وحدت نیوز(اسلام آباد)مجلسِ وحدت مسلمین پاکستان کے مرکزی ڈپٹی سیکرٹری جنرل علامہ احمد اقبال رضوی نے پیٹرولیم مصنوعات کی قیمتوں میں غیر معمولی اضافے اور بڑھتی ہوئی مہنگائی کے خلاف شدید ردعمل کا اظہار کرتے ہوئے کہا ہے کہ انتخابات سے قبل اپنے کیے گئے وعدوں کو حکومت پورا کرے۔ عوام نے موجودہ حکومت کو مہنگائی،بے روزگاری اور مشکلات کے چنگل سے نکلنے کے لیے مینڈیٹ دیا لیکن حکومت عوام سے کیے گئے وعدوں کو پورا نہ کر سکی۔
انہوں نے کہا کہ مہنگائی کی تائید میں کوئی جواز قابل قبول نہیں۔حکومت عوام کو ریلیف دے کر انتظامی معاملات پر اپنی گرفت ثابت کرے۔حکومت کو اپنی ساکھ بچانے کیلئے بے روزگاری و مہنگائی کے خاتمے سمیت الیکشن کے دوران کئے گئے دیگر دعوؤں کو سچ کر کے دکھانا ہوگا۔ پیٹرولیم مصنوعات میں مسلسل اتار چڑھاؤ کے باعث اشیائے خوردونوش کی قیمتیں غیر مستحکم ہیں۔بجلی کے نرخوں میں اضافے نے عام گھریلو صارفین کو بھی اذیت میں مبتلا کر رکھا ہے۔ حکومت عام آدمی کی بنیادی ضروریات زندگی کی طرف توجہ دے۔
انہوں نے حکومت سے پیٹرول کی قیمتوں میں اضافے کے فیصلے کو واپس لینے کا مطالبہ کرتے ہوئے کہا ہے کہ دانشمندی کا تقاضا یہی ہے کہ مہنگائی کی چکی میں پسے ہوئے عوام پر مزید کوئی بوجھ نہ ڈالا جائے۔