وحدت نیوز (پشاور) مجلس وحدت مسلمین خیبر پختو نخوا کے رہنماء علامہ سید عامر حیدر شمسی نے قصہ خوانی دھماکہ کی شدید الفاظ میں مذمت کرتے ہوئے کہا ہے کہ حکمرانوں کی ملک اور عوام دشمن پالیسیوں کی وجہ سے آئے روز بے گناہ افراد کا خون ناحق بہہ رہا ہے۔ عمران خان کو طالبان کا دفتر کھولنے کا اتنا ہی شوق ہے تو اب قصہ خوانی میںان بے گناہ شہریوں کی جائے شہادت پر ان کا دفتر کھلوا دیں۔ ان خیالات کا اظہار انہوں نے اپنے ایک مذمتی بیان میں کیا۔ ان کا کہنا تھا کہ دہشتگردوں کو مذاکرات کی پیشکش کرکے ان کی حوصلہ افزائی کی گئی، جس کا نتیجہ آئے دن درجنوں محب وطن بے گناہ شہریوں کی لاشوں کی صورت دے کر ثابت کر رہا ہے کہ ان کا مقصد صرف اور صرف فساد فی الارض ہے۔ ان کا کہنا تھا کہ اب تمام سیاسی و مذہبی جماعتوں کو ہوش کے ناخن لیتے ہوئے ان شرپسندوں کیخلاف بھرپور آپریشن کا اعلان کر دینا چاہئیے، بصورت دیگر ملک میں خانہ جنگی دور کی بات نہیں۔علامہ عامر شمسی کا کہنا تھا کہ یہ ہمارے خائن اور مفاد پرست سیاستدانوں کی ناقص داخلہ اور خارجہ پالیسیوں کا نتیجہ ہے، جس کا خمیازہ آج پاکستان کے 18 کروڑ محب وطن عوام بھگت رہے ہیں۔ دہشت گردی اور قتل وغارت گری اس ملک کا مقدر بنا دی گئی۔ انہوں نے پشاور میں ایک ہفتہ کے دوران دہشتگردی کے تین بڑے واقعات کو حکمرانوں کے منہ پر طمانچہ قرار دیتے ہوئے کہا کہ بتایا جائے کہ ملک میں امن قائم کرنے کیکئے مزید کتنا خون درکار ہے، خیبر پختونخوا میں نہ مساجد محفوظ ہیں، نہ مدارس، نہ چرچ اور نہ ہی بازار۔ انہوں نے کہا کہ عمران خان اور میاں نواز شریف کو ہوش نہ ناخن لینا ہوں گے، بصورت دیگر وطن عزیز کو بچانا مشکل ہوجائے گا۔