وحدت نیوز (ملتان) مجلس وحدت مسلمین نے پاکستان تحریک انصاف کے سابق مرکزی صدرمخدوم جاوید ہاشمی کی سیٹ پر ہونے والے قومی اسمبلی کے ضمنی الیکشن میں متفقہ طور پر آزاد اُمیدوارملک محمد عامر ڈوگرکی حمایت کا اعلان کردیا ہے۔ملتان پریس کلب میں مجلس وحدت مسلمین ضلع ملتان کے سیکریٹری جنرل علامہ سید اقتدار نقوی نے عامر ڈوگر کے ہمراہ پریس کانفرنس کرتے ہوئے ان کی واضح حمایت کااعلان کیا، واضح رہے کہ عامر ڈوگر کا تعلق پاکستان پیپلزپارٹی سے تھا اور گذشتہ عام انتخابات میں پی پی پی کے ٹکٹ پر ایم پی اے کا الیکشن لڑا تھا۔ ضمنی انتخابات میں عامر ڈوگر نے پیپلزپارٹی کاٹکٹ نہ ملنے پر آزاد اُمیدوار کی حیثیت سے الیکشن لڑنے کا فیصلہ کیا، پاکستان تحریک انصاف بھی ملک محمد عامر ڈوگر کی حمایت کررہی ہے، جبکہ عامر ڈوگر کے مقابلے میں پاکستان مسلم لیگ نون کے حمایت یافتہ اور اس حلقے کے سابق ایم این اے مخدوم جاوید ہاشمی، پاکستان پیپلزپارٹی کے ڈاکٹر جاوید صدیقی سمیت دیگر اُمیدوار موجود ہیں۔ سیاسی حلقوں کی نظر میں اس حلقے میں اصل مقابلہ مخدوم جاوید ہاشمی اور عامر ڈوگر کے درمیان ہوگا۔