وحدت نیوز (ملتان) مجلس وحدت مسلمین ملتان نے ضلعی کابینہ کا اعلان کر دیا ہے، ملتان سے جاری پریس ریلیز کے مطابق نامزد ضلعی کابینہ سے ایم ڈبلیو ایم پنجاب کے ڈپٹی سیکرٹری جنرل علامہ سید اقتدار حسین نقوی نے حلف لیا۔ اس موقع پر ضلعی سیکرٹری جنرل علامہ قاضی نادر علوی بھی موجود تھے۔ نامزد کابینہ میں سلیم عباس صدیقی ڈپٹی سیکرٹری جنرل، مولانا مظہر عباس صادقی سیکرٹری تبلیغات، سید دلاور عباس زیدی سیکرٹری اُمور عزاداری، وسیم زیدی سیکرٹری شعبہ خیرالعمل، علی رضا بخاری سیکرٹری تعلیم، مہر سخاوت سیکرٹری سیاسیات، دل شیر سیکرٹری وحدت اسکائوٹ اور مرزا وجاہت علی سیکرٹری وحدت یوتھ شامل ہیں۔ اس موقع پر خطاب کرتے ہوئے ضلعی سیکرٹری جنرل علامہ قاضی نادر علوی کا کہنا تھا کہ حکومت نے پٹرول کو سستا کر کے نایاب کر دیا ہے، حکومت اپنی ناہلی کو چھپانے کے لیے ملبہ نجی کمپنی پر ڈال رہی ہیں۔ بجلی، گیس اور پٹرولیم مصنوعات کی قلت نے عوام کا جینا دوبھر کر دیا ہے۔ حکومت وقت کے عاقبت نااندیش فیصلوں کی بدولت پاکستان درحقیقت مسائلستان بن چکا ہے۔