وحدت نیوز(اسلام آباد)مجلس وحدت مسلمین پاکستان کے زیر اہتمام دو روزہ بقیۃ اللہ تنظیمی و تربیتی شوریٰ عمومی اجلاس جامع امام صادق ؑ اسلام آباد میں منعقد ہوا۔اجلاس کا باقائدہ آغاز تلاوت قرآن کریم سے ہوا جس میں مرکزی کابینہ سمیت ملک بھر سے ضلعی و صوبائی عہدے داران نے شرکت کی ، اجلاس سے استقبالیہ کلمات مرکزی کنوینئر اجلاس ملک اقرار حسین علوی نے ادا کرتے ہوئے تمام شرکاء کو خوش آمدید کہا، بقیۃ اللہ تنظیمی و تربیتی اجلاس کے پہلے سیشن "انس با قرآن" میں مختلف صوبائی و ضلعی شخصیات نے تلاوت قرآن کریم کی سعادت حاصل کی۔ اس کے بعد صوبائی کارکردگی رپورٹس پیش کی گئیں، صوبہ جنوبی پنجاب کے صوبائی جنرل سیکرٹری سید زعیم عباس زیدی،صوبائی جنرل سیکرٹری سندھ چوہدری اظہر حسن، صوبائی جنرل سیکرٹری گلگت بلتستان آغا مشتاق حکیمی، ریاست و آزاد جموں کشمیر ڈاکٹر سید فیصل سبزواری اور وسطی پنجاب کے صدر علامہ علی اکبر کاظمی نے پیش کیں۔

اجلاس کی دوسری نشست "ایمان،تنظیم،یقین محکم" کا آغاز نماز ظہرین کے بعد تلاوت قرآن مجید سے ہوا جس کی سعادت آغا صادق جعفری نے حاصل کی، اس نشست کی کاروائی ڈپٹی جنرل سیکرٹری سلیم عباس صدیقی اور آغا ضیغم عباس نے چلائی، جس سے سربراہ شوریٰ عالی حجت الاسلام المسلمین علامہ صلاح الدین نے تربیت کے عنوان، چیئرمین مجلس وحدت مسلمین پاکستان علامہ راجہ ناصر عباس جعفری نے تنظیم کو مضبوط اور مؤثر کیسے بنائیں کے موضوع، وائس چیئرمین علامہ سید احمد اقبال رضوی نے کردار سازی اور میڈیا کی افادیت و اہمیت پر روشنی ڈالی، اس کے ساتھ مرکزی جنرل سیکرٹری سید ناصر عباس شیرازی، سیکرٹری توسیع تنظیم آغا مقصود ڈومکی، رکن شوریٰ عالی نثار علی فیضی اور ایم ڈبلیو ایم کے پارلیمانی سیکرٹری صوبائی وزیر زراعت میثم کاظم نے تنظیمی و دستوری امور اور تربیتی نکات پر سیر حاصل گفتگو کی۔

اجلاس کے آخر میں سال گذشتہ مرکزی ، صوبائی اور ضلعی سطح پر تنظیم کے مختلف شعبہ جات میں بہترین کارکردگی کا مظاہرہ کرنے والے عہدیداران میں اعزازی اسناد تقسیم کی گئیں۔

وحدت نیوز(اسلام آباد) مجلس وحدت مسلمین پاکستان کے زیر اہتمام منعقدہ شوریٰ عمومی کے دو روزہ بقیتہ اللّٰہ تنظیمی و تربیتی کنونشن ‏کے دوسرے دن کی نشست سے خطاب کرتے چیئرمین مجلس وحدت مسلمین پاکستان علامہ راجہ ناصر عباس جعفری نے کہا ہے کہ قائد اعظم  رح اور علامہ اقبال رح نے مسلم پاکستان کا تصور پیش کیا تھا، مسلکی پاکستان کا نہیں، ہم پاکستان کے اصل وارث ہیں اور ہمارا اسٹینڈ اصولوں کی بنیاد پر ہے، چاہے ہم سے کوئی راضی ہو یا ناراض ہمیں کوئی فرق نہیں پڑتا، ہمیں بس اپنے خدا کی رضا کی فکر ہے، ہم اپنی قومی جدوجہد کےلئے صراطِ مستقیم پر چلتے رہیں گے۔ ہم کسی بھی فرقہ وارانہ محاذ اور چال کا حصہ نہیں بنیں گے اور ہم اپنے ہر پاکستانی کی جان مال اور ناموس کے تحفظ کی خاطر قربانی دیں گے۔

