھنگ شہر سے پانچ کلو میٹر دور سے ناصر ملت کا پرتپاک استقبال کیا گیا جس میں سینکڑوں موٹر سائیکل سوار اور گاڑیوں پر مشتمل افراد نے کیا اس موقع پر صوبائی ڈپٹی سیکرٹر جنرل مولانا سید ملازم حسین نقوی ، صوبائی سیکرٹری تنظیم سازی مولانا سید نیاز حسین بخاری صاحب ، ضلعی آرگنائزر انتخاب حسین بلوچ و ضلعی کابینہ اراکین شامل تھے ، استقبال کے بعد یہی کاروان ضلع بارکونسل میں پہنچا جہاں مرکزی سیکرٹری جنرل علامہ راجہ ناصر عباس جعفری صاحب نے شرکاء بار کونسل سے خطاب کیا اس موقعہ پر وکلاء نے سوالات کیے جن کے تفصیلاً جوابات مرکزی سیکرٹری جنرل صاحب نے دیئے ۔اس پروگرام میں وکلاء کی بڑی تعداد نے شرکت کی اور مرکزی سیکرٹری جنرل علامہ راجہ ناصر عباس جعفری صاحب سے گھل مل گئے ۔

اس کے بعد پریس کلب جھنگ میں صحافیوں سے ملاقات کی اور پریس کانفرنس سے خطاب کیا اس موقعہ پر تمام ٹی وی چینلز اور پرنٹ میڈیا کے صحافی موجود تھے ۔ مقامی معروف نوحہ خواں ناصر عابد نے مرکزی کارواں کے راہنماوں کے اعزاز میں ظہرانہ دیا جس میں مقامی سیاسی و مذہبی جماعتوں کے راہنماء مدعو تھے ۔ اس موقعہ پر مرکزی سیکرٹری جنرل صاحب نے شرکاء سے گفتگو کی ۔

اس کے بعد امام بارگاہ حسینہ ؑ جھنگ سٹی میں عوامی اجتماع منعقد کیا گیا جس میں مجلس وحدت کے کارکنوں اور مقامی عزاداروں کی بڑی تعداد نے شرکت کی ۔ اس موقعہ پر مرکزی سیکرٹری جنرل علامہ راجہ ناصر عباس جعفری مرکزی ترجمان علامہ مختار احمد امامی نے خطاب کیا ۔

سیاسی و سماجی شخصیات سے ملاقات کا اہتمام کیا گیا جس میں مقامی کونسلر سید زین علی ، زوار محسن مغل ، خان نواب ناصر خان سیال ، سید آفتاب نقوی ، سابقہ کونسلر چوہدری رازق ، عمران حیدر، عمران خان ، ملک صفدر ، ملک مظفر تھیم ، چوہدری قیصر عباسی ، شیخ شاہد ، برادر عباس ، برادر ذیشان جعفری سمیت مقامی سطح کی اہم بااثر شخصیات نے ملاقاتیں کیں اور مجلس وحدت مسلمین کی ملی خدمات کو سراہا او رہر میدان میں جماعت کی طرف سے قوم و ملت کی بے باک قیادت کرنے پر قدردانی کی ۔
اس کے بعد مقامی سیاست دان فیصل عباس حیوآنہ کی رہائش گاہ پر وفد کے اعزاز میں عشائیہ دیا گیا ، قبل ازیںچیئر میں ضلع کونسل بابر حسین خان سیال سے ان کی رہائش گاہ پر ملاقات کی اور انکو چیئر مین منتخب ہونے پر مبارک باد دی اس موقعہ پر باہمی دلچسپی کے امور پر بحث کی گئی ، بابر سیال صاحب نے مقامی طور پر اتحاد بین المسلمین اور مذہبی رواداری کے قیام کے لیئے بھرپور کاوشیں کرنے کے عزم کا اظہار کیا ۔

