وحدت نیوز (مشہدمقدس) مجلس وحدت مسلمین کے سیکرٹری جنرل برائَے مشہد حجتہ الاسلام عقیل حسین خان نے گزشتہ روز شام میں حضرت زینب سلام اللہ علیھا کے روضے مبارک پر ہونے والے حملے کی شدید مذمت کرتے ہوئے کہا ہے کہ شام میں جاری لڑائی میں دشمن اسلام کھل کر شعائراللہ کو نقصان پہنچانے کی مسلسل کوشش کررہا ہے لیکن خدا کا وعدہ ہے وہ ہمیشہ باقی رہیں گے۔

ایم ڈبلیو ایم مشہد کے سیکرٹری جنرل کا کہنا تھا کہ صدر اسلام سے دشمن کسی نہ کسی صورت میں اپنے ناپاک عزائم کے ساتھ سرگرم ہے لیکن ہر دور کے یزید کے مقابلے کوئی نہ کوئی حسینی برسر پیکار رہا ہے۔ اُنہوں نے کہا کہ شام کی لڑائی میں بعض عرب ممالک اسلام دشمنی کا ثبوت دیتے ہوئے شعائر اللہ کی حرمت کو پامال کرنے کے درپے ہیں جن سے اُن ممالک کی اصلیت سامنے آگئی ہے۔ شام میں ہونے والی دہشت گردی نے ایک بار پھر یزیدیت کو بے نقاب کردیا ہے۔