وحدت نیوز (سکردو) ایم ڈبلیو ایم کے نامزد امیدوار حلقہ 5کھرمنگ ڈاکٹر شجاعت میثم نے کہا ہے کہ کھرمنگ کے عوام کوجھوٹے ضلع اور کالج کے نام پرگمراہ اور بیوقوف بنایا جارہا ہے۔ عوام اب باشعور ہوچکا ہے اور کسی ایسے جھوٹے اعلانات اور وعدوں پر یقین نہیں کرینگے۔اور کھرمنگ سے مورثی سیاست کو ختم کریں گے۔کھرمنگ کی عوام کو گذشتہ دو دہائیوں سے دو افراد کی بالادستی اور اقتدار کی خاطر آپس میں دست و گریباں کیا جارہا تھا۔ایم ڈبلیو ایم نے میدان سیاست میں آکر ان بتوں کو توڑا ہے اور عوام کی بالادستی کو یقینی بنانے غریب اور متوسط طبقوں کی نمائندگی کیلئے عوام کی آواز بنیں گے۔اور کھرمنگ کی عوام اور علاقے کی محرومیوں کا ازالہ کرینگے۔کھرمنگ کی عوام جھوٹے نعرے اور اعلانات کرنے والوں کو مسترد کرتے ہوئے عوامی پارٹی کو مضبوط کریں گے۔