وحدت نیوز (کوئٹہ ) مجلس وحدت مسلمین بلوچستان کے سیکریٹری جنرل علامہ مقصود علی ڈومکی، صوبائی رہنما سہیل اکبر شیرازی و دیگر نے فیصل آباد میں تحریک انصاف کے کارکن کے قتل پر گہرے رنج و غم کا اظہار کرتے ہوئے کہا ہے کہ نواز لیگ کی جانب سے پر امن احتجاج کے خلاف اقدامات غیر دانش مندانہ عمل ہے۔رانا ثناء اللہ پر تحریک انصاف کی قیادت نے جو الزام عائد کئے ہیں ان کی غیر جانبدارانہ تحقیقات کی جائیں۔ کیونکہ رانا ثناء اللہ ماضی میں بھی دھشت گردوں کا حامی اور طرفدار رہا ہے۔نواز شریف اور شھباز شریف رانا ثناء اللہ جیسے افراد سے محتاط رہیں۔
انہوں نے کہا کہ حکومت اور تحریک انصاف کو مذاکرات کی میز پر بیٹھنا ہوگا۔حکومت کی طرف سے مذاکرات میں تاخیر اور مذاکرات سے متعلق غیر سنجیدہ رویہ سے ملک میں کشیدگی بڑھے گی۔در ین اثناء علامہ مقصود علی ڈومکی سے وحدت اسکاوٹس بلوچستان کے عبد الوھاب لغاری اور منصب علی براہوی نے ملاقات کی اور انہیں ۳ روزہ پیام امن صوبائی اسکاوٹس کیمپ کے پروگرام کی تفصیلات سے آگاہ کیا۔اس موقع پر گفتگو کرتے ہوئے علامہ مقصود علی ڈومکی نے کہا ہے کہ وحدت اسکاوٹس کے جوانوں نے وطن عزیز میں عوامی خدمت کرتے مختلف دینی و سیاسی اجتماعات میں قابل قدر خدمات انجام دی ہیں۔بلوچستان میں اسکاوٹس کی روحانی ،اخلاقی و عملی تربیت کیلئے صوبائی اسکاوٹس کیمپ کا انعقاد خوش آئند عمل ہے۔