وحدت نیوز(مظفرآباد)مجلس وحدت مسلمین آزاد کشمیر کے زیرِ انتظام القدس کانفرنس کا انعقاد،مختلف تنظیموں کے نمائندگان کی شرکت، مرکزی سیکرٹرل جنرل سید ناصر شیرازی نے ملٹی میڈیا کے ذریعے خطاب کیا، کانفرنس میں اسرائیلی مظالم کی مذمت کرتے ہوئے مقررین نے قبلہ اول کی آزادی کے لیے بھرپور کوششیں کرنے کے عزم کا اظہار کیا۔ تفصیلات کے مطابق مجلس وحدت مسلمین آزاد کشمیر کے زیرِ انتظام وحدت ہاؤس مظفرآباد میں القدس کانفرنس کا انعقاد کیا گیا۔
اس کانفرنس میں تمام تنظیمات کے نمائندہ گان نے شرکت کی، کانفرنس سے سیکرٹری جنرل مجلس وحدت مسلمین پاکستان سید ناصر عباس شیرازی نے ملٹی میڈیا کے ذریعے خطاب کرتے ہوئے کہا کہ ظلم چاہے فلسطین میں ہو یا کشمیر میں، ہم مظلوموں کی حمایت کرنے والے اور ظالموں سے نفرت کرنے والے ہیں۔
کانفرنس سے صدر مجلس وحدت مسلمین آزاد کشمیر علامہ ڈاکٹر سید یاسر عباس سبزواری نے خطاب کیا جس میں انہوں نے اسرائیل کی سازشوں پر روشنی ڈالی،ان کا کہنا تھاکہ اسرائیل عالم اسلام کے قلب پر خنجر کی مانند ہے لہٰذا تمام امت مسلمہ کو متحد ہو کر اس غاصب حکومت کے خلاف قیام کرنا چاہیے۔