دورہ ضلع لاہور

مرکزی سیکرٹری جنرل علامہ راجہ ناصر عباس جعفری اور مرکزی ترجمان علامہ مختاراحمد امامی دورہ سینٹرل پنجاب کے سلسلے کے آخر میں لاہور پہنچے جہاں صوبائی سیکرٹری جنرل علامہ سید مبارک علی موسوی صاحب ، ضلعی سیکرٹری جنرل علامہ سید حسن رضا ہمدانی صاحب ، ضلعی کابینہ کے اراکین نے استقبال کیا پہلی مصروفیت ٹاون شپ بارگاہ میں خواتین کارکنان و عہدیداران سے تنظیمی ملاقات تھی جس میں ضلع لاہور میں شعبہ خواتین کو فعال کرنے کے حوالے سے تجاویز اور مشکلات کا جائزہ لیا گیا اس نشست میں خواتین عہدیداران نے ضلع میں شعبہ خواتین کو فعال کرنے کا عزم ظاہر کیا اس کے بعد مرکزی ، صوبائی و ضلعی کابینہ کے اراکین پر مشتمل وفد جادہ شاہدرہ میں امام بارگاہ ملک عطا میں مقامی عمائدین علماء کرام اور راہنماوں سے ملاقاتیں کیں جس میں ضلع لاہور میں تنظیم سازی کی مہم کو تیز کرنے کے حوالے سے تجاویز کا جائزہ لیا گیا ،اس کے بعد صوبائی آفس لاہور میں پریس کانفرنس منعقد کی گئی جس میں مرکزی سیکرٹری جنرل نے صحافی حضرات سے خطاب کیا جس میں مقامی میڈیا کے تمام چینلز اور پر نٹ میڈیا کے صحافیوں نے شرکت کی ۔

اس کے بعد وحدت یوتھ ضلع لاہور کے زیر اہتمام پروگرام منعقدہ مسجد قصر بتول شادمان میں شرکت کی گئی اور شرکاء پروگرام سے مرکزی سیکرٹری جنرل علامہ راجہ ناصر عباس جعفری صاحب نے خطاب کیا ۔ پروگرام میں ضلع بھر سے وحدت یوتھ کے جوانان نے شرکت کی ضلع لاہور کی کابینہ سے ملاقات صوبائی آفس میں کی جس میں ضلع لاہور کی فعالیت اور تنظیم سازی کی تجاویز اور حکمت عملی پر غور کیا گیا ۔

ترتیب وتدوین:زاہد مہدوی

وحدت نیوز (لاہور) وفاقی وزیر پانی و بجلی خواجہ آصف کے  نجی ٹیلی ویژن  کے پروگرام میں دیئے گئے انٹرویو پر بات کرتے ہوئے مجلس و حدت مسلمین کے مرکزی سیکرٹری امور سیاسیات سید اسد عباس نقوی نے کہاہے کہ حکومتی وزیروں نے اپنی نااہلی اور غلط پالیسیوں کے سبب  ملکی معیشت کو کافی نقصان پہنچایا ہے، انہوں نے کہا کہ وفاقی وزیر کا یہ کہنا کہ ہم بجلی کے معاملے  میں عوام کے ساتھ کاروبار کر رہے ہیں وہ قابل مذمت ہے۔ سید اسد عباس نقوی کا کہنا ہے کہ لوڈشیدنگ کے خاتمے کے جھوٹے وعدوں پر ووٹ لینے والی حکومت کا جھوٹ عوام کے سامنے واضح ہو چکا ہے،انہوں نے کہا کہ چھ ماہ میں لوڈ شیڈنگ ختم کرنے کے وعدے کر کے سادہ لوح عوام کو گمرہ کیا گیا، حکومت نے جتنے بھی پروجیکٹس شروع کیئے وہ کرپشن کی نظر ہو گئے نندی پور سکینڈل کیخلاف کاروائی نہ ہونا کرپشن کیخلاف اقدامات کرنے والے اداروں کی ناکامی ہے، انہوں نے کہا عوام اب بیدار ہو چکی ہے اور پاناماکرپشن کیس میں پھنسے حکمرانوں کے جھوٹ عوام پرعیاں ہو چکے ہیں،سید اسد عباس نقوی نے کہا کہ اگر حکمران بجلی چوورں کو نہیں پکڑ سکتے تو اپنی وزارتوں سے استعفیٰ کیوں نہیںدیتے ،اپنی نا اہلی کی سزا غریب عوام کو کیوں دی جا رہی ہے،دنیا بھر میں پیٹرولیم مصنوعات کی قیمتوں میں نمایاں کمی کے باوجود ملک میں پیٹرولیم مصنوعات کی قیمتیں بڑھا کر اپنی عیاشیوں کے لئے عوام کا استحصال کیا جا رہا ہے۔