وحدت نیوز(کوئٹہ) 6ستمبر یوم دفاع کے موقع پر عسکری پارک کوئٹہ میں دفاعی نمائش کا انعقاد کیا گیا۔ دفاعی نمائش کا افتتاح کمانڈرساؤدرن کمانڈ، جنرل ناصرخان جنجوعہ نے کیا، جبکہ میزبانی کے فرائض میجر جنرل آفتاب خان نے انجام دئیے۔ دفاعی نمائش کے موقع پر میڈیا سے گفتگو کرتے ہوئے علامہ مقصود علی ڈومکی نے کہاکہ ہم یوم دفاع کے موقع پر پاک وطن کے بہادر فوجی جوانوں کو سلام پیش کرتے ہیں، جو پاک وطن کی سربلندی اور دفاع کے لیے ملک دشمن ،عوام دشمن اور اسلام دشمن دھشت گردوں کے خلاف بر سرپیکار ہیں۔ پاک وطن کے باوفا بیٹے اپنی بہادر افواج کے ساتھ مل کر ،دشمنوں کا مقابلہ کریں گے۔ ہم آپریشن ضرب عضب کی کامیابی کے لئے دعاگو ہیں اور پاک فوج کو مکمل تعاون کایقین دلاتے ہیں۔انہوں نے کہا کہ ہم پاک وطن کے شہداء کو سلام عقیدت پیش کرتے ہیں۔ اور ان مجاہدوں کو بھی سلام پیش کرتے ہیں جو دھشت گردوں کے خلاف بر سر پیکار ہیں۔