انہوں نے کہا کہ پاکستان کے عوام کی اکثریت کو غلامی قبول نہیں ہے، یہ قوم اب ایک قومی بیانیے پر اکھٹا ہوچکی ہے، آزاد خارجہ وداخلہ پالیسی ہمارے شہید قائد عارف حسین الحسینی رح کا بیانیہ ہے، ہمارے فیصلے ہمارے ملک میں ہونگے کہیں باہر نہیں اور ہماری سر زمین کسی کے خلاف استعمال نہیں ہو گی یہ ہمارے شہید قائد کی آرزو اور آرمان تھا، جس کے ہم وارث اور امین ہیں، ملک میں ایک قوم کی تشکیل کا سفر تیزی سےجاری ہے، ملک کی قسمت کے فیصلے اب عوام اور حقیقی عوامی نمائندے کریں گے۔ مسلکی،علاقائی اور لسانی تقسیم ختم ہو رہی ہے، ہم پر مسلط گھس بیٹھئیے اور ان کے سہولت کاروں نے ملک کو تباہی کے دہانے پر لاکھڑا کیا ہے، جس سے نکلنے کا انکے پاس کوئی راستہ نہیں ہے۔

کانفرنس سے مجلس علماء شیعہ پاکستان کے صدر علامہ حسنین عباس گردیزی،وائس چیئرمین  ایم ڈبلیوایم علامہ سید احمد اقبال رضوی ،مرکزی جزل سیکرٹری سید ناصر عباس شیرازی ، رکن شوریٰ عالی علامہ اقبال حسین بہشتی، سید اسد عباس تقوی، صوبائی صدر خیبرپختونخواہ علامہ جہانزیب جعفری، صوبائی صدر بلوچستان نے بھی خطاب کیا۔

وحدت نیوز(کراچی) مجلس وحدت مسلمین سندھ کے سیکرٹری اطلاعات سید علی احمر زیدی نے صحافت کے عالمی دن پر اپنے بیان میں کہا ہے کہ عوام تک اطلاعات کی رسائی ذرائع ابلاغ کا آئینی حق ہے۔حکومت ، ریاستی اداروں، سیاسی و سماجی حلقوں اور سول سوسائٹی کا فرض ہے کہ میڈیا کی اطلاعات تک رسائی اور عوام تک فراہمی میں بھرپو ر تعاون کریں۔ ہم آزادی صحافت کے بھرپور حامی ہیں اور اس کے ساتھ قومی ، ثقافتی واخلاقی اقدار کی پاسداری کے بھی قائل ہیں۔ میڈیاکا آزادانہ کام کرنا کسی بھی معاشرے کی صحت مندی کا مظہر اور تابناک مستقبل کا ضامن ہے۔اس کی بدولت معاشرے میں جمہوری اقدار فروغ پاتی ہیں اور عوام کی بہتر انداز میں ترجمانی ہوتی ہے لیکن مادر پدر آزاد صحافت سے معاشرے انتشار کا شکا ر ہوتے ہیں۔ ثقافتوں کو نقصان پہنچتا ہے اور بعض عناصر بیرونی ایجنڈے پر کام کرتے ہوئے ملک دشمن عناصر کے لیے کام کرنے لگتے ہیں جس سے قوموں کا انفرادی تشخص اور نظریاتی حدود پر ضرب لگتی ہے۔ جس کی وجہ تخریبی سرگرمیاں جنم لینے لگتی ہیں۔

انہوں نے کہاکہ میڈیا ملک و قوم کی حدودنظریاتی بنیادوں پر استوار رہتے ہوئے اور نظریاتی حدود کی پاسداری کرتے ہوئے آزادانہ کام کرے۔ پاکستان ایک نظریاتی مملکت ہے جس کے بانیان نے اس ملک کو دوقومی نظریے کی بنیاد پر حاصل کیا تھا۔ پاکستان کے قائدین ہمیشہ اسلام کی سربلندی پر یقین رکھتے تھے ۔ انہوں نے برصغیر میں بھی ہندو دھرم کے سیاسی ایجنڈے کے پیش نظر اسلام کے جداگانہ تشخص کے لیے کوششیں کیں۔ اسی طرح قائد اعظم محمد علی جناح، علامہ محمد اقبال اور دیگر اکابرین نے اسرائیل کے قیام پر فلسطین کی حمایت کا اعلان کیا اور تادم مرگ اسرائیل کو تسلیم کرنے سے انکار کیا۔

