وحدت نیوز(گلگت)صوبائی وزیر زراعت و پارلیمانی لیڈر مجلس وحدت مسلمین گلگت بلتستان محمد کاظم میثم اور صوبائی وزیر تعمیرات عامہ وزیر محمد سلیم کی سربراہی میں سکردو میں جاری بجلی بحران پر ایک اعلیٰ سطح اجلاس واٹر اینڈ پاور کمپلیکس جی بی میں منعقد ہوا۔ اجلاس میں محکمہ برقیات گلگت بلتستان، جی بی آر ایس پی اور ناروے کی بجلی پیدا کرنے والی کمپنی کے ذمہ داران شریک تھے۔

اجلاس میں گلگت بلتستان بلخصوص سکردو شہر میں جاری آئے روز بڑھتی لوڈشیڈنگ کی روک تھام کے لیے قلیل المیعاد اور طویل المیعاد بنیادی طور پر اٹھائے جانے والے اقدامات پر تفصیلی بریفنگ ہوئی۔ اس سلسلے میں سکردو شہر میں کمرشل ضروریات پوری کرنے کے لیے سولر کی تنصیب اور اس پر جاری سروے کے حوالے سے بات ہوئی۔ اس سلسلے میں رواں سال سولر پر کام کرنے کے لیے اقدامات اٹھانے کے حوالے سے گفتگو ہوئی۔

محکمہ برقیات کی بریفنگ پر ناروے کی ہائیڈرل پاور کمپنی نے سکردو میں دریائے سندھ پر بجلی گھر بنانے کے لیے سروے کرنے اور کچورا فیز تھری کی کیپسٹی بڑھانے کے لیے رضامندی کا اظہار کیا۔ اس موقع پر صوبائی وزرا نے کہا کہ صوبائی حکومت تمام بیرونی سرمایہ کاروں کو رن آف دی ریور پر ہائیڈرو پاور ہاوسز بنانے کے لیے نہ صرف معاونت کرے گی بلکہ بھرپور حوصلہ افزائی کرے گی۔

اس موقع پر صوبائی وزراء نے سیکرٹری واٹر اینڈ پاور کو شغرتھنگ پاور پروجیکٹ، غواڑی پاور پروجیکٹ اور ہرپو پاور پروجیکٹ پر کام تیز کرنے اور وفاق سے ریلیز کو فالو اپ کرنے کی ہدایات بھی کیں۔ محکمہ برقیات کی پوری ٹیم نے اس عزم کا اظہار کی کہ سکردو اور گلگت شہر میں جاری لوڈشیڈنگ پر فوری قابو پانے اور مستقبل میں بجلی کی فراہمی کو یقینی بنانے کے لیے ہرممکن کوشش کرے گی۔

وحدت نیوز(نارووال) صدر مجلس وحدت مسلمین پنجاب علامہ علی اکبر کاظمی کا جنرل سیکرٹری پنجاب سید حسن کاظمی کے ہمراہ دورہ نارووال. ضلعی صدر نارووال منیر شیرازی نے کابینہ کے ہمراہ استقبال کیا۔

ضلعی عہدیداروں سے ملاقات کے دوران علامہ علی اکبر کاظمی نے کہا کہ قائد وحدت علامہ راجہ ناصر عباس جعفری کی آفاقی فکر کو سمجھتے ہوئے اُن کے بتائے ہوئے راستے پر صبر و استقامت کے ساتھ عملی اقدامات کرنے کی اشد ضرورت ہے۔

 قائد اعظم محمد علی جناح اور مفکر پاکستان ڈاکٹر محمد اقبال کے پاکستان کے حصول کیلئے تمام کارکنان اپنی خدمات پیش کریں۔

وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے ژوب میں امیر جماعت اسلامی سراج الحق پر خود کش حملے کو افسوسناک قرار دیتے ہوئے اس کی مذمت کی ہے اور حملے میں زخمی ہونے والے جماعت اسلامی کے کارکنان کی جلد صحت یابی کیلئے دعا کی ہے، ملک دشمن عناصر اپنے مذموم مقاصد میں کبھی کامیاب نہیں ہونگے، بدقسمتی سے ملک میں اس وقت دہشت گرد آزاد اور نہتی عوام سے دہشت گردوں والا سلوک کیا جا رہا ہے، ملک کو سیاسی معاشی اور امن و امان کے چیلنجز کا سامنا ہے، بزدلانہ کارروائی میں ملوث دہشت گرد اور ان کی پشت پناہی کرنے والے کسی بھی رعایت کے مستحق نہیں ہیں۔

