وحدت نیوز(اسلام آباد ) ملی یکجہتی کونسل پاکستان کے اعلیٰ سطحی وفد کی پاکستان میں متعین برداراسلامی ملک عراق کے سفیر حامد عباس لفطہ سے عراقی سفارت خانے میں ملاقات۔ وفد میں ڈپٹی سیکرٹری جنرل مجلس وحدت مسلمین پاکستان و ملی یکجہتی کونسل پاکستان سید ناصر عباس شیرازی، چئیرمین البصیرہ ٹرسٹ و ڈپٹی سیکرٹری ملی یکجہتی کونسل پاکستان سید ثاقب اکبر، سیکریٹری جنرل جمعیت علمائے پاکستان نیازی گروپ پیر سید صفدر شاہ گیلانی اور ہدیہ الہادی پاکستان کے صدر پیر سید معرفت حسین شاہ شریک تھے۔
وفد نے باہمی دلچسپی کے امور سمیت پاکستان عراق تعلقات اور زائرین کے حوالے سے امور پر گفتگو کی، رہنماؤں نے کہا کہ پاکستان اور عراق کے عوام گہرے اسلامی، ثقافتی اور روحانی رشتوں میں منسلک ہیں ، دونوں ممالک کے درمیان سفارتی ، تجارتی، دفاعی تعلقات میں مزید استحکام وقت کی ضرورت ہے ۔