وحدت نیوز(جعفرآباد)مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے ضلع جیکب آباد اور جعفر آباد کے مختلف علاقوں کا دورہ کیا اور وہاں انجمن حسینیہ خواجگان نارووالی کے تعاون سے زیر تعمیر مساجد کے کام کا جائزہ لیا۔ اس موقع پر گفتگو کرتے ہوئے علامہ مقصود علی ڈومکی نے کہا کہ مسجد اسلامی معاشرے کا مرکز اور محور ہے۔ جہاں اللہ تعالیٰ کی عبادت اور بندگی کے ساتھ ساتھ دینی تعلیم و تربیت کا درس ملتا ہے۔ مسجد دین اسلام کا مورچہ ہے۔ ہمیں مساجد سے اپنے تعلق کو مضبوط بنانا چاہئے۔

انہوں نے کہا کہ انجمن حسینیہ خواجگان نارووالی کے تعاون سے پہلے مرحلے میں سیلاب متاثرہ علاقوں میں 21 مساجد اور 11 مکانات کی تعمیر تکمیل کے مرحلے میں ہے۔ جبکہ عید الفطر کے تیسرے دن سیلاب متاثرہ علاقوں میں تعمیرات کے دوسرے مرحلے کے 26 مکانات اور 6 مساجد کے تعمیراتی کام کا باقاعدہ آغاز ہوگا۔ انہوں نے کہا کہ مجلس وحدت مسلمین پاکستان پہلے دن سے سیلاب متاثرین کے ساتھ ہے اور ہم متاثرین سیلاب کی بحالی کے عمل میں بھی حسب استطاعت کوشش کر رہے ہیں۔

وحدت نیوز(سکردو) گلگت بلتستان کے وزیر زراعت کاظم میثم نے بجلی کی سپیشل لائن لینے سے انکار کر دیا۔ اس سے پہلے بھی وہ سپیشل لائن لینے سے انکار کر چکے ہیں۔

 ان کا کہنا تھا کہ عوام کو جو بجلی مل رہی ہے وہ مجھے بھی ملے۔ میں نے پہلے بھی سپیشل لائن لینے معذرت کی ہے اب بھی معذرت کروں گا، جو بجلی دستیاب ہے وہ عوام میں بلاتفریق تقسیم کی جائے۔ میں عوام سے برتر نہیں ہوں۔

 بجلی کے بڑے منصوبے وفاقی حکومت کی ایما پر ڈراپ کئے جا رہے ہیں۔ شغرتھنگ پاور پراجیکٹ کو ایکنک سے واپس کرنا اس کی واضح دلیل ہے۔ ہم عوامی حقوق کیلئے ہر فورم پر لڑ رہے ہیں کہیں کوئی کمزوری نہیں دکھائیں گے۔

وحدت نیوز(جیکب آباد)سانحہ شب عاشور جیکب آباد کے وارثان شہداء اور سانحے کے زخمیوں کے اعزاز میں مدرسہ المصطفیٰ خاتم النبیین صلی اللہ علیہ وآلہ وسلم جیکب آباد میں علامہ مقصود علی ڈومکی کی زیر صدارت ایک پروقار تقریب منعقد ہوئی۔ جس میں وارثانِ شہداء کے بچوں اور بچیوں میں عید گفٹ تقسیم کئے گئے اور شہدائے راہ حق کو زبردست خراج عقیدت پیش کیا گیا۔

 اس موقع پر خطاب کرتے ہوئے مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے کہا کہ شہداء کی یاد منانا اور ان کے مقصد اور مکتب کو زندہ رکھنا عظیم عبادت ہے۔ انہوں نے دین خدا کی سربلندی اور حسینیت کی راہ میں اپنے لہو کا نذرانہ پیش کیا۔ آج پوری قوم انہیں سلام عقیدت پیش کرتی ہے۔ وارثانِ شہداء کو چاہیے کہ وہ اپنے شہداء کے مشن اور مقصد کو زندہ رکھیں۔ ایم ڈبلیو ایم کے رہنماء نے کہا کہ ہم عید کی خوشیاں وارثانِ شہداء اور غازیوں کے ساتھ مناکر ان کی قربانیوں کو خراج تحسین پیش کرتے ہیں۔ شہداء ہمارے محسن ہیں۔ زندہ قومیں اپنے محسنوں کو کبھی نہیں بھلاتیں۔

انہوں نے ضلع کشمور میں قبائلی جھگڑے، بدامنی، ڈاکو راج کے نتیجے میں معصوم انسانوں کے قتل عام اور اغواء برائے تاوان کی وارداتوں میں معصوم بچوں اور شہریوں کے اغواء پر شدید غم و غصّے کا اظہار کرتے ہوئے کہا کہ ضلع کشمور علاقہ غیر بن چکا، جس کی صورتحال اس وقت کشمیر و فلسطین کا منظر پیش کر رہی ہے۔ وفاقی حکومت، سندھ حکومت سمیت ریاستی ادارے کئی مہینوں سے ڈاکو راج اور قبائلی جھگڑوں میں ہونے والی قتل و غارتگری کا تماشہ دیکھ رہے ہیں۔ مگر کوئی سنجیدہ اقدامات کرنے کے لئے تیار نہیں۔ اس درد ناک صورتحال میں فوج رینجرز اور پولیس کا مشترکہ آپریشن ناگزیر ہوچکا ہے۔ وارثانِ شہداء کے اعزاز میں منعقدہ تقریب سے مجلس علمائے شیعہ ضلع جیکب آباد کے صدر علامہ سیف علی ڈومکی، لیاقت علی ٹالانی اور مولانا حیدر علی نے خطاب کیا۔ پروگرام کے اختتام پر شرکاء کے لئے افطار ڈنر کا بھی اہتمام کیا گیا۔