انہوں نے کہا کہ اس دہشت گردانہ کارروائی میں پاک ایران سربراہان مملکت کی حالیہ ملاقات کے تناظر میں بیرونی ہاتھ کے ملوث ہونے کو نظر انداز نہیں کیا جا سکتا، حملے میں ملوث نیٹ ورک کو بے نقاب کیا جائے اور تمام تر منصوبہ سازوں کو کیفرِ کردار تک پہنچانے میں کوئی کسر اٹھا نہ رکھی جائے، ملکی حالات اس امر کے متقاضی ہیں کہ آئین وقانون کی عملداری کو یقینی بنایا جائے، سیاسی و انتقامی کارروائیاں ملکی سالمیت کے لیے کسی صورت مناسب نہیں، پرامن سیاسی و مذہبی رہنماؤں کی سرگرمیوں پر خود کش حملے ملک کو افراتفری میں دھکیلنے کی سازش ہے۔

وحدت نیوز(گلگت ) ہمسایہ ملک چین کے گلگت بلتستان سے چیری درآمد کرنے کے لیے آنے والے کاروباری وفد نے وزیرزراعت گلگت بلتستان کاظم میثم سے ایڈیشنل سیکرٹری ایگریکلچر حسین علی اور محکمہ زراعت کے افسران کے ہمراہ ایگریکلچر کمپلیکس میں ملاقات کی۔ اس موقع سے چین سے آنے والے وفد کو گلگت بلتستان آمد پر خیرمقدم کیاگیا۔

 انہوں نے گلگت بلتستان میں موجود ایگریکلچر کی پوٹینشنلز پر بریفنگ دی اور یہاں کی تمام اہم پیدوار پر تفصیلی گفتگو کی۔ وزیرزراعت گلگت بلتستان نے خوبانی اور شہتوت کی پروسسنگ اور ویلیو ایڈیشن کے لیے چائینہ کی ٹیکنالوجی کو متعارف کرانے اور اس سلسلے میں چیمبر آف کامرس اور دیگر لوکل سرمایہ کاروں کے ساتھ ملکر تجارتی سرگرمیوں کو آگے بڑھانے پر زور دیا۔

 اس موقع پر چینی وفد نے گلگت بلتستان گورنمنٹ کی طرف سے بھرپور تعاون پر شکریہ ادا کیا۔ انہوں نے اس عزم کا اعادہ کیا کہ سال رواں چیری کو اچھی قیمت پر چین میں درآمد کیا جائے گا ۔

انہوں نے مزید کہا کہ فوڈ پروسیسنگ اور ویلیو ایڈیشن بلخصوص آلو کی بائیو پروڈکس، خوبانی کی پروسیسنگ اور بائی پروڈکس، شہتوت کی پروسیسنگ سمیت دیگر اہم پیداوار کی پروسسنگ اور ویلیو ایڈیشن کے لیے پائلٹ پروجیکٹ کا آغاز کیا گیا۔

وحدت نیوز(گلگت)صوبائی وزیر زراعت گلگت بلتستان کاظم میثم کی سربراہی میں ایم ڈبلیو ایم جی بی کے وفد نے سیکرٹری واٹر اینڈ پاور سجاد حیدر سے بجلی بحران کے حل کے لیے جاری اقدامات پر تفصیلی بریفنگ لی۔ اس موقع پر صوبائی وزیر زراعت نے کہا کہ سکردو شہر اور گلگت شہر میں بجلی کے بحران کے سبب پینے کے پانی کے بھی شدید مسائل آ رہے ہیں۔ ندی نالوں میں پانی نہ اترنے اور سدپارہ ڈیم میں پانی کی سطح کم ہونے کے سبب شدید مشکلات کا شکار ہے۔ فوری طور پر ان مسائل کے حل کے لیے اقدامات نہ اٹھائے گئے تو بحران میں اضافہ ہو جائے گا۔

 اس موقع پر سیکرٹری واٹر اینڈ پاور نے کہا کہ ملکی صورتحال کے سبب جس کمپنی نے سکردو کے لیے 30 میگاواٹ بجلی فراہم کرنی تھی انکی سرگرمی بھی تعطلی کی شکار ہیں۔ انہوں نے کہا کہ وزیراعلٰی کی ہدایات پر سکردو شہر میں سولر کی تنصیب کے لیے فزیبلٹی پر کام جاری ہے تاکہ کمرشل صارفین کے لیے دن کے وقت بجلی کی فراہمی یقینی ہو۔

 انہوں نے اس بات کی بھی یقین دہانی کرائی کہ رواں اے ڈی پی میں پاور ہاوسز کی بحالی اور نئے پاور ہاوسز کی تعمیر کے حوالے سے اقدامات اٹھائے جائیں گے۔ایم ڈبلیو ایم وفد میں رکن جی بی کونسل و پولیٹیکل سیکریٹری مجلس وحدت مسلمین گلگت بلتستان شیخ احمد علی نوری،رکن اسمبلی و ضلعی صدر ایم ڈبلیو ایم شیخ اکبر رجائی،صوبائی رہنما ایم ڈبلیو ایم غلام عباس اور کاچو ولایت ہمراہ تھے۔

وحدت نیوز(کراچی) مجلس وحدت مسلمین پاکستان کراچی ڈویژن کے پولٹیکل سیکرٹری علامہ مبشر حسن نے شہر قائد میں لوٹ مار کی بڑھتی وارداتوں پر گہری تشویش کا اظہار کرتے ہوئے کہا ہے کہ سڑکوں پر دندناتے جرائم پیشہ افراد کی بڑھتی ہوئی وارداتوں سے شہری عدم تحفظ کا شکار ہیں۔

 ان خیالات کا اظہار انہوں نے وحدت ہاؤس انچولی میں پولیٹیکل کونسل کے اجلاس کے سربراہی خطاب میں کیا۔ اجلاس میں مولانا حیات عباس، رضی حیدر رضوی، یعقوب شہباز، آصف صفوی، زین رضا سمیت دیگر ارکین موجود تھے۔

علامہ مبشر حسن نے کہا کہ لوٹ مار، قتل کی یومیہ اور ماہانہ وارداتیں نیا ریکارڈ قائم کر رہی ہیں، اسٹریٹ کرائم کی یومیہ وارداتوں میں روز بروز اضافہ ہوتا جارہا ہے۔

 انہوں نے کہا کہ ملکی موجودہ حالات، سیاسی عدم استحکام، معاشی بحران، قدرتی آفات، بے پناہ مہنگائی، بنیادی سہولیات کی عدم فراہمی نے عوام کی کمر توڑ دی ہے تو دوسری جانب عوام اسٹریٹ کرائم کے عذاب میں مبتلا ہے۔

علامہ مبشر حسن نے مزید کہا کہ سڑکوں پر دندناتے اسٹریٹ کرمنلز کے ہاتھوں شہریوں کی قیمتی جانیں جارہی ہیں، رہزنی، اغوا برائے تاوان، بھتہ خوری اور ڈاکوؤں کے ہاتھوں شہریوں کا قتل عام ہورہا ہے، لوٹ مار کی وارداتیں پچھلی تمام حدیں پار کررہی ہیں اور جرائم کی روک تھام کے لئے قانون نافذ کرنے والے ادارے پولیس، رینجرز و دیگر بے بس دکھائی دے رہے ہیں۔

انہوں نے کہا کہ اسٹریٹ کرائم کے روک تھام کیلئے سکیورٹی ادروں کی حکمت عملی کا گراف ڈاؤن ہے، ہر ماہ کے اختتام پر سی پی ایل سی کی رپورٹ جاری کر دی جاتی ہے جو قانون نافذ کرنے والے اداروں کی کارکرگی کی قلعی کھولنے کیلئے کافی ہے۔

 انہوں نے کہا کہ سندھ حکومت متعلقہ ادارے مسلح ڈکیتیوں اور دیگر جرائم کی روک تھام کرے، جرائم پیسہ افراد کے خلاف قانون سازی کرکے سخت سے سخت سزائیں دی جائیں۔