وحدت نیوز (قم المقدسہ)مجلس وحدت مسلمین پاکستان شعبہ قم کی جانب محرم الحرام کے پہلے عشرہ میں عزاداری امام حسین علیہ السلام کا اہتمام کیا گیا ہے۔ اس سلسلے میں مدرسہ امام خمینی (رہ) میں مجالس عزا کا انعقاد کیا جا رہاہے۔ مجلس عزا سے حجت الاسلام والمسلمین ڈاکٹر شیخ حسنین عباس نادر اور حجت الاسلام والمسلمین سید نوید حیدر تقوی خطاب فرما رہے ہیں۔ مجلس کے بعد ماتم داری اور نذر امام حسین علیہ السلام کا اہتمام کیا جاتا ہے۔ یہ مجالس یکم محرم الحرام سے عاشور تک جاری رہیں گی۔ ڈاکٹر شیخ حسنین عباس نادر قرآن و سنت کی رو سے نظام امامت اور اس موضوع پر ہونے والے اشکالات کے مدلل جوابات کا جائزہ لیں گے۔ انہوں نے اپنی دوسری مجلس میں فخر رازی کی جانب سے ہونے والے متعدد اشکالات کو بیان کیا اور قرآن و تفسیر کی رو سے ان کے جوابات دیئے۔ حجت الاسلام و المسلمین سید نوید حیدر تقوی نے دور حاضر میں جدید ذرائع ابلاغ کے ذریعے تبلیغ اور پیغام رسانی پر زور دیا اور کہا کہ جس طرح امام حسین علیہ السلام نے اپنی تحریک کے دوران اپنے پیغام کو پہنچانے کا بندوبست کیا تھا، اسی طرح آپ کی زندگی سے درس لیتے ہوئے آج بھی یہ تمام پیروان راہ حسین علیہ السلام کی ذمہ داری بنتی ہے کہ وہ آپ کے پیغام کو جہاں تک ممکن ہو پہنچائیں۔ انہوں نے مزید کہا کہ انقلاب کے دوران شخصیت اور نظریہ بہت اہمیت کا حامل ہے۔ شخصیت کے صحیح اور بروقت فیصلے حالات کے رخ کو بدل دہتے ہیں اور اگر نظریہ نہ ہو تو انقلاب کامیاب نہیں ہوسکتا۔