وحدت نیوز (اسلام آباد) چیئرمین مجلس وحدت مسلمین پاکستان علامہ راجہ ناصر عباس جعفری نے عید الفطر کے پرمسرت موقع پر عالم اسلام اور پاکستانی قوم کو مبارکباد پیش کرتے ہوئے اپنے پیغام میں کہا ہے کہ عید سعید کے مقدس ترین موقع پر غرباءو مساکین بالخصوص شہدائے پاکستان کے یتیموں کو یاد رکھیں، عید الفطر رب کریم کی طرف سے امت مسلمہ کے لیے انعام ہے۔ نیک اعمال کے ذریعے اللہ تعالیٰ کی رحمتوں کا شکر بجا لائیں۔ ملک بھر میں ماہ رمضان المبارک کے ایام، اجتماعات اور یوم علی علیہ السلام کا پر امن انعقاد لائق تحسین ہے۔ ہم تب ہی عید منانے کے صحیح حقدار اور سزاوار ہو سکتے ہیں جب ہمارے معاشروں سے سماجی جرائم،برائیوں اور تنگدستی کا خاتمہ ہو جائے۔ مظلوم اور محروم طبقات کو حقوق مل جائیں، معاشرے میں عدل پر مبنی نظام، اسلامی اقدار اور امن و امان کا دور دورہ ہو۔

انہوں نے کہا کہ صاحبِ ثروت افراد کا فطرانہ اور زکوٰۃ سے سفید پوش اور مستحق طبقہ کی مالی امداد کرنا خوشنودی خدا کا باعث ہے، ماہ رمضان کے مقدس مہینے میں مستحقین اور ضرورت مندوں کی داد رسی کرنا افضل ترین عمل ہے۔ پاکستان کے غریب عوام معاشی بدحالی کا شکار ہیں، حالیہ معاشی بحران میں عید کی خوشیوں میں مستحقین اور پریشان حال بھائیوں کا بطور خاص خیال رکھیں، موجودہ حکومت کی ناکام معاشی پالیسیوں اور ہوشربا مہنگائی کی بدولت غریب عوام کے لیے عید کی خوشیاں ماند پڑ گئی ہیں لہذا احترام انسانیت اور ہمدردی کا تقاضا ہے کہ جائز وسائل کو بروئے کار لاتے ہوئے معاشرے کے مفلوک الحال لوگوں کو تکلیف، محرومی اور دکھوں سے نجات دلائی جائے، ضرورت مندوں اور پسے ہوئے افراد کو نظر انداز نہ کریں۔

انہوں نے کہا کہ عید کا دن ہمیں اتحاد جیسے عظیم قرآنی فریضے کی طرف بھی متوجہ کرتا ہے، جس دن سارے مسلمان بلا تفریق قوم ومسلک عید کی خوشیاں مناتے اور ایک دوسرے کو مبارک باد پیش کرتے ہیں۔ یہ موقع وحدت امت مسلمہ کا ایک عظیم مظہر ہے۔ درحقیقت عید کے موقع پر وہ لوگ ہی مبارک باد کے مستحق ہیں جنہوں نے اپنے آپ کو اتحاد جیسےعظیم فریضے کے لئے عملاً پیش کیا ہے، ہم اسلامی طبقات میں اتحاد پیدا کر کے معاشرے کو مسائل و مشکلات سے نجات دلا سکیں،باہمی رنجشوں اور اختلافات کو بھلا کر اخوت ومحبت کے جذبے کو پروان چڑھائیں۔

انہوں نے کہا کہ اس روز سعید کا تقاضا ہے کہ دوسروں کے چہروں پر مسکراہٹیں لائی جائیں۔عید کا دن اپنی بے پناہ برکتوں اور سعادتوں کی وجہ سے خاص اہمیت کا حامل ہے، عید کے دن ایک خاص جشن مسرت ہوتا ہے، یوم تکمیل رحمت خداوندی اور شکر خدا کا دن ہے، میری دعا ہے کہ خداوند متعال ہم سب کو دین اسلام کی تعلیمات پر عمل پیرا ہونے اور ملک وملت کے وسیع تر مفاد میں خلوص نیت کے ساتھ خدمت کرنے کی توفیق عطا فرمائے۔ آمین

