وحدت نیوز (اسلام آباد) مجلس وحدت مسلمین کے مرکزی جنرل سیکریٹری علامہ راجہ ناصرعباس جعفری نےپشاور میں طوفانی  بارشوں اور نیپال میں آنے والے ہولناک زلزلے کے نتیجے میں دو ہزار سے زائد ہلاکتوں پر افسوس کا اظہار کرتے ہوئے اس المناک سانحہ قرار دیا ہے۔انہوں نے کہا کہ مشکل کی اس گھڑی میں ہمیں پشاور کے متاثرہ عوام اور  اقوام عالم کو نیپال کی زیادہ سے زیادہ مدد کرنے کی ضرورت ہے۔دکھ کی اس گھڑی میں اسے تنہا نہیں چھوڑا جا سکتا۔ متاثرہ علاقوں میں امدادی سرگرمیوں کے عمل کو زیادہ تیزی کے ساتھ سرانجام دینے کی ضرورت ہے تاکہ ملبے کے نیچھے دبے ہوئے افراد کو نکالا اور متاثرین کو ادویہ اور خوراک کی فوری فراہمی کو یقینی بنایا جا سکے۔انہوں نے کہا کہ اس المناک سانحہ پر ہمیں نیپال کی حکومت اور عوام سے دلی ہمدردی ہے اور بڑے پیمانوں پر قمیتی جانوں کے ضیاع پر انہیں تعزیت پیش کرتے ہیں۔

وحدت نیوز (گلگت بلتستان) مجلس وحدت مسلمین پاکستان نے گلگت بلتستان قانون ساز اسمبلی انتخابات کے لیے امیدواروں کو درخواستیں جاری کرنے کا عمل شروع کر دