وحدت نیوز (جعفرآباد) آل ڈومکی ویلفیئر ایسوسی ایشن ضلع جعفر آبادکے زیر اہتمام بلوچی ثقافتی دن کے موقع پر تقریب کا اہتمام کیا گیا۔ تقریب کے مہمان خاص ڈپٹی کمشنر جعفر آبادجاوید انورشاہوانی، جبکہ اعزازی مہمان مجلس وحدت مسلمین بلوچستان کے صوبائی سیکریٹری جنرل علامہ مقصود علی ڈومکی، میر فیاض علی ڈومکی اور نیشنل پارٹی کے رہنماء عبدالرسول بلوچ تھے۔

ثقافتی تقریب سے خطاب کرتے ہوئے علامہ مقصود علی ڈومکی نے کہا کہ بہادری، مہمان نوازی، احترام نسواں ، مذہبی رواداری اور عشق آل رسولﷺ بلوچ قوم کے نمایاں امتیازی پہلو ہیں۔ بلوچی دفتر شعر کے مطابق از حلب پاد کھایوں ، گو یزیدا جھیڑویں ما مریدوں یا علی مئے دین و ایماں ثیوتیں ۔ یہ اشعار بلوچوں کے عشق اہل بیت ؑ کی عکاسی کرتے ہیں۔

انہوں نے کہا کہ دشمن نے ایک سازش کے تحت بلوچستان سے اس کا امن چھین لیا ہے، جبکہ جان بوجھ کر دھشت گردی اور مذہبی منافرت کو بلوچستان میں فروغ دیا جارہا ہے۔ بلوچستان کے عوام اپنی سرزمین اور ثقافت پہ دشمن کی یلغار کو ناکام بناتے ہوئے بلوچستان کے امن اور ترقی کو اہمیت دیں۔ تعلیم کے بغیر ترقی ممکن نہیں لہذا ہمیں پڑھا، لکھا بلوچستان تعمیر کرنا ہے۔

اس موقع پر تقریب سے ڈپٹی کمشنر جاوید انورشاہوانی، کاشف نبی، ڈومکی ویلفیئر کے ضلعی صدر مور خان ڈومکی، سردار گبول، ودیگر نے بھی خطاب کیا۔ اس موقع پر گلبہار ٹالانی نے علامہ مقصود علی ڈومکی کو بلوچی دستار پہنائی۔