وحدت نیوز(کوئٹہ) مجلس وحدت مسلمین بلوچستان کے سیکریٹری جنرل علامہ مقصود علی ڈومکی نے عشرہ محرم کے سلسلے مین منعقدہ مجلس عزاء سے خطاب کرتے ہوئے کہا ہے کہ محرم تلوار پر خون کی فتح کا مہینہ ہے ، نواسہ رسول ﷺ امام حسین ؑ عالی مقام نے باطل یزیدی نظام کے خلاف قیام کر کے تا ابد اہل حق کو جرات اور استقامت کا درس دیا ، امت مسلمہ اسوہء شبیری اپنا کر عصر حاضر کی یزیدیت کو شکست دے سکتی ہے۔ کربلا اہل حق کی درسگاہ اور حریت و شجاعت کی علامت ہے۔ آپ ؑ حضرت ابراہیم خلیل اللہؑ کے وارث تھے لہٰذانمرود وقت سے مصالحت و مفاہمت کر نا آپ کے لیے ممکن نہیں تھا ۔
انہوں نے کہا آج پھر ہمیں اسوہ ء حسینی کو اپناکر اسلام دشمن سامراجی قوتوں کا مقابلہ کرنے کی ضرورت ہے۔ عزاداری تحریک کربلا کا تسلسل ہے۔ عزاداری یزیدیت کے خلاف ابدی تحریک کا نام ہے، عزاداری کربلا والوں سے تجدید عہد کا پیغام ہے۔ جبکہ محرم کا مہینہ اور نواسہ رسول ﷺ کی ذات گرامی امت مسلمہ کے لیے نقطہ وحدت و اتحاد ہے۔ امت مسلمہ کربلا والوں کے نقش قدم پر چلتے ہوئے دور حاضر کی یزیدیت کے خلاف میدان عمل میں نکل آئے۔
انہوں نے کہا کہ ملک میں جاری دہشت گردی کا سبب مذہبی نہیں سیاسی ہے، امریکہ و اسرائیل اپنے سامراجی اہداف کے لئے فرقہ وارانہ نفرتوں کو ہوا دے رہا ہے۔ فرقہ وارانہ دہشت گردی میں امریکی سفارتخانوں کا کیا کردار ہے اسے واضح کیا جائے۔