وحدت نیوز(قم المقدسہ) مجلس وحدت مسلمین پاکستان شعبہ قم کے سیکرٹری جنرل علامہ غلام محمد فخرالدین نے کہا ہے کہ علامہ عباس کمیلی کے فرزند علامہ علی اکبر کمیلی کی شہادت نے سندھ حکومت کے قیام امن کے دعوں کی قلعی کھول دی، سندھ حکومت اور قانون نافذ کرنے والے ادارے شہر قائد میں دہشت گردی کی روک تھام میں مکمل طور پر ناکام ہوچکے ہیں، مدارس کے نام پر قائم دہشتگردی کے مراکز شہریوں کے لئے ناسور بن چکے ہیں۔ کراچی میں شیعہ ٹارگٹ کلنگ کے حالیہ سانحہ کی شدید مذمت کرتے ہوئے ایم ڈبلیو ایم قم کے سیکرٹری جنرل کا کہنا تھا کہ علامہ علی اکبر کمیلی کی شہادت حکومتی ناکامی کا منہ بولتا ثبوت ہے۔ کراچی میں آئے روز ایک منظم سازش کے تحت اہل تشیع ٹیچرز، اسکالرز، ڈاکٹرز اور انجینئرز کو ٹارگٹ کیا جا رہا ہے، علامہ علی اکبر کمیلی کا قتل بھی اسی سازش کا حصہ ہے۔ علامہ غلام محمد فخرالدین نے حالیہ واقعہ پر انتہائی دلی افسوس و رنج کا اظہار کرتے ہوئے کہا کہ علامہ علی اکبر کی شہادت کی ذمہ دار سندھ حکومت ہے۔ حکومت اور سکیورٹی اداروں کو دہشت گردی کی روک تھام کے لئے عملی اقدامات کرنا ہونگے اور علی اکبر کمیلی کے قاتلوں کو فی الفور گرفتار کرکے قرار واقعی سزا دی جائے۔