وحدت نیوز(اسلام آباد) چیئرمین مجلس وحدت مسلمین پاکستان علامہ راجہ ناصر عباس جعفری نے مفکر پاکستان ڈاکٹر علامہ محمد اقبال ع کے 85 ویں یوم وفات کے موقع پر میڈیا سیل سے جاری اپنے بیان میں قومی شاعر کو خراج عقیدت وسلام پیش کرتے ہوئے کہا ہے کہ حکیم الامت علامہ محمد اقبال ع کی زندگی پوری قوم کے لیے مشعل راہ ہے، آج ہمارے ملک کو درپیش مشکلات کی بڑی وجہ، اس عظیم فلسفی کی حکیمانہ فکر سے دوری اختیار کرنا ہے، علامہ محمد اقبال نے جس فلاحی اور آزاد ریاست کا خواب دیکھا تھا وہ شرمندہ تعبیر نہیں ہو سکا، شاعر مشرق نے اپنی شاعری سے مسلم قوم میں بیداری کی نئی روح پھونک دی، آپ نے اپنے انقلابی کلام سے برصغیر کے مسلمانوں کو جذبہ آزادی اور اجتماعیت کا درس دیا جس میں خودی اور بیداری کا عنصر نمایاں ہے۔ آپ کے دل میں نہ صرف برصغیر کے مسلمانوں کے لیے درد تھا بلکہ پورے عالم اسلام کے لیے تڑپ تھی۔

انہوں نے کہا کہ آج کے نوجوان اگر اقبال ع کے فلسفہ خودی کو سمجھ جائیں اور اپنی بھرپور صلاحیتوں کا استعمال مثبت انداز میں کریں تو یقیناً کامیابی انکا مقدر ہوگی، شاعر مشرق نے ہمیشہ اس بات پر زور دیا کہ مسلمانوں کی بقاء اور تحفظ دراصل رواداری، بھائی چارے اور یگانگت میں مضمر ہے اور انہیں ہمیشہ اس کا ادراک رکھنا چاہیے۔ آپ کی شاعری میں شاہین کا تصور درحقیقت پورے عقل و شعور اور فکر و تدبر کے ساتھ بے، جس میں حریت اور حمیت کا درس پوشیدہ ہے، آج ہمیں بھی اپنے ملک کی تعمیر وترقی اور خوشحالی کے لیے ملی خود مختاری اور آزاد خارجہ و داخلہ پالیسی پر عمل پیرا ہونے کی ضرورت ہے۔

 انہوں نے کہا کہ اقبال ع نے مسلمانوں کو غلامی کی زنجیریں توڑنے کے لیے تمام تر نسلی و لسانی اور فرقہ وارانہ تفریق کو بالائے طاق رکھ کر باہم متحد ہونے کی تلقین کی۔ آج بھی ملکی حالات کا تقاضا ہے کہ علامہ اقبال ع کے فلسفے کو سمجھتے ہوئے وحدت کی فضاء کو قائم رکھنا چاہیے، تاکہ تمام ملک دشمن عناصر اور قوتیں اپنے مذموم مقاصد میں کامیاب نہ ہو سکیں، ہمیں باہمی اتحاد و یگانگت سے اپنی مادر وطن کو امن کا گہوارہ بنانا چاہیے اور اس کی تعمیر و ترقی اور استحکام کے لیے مخلصانہ کاوشوں کو بروئے کار لاتے ہوئے اپنا بھرپور کردار ادا کرنا چاہیے۔

وحدت نیوز(شگر)مجلس وحدت مسلمین شگر کے زیر اہتمام تجلیل قرآن ویوم القدس کانفرنس کا انعقادپروگرام سے صدر مجلس وحدت مسلمین گلگت بلتستان مجاھد ملت آغا سید علی رضوی، صدر مجلس وحدت مسلمین ضلع شگر شیخ کاظم شگری، صوبائی نائب صدر مجلس وحدت مسلمین گلگت بلتستان شیخ اشرف شگری،شیخ محمدجان حیدری،شیخ اختر عباس اور دیگر نے خطاب کیا۔

مقررین نے اپنی تقاریر میں عظمت قرآن اور قرآنی طرز زندگی کی محوریت میں مستضعفین جہاں کی نصرت،خصوصا فلسطین میں موجود مسلمانوں اور القدس کی آزادی کےلئے اپنا رول پلے کرنے پر زور دیااور خطہ کے موجودہ حالات کے تناظر میں ہوشیاری بیداری اور شعور کیساتھ دشمنوں سے مقابلہ کا درس دیا۔گلگت بلتستان میں بیرونی سرمایہ کاری اور تہذیبی اقدار کے خلاف سازشیں قابل غور ہیں جی بی کی باشعور ملت اپنے مثالی معاشرہ کی بقاکےلئے تہذیب وتمدن کو بچانے کی کوشش کریںاور سازشوں کا مقابلہ کریں۔قران مجید اور تعلیمات پیغمبر اکرم صلی اللہ علیہ وآلہ وسلم اور اھلبیت عصمت وطہارت نے ہمیں تمام تر امور میں اجتماعیت کا درس دیاہے۔اجتماعیت میں ہی بشریت کی عزت ہے اور قومی ترقی کے منازل طے کرتی ہیں۔