مجلس وحدت مسلمین بانیان وطن کے نقش قدم پر چلتے ہوئے آج بھی یہ موقف رکھتی ہے کہ آزادی صحافت کی آڑ میں ملک کو اسرائیلی اور صیہونی ایجنڈے کی نذر ہونے سے بچایا جائے۔مجلس وحدت مسلمین اپنے کے قیام سے آج تک جہاں کشمیرمیں ہندتوا کے نام پر بھارتی حکومت کی جارحیت کے خلاف مظلوم کشمیریوں کی حمایت کرتی ہے اسی طرح مقبوضہ فلسطین پر بھی اسرائیل مخالف موقف رکھتی ہے۔ لہذا اسرائیلی ایجنڈے کا پاکستان میں فروغ ہماری ریڈلائن ہے جس پر کسی قیمت پر سمجھوتا ممکن نہیں ہے۔ خواہ وہ آزادی صحافت کے لبادہ میں ہو یا کسی بھی طریقے سے اسے قطعی قبول نہیں کیا جاسکتا۔حکومت سے مطالبہ کرتے ہیں کہ ایسے صحافی جو حب الوطنی پر فرائض انجام دے رہیں ۔ ان کے لیے نہ صرف سازگار پیشہ ورانہ ماحول قائم کیا جائے بلکہ ان کی زیادہ سے زیادہ معاشی اعانت کی جائے۔آزادی صحافت کے عالمی دن کے موقع پر سڑکوں کی خاک چھان کر اور جان ہتھیلی پر رکھ کرعوام کو اطلاعات تک رسائی فراہم کرنے والے صحافی اور مدیران کو بھی خراج تحسین پیش کیا۔

وحدت نیوز(اسلام آباد)عالمی یوم آزادی صحافت کے موقع پر چیئرمین مجلس وحدت مسلمین پاکستان علامہ راجہ ناصرعباس جعفری حفظ اللہ نے اپنے پیغام میں کہا ہے کہ آزاد صحافت کی لاج رکھنے والے صحافیوں کو سرخ سلام پیش کرتے ہیں، آزادی صحافت کا دن منانے کا مقصد صحافیوں کو پیشہ ورانہ فرائض کی بجا آوری میں مشکلات کم ہوں، معاشرے کے حقیقی مسائل کو اجاگر کرنے میں کوئی قدغن نہ ہو، آزادی صحافت کی پاسداری کے دعوے بہت لیکن عمل کم ہے ۔

انہوں نے کہا کہ حکومتی ومیڈیا مالکان کے مفادات پر سمجھوتہ کرنے کا صحافتی روش نامناسب ہے، شعبہ صحافت سے وابستہ افراد کو دھمکیوں اور لاحق خطرات سے محفوظ رکھنے کے لیے آج تک کیا عملی اقدامات اٹھائے گئے ہیں، پاکستان میں یہ خطرہ اب صرف صحافیوں کو نہیں بلکہ سوشل میڈیا کے آنے سے بلاگرز اور یوٹیوبرز بھی اس کی زد میں ہیں، آزادانہ اور تخلیقی صلاحیتوں والے صحافیوں کے لیے تو پاکستان انتہائی خطرناک ملک ہے، جو کہ عالمی سطح پر ملکی حوالے سے افسوسناک اور منفی پہلو ہے۔

وحدت نیوز(اسلام آباد)مجلس وحدت مسلمین پاکستان کی مرکزی تنظیم سازی کونسل کا اہم اجلاس علامہ مقصود علی ڈومکی کی زیر صدارت اسلام آباد میں منعقد ہوا۔ اجلاس میں سندھ، بلوچستان، پنجاب، جنوبی پنجاب، خیبرپختونخوا، ریاست کشمیر اور جی بی کے صوبائی مسوولین شریک ہوئے۔ اجلاس میں ایم ڈبلیو ایم ریاست کشمیر کے صدر علامہ سید یاسر سبزواری نے خصوصی طور پر شرکت کی۔

 اجلاس میں شعبہ تنظیم سازی کی گذشتہ چار ماہ کی کارکردگی کا جائزہ لیتے ہوئے آئندہ کا لائحہ عمل تیار کیا گیا۔ اس موقع پر اجلاس سے خطاب کرتے ہوئے علامہ مقصود علی ڈومکی نے کہا کہ مجلس وحدت مسلمین وطن عزیز پاکستان کے مظلوموں اور محروموں کی امیدوں کا مرکز ہے۔

مضبوط تنظیم ہی کے ذریعے ملت کے دکھوں کا مداوا ممکن ہے۔ انہوں نے کہا کہ کارکنوں کی تنظیمی تربیت ترجیحات میں شامل ہے۔ اس سلسلے میں دستور اور کتاب رہنمائے مسوولین کا ہر سطح پر مطالعہ اور اسٹڈی سرکلز کا انعقاد یقینی بنایا جائے گا۔ اس موقع پر فیصلہ کیا گیا کہ آئندہ تین ماہ کے دوران مرکزی سیکرٹری تنظیم صوبہ پنجاب، خیبرپختونخوا، گلگت بلتستان اور ریاست کشمیر کا تنظیمی دورہ کریں گے۔ اجلاس نے فیصلہ کیا کہ پاکستان بھر کے تمام صوبوں میں ضلعی شوریٰ کے دوسرے دستوری اجلاس جلد مکمل کئے جائیں گے۔

وحدت نیوز(اسلام آباد)مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے عالم اسلام کے مایہ ناز مفکر فلاسفر اور فقیہ حضرت آیت اللہ شہید مرتضٰی مطہری رحمۃ اللہ علیہ کے یوم شہادت اور یوم معلم کے موقع پر کہا ہے کہ شہید مرتضی مطہری نے جدید دور کے تقاضوں سے ہم آھنگ دین اسلام کی تشریح کی۔ ان کے افکار و تعلیمات نوجوان نسل کے لئے رہنماء ہیں۔ حوزہ علمیہ کے ممتاز و بیدار علماء جنہوں نے یونیورسٹیز کے طلباء کی درست سمت میں رہنمائی کرتے ہوئے دین مقدس اسلام کی حقیقی تعلیمات کو نئی نسل کے ذہنوں میں راسخ کیا، ان میں آیت اللہ شہید مرتضٰی مطہری، آیت اللہ سید محمد باقر الصدر، شہید آیت اللہ سید محمد حسین حسینی بہشتی اور آیت اللہ شہید مفتح جیسی شخصیات کی علمی خدمات ناقابل فراموش ہیں۔ جنہوں نے مدارس دینیہ اور یونیورسٹیز کے درمیان فاصلوں کو کم کرتے ہوئے عصری تقاضوں کے مطابق دین کی درست تشریح کی۔

علامہ مقصود علی ڈومکی نے کہا کہ شہید مرتضٰی مطہری رحمۃ اللہ علیہ کے افکار انقلاب اسلامی کی نظریاتی اساس ہیں۔ شہید مرتضٰی مطہری کی کتابوں کا مطالعہ آج بھی نوجوان نسل کی حقیقی اسلام سے آشنائی کا باعث ہیں۔ بہترین انداز بیان، اعلیٰ علمی مقام اور عصری تقاضوں اور ضروریات کی درست تشخیص کے سبب نصف صدی گزر جانے کے باوجود شہید مرتضٰی مطہری کا عالم اسلام میں کوئی ثانی نظر نہیں آتا۔ ان کی شہادت سے جو خلا پیدا ہوا، اسے آج تک پر نہیں کیا جا سکا۔ شہید مرتضٰی مطہری رحمۃ اللہ علیہ کے افکار و کردار میں حضرت امام خمینی رحمۃ اللہ علیہ کی شخصیت کا عکس نظر آتا تھا۔ وہ رہبر کبیر حضرت امام خمینی رحمۃ اللہ علیہ کے مورد اعتماد شاگرد تھے۔ جنہیں قائد شہید علامہ عارف حسین الحسینی کی طرح رہبر کبیر نے اپنا فرزند قرار دیا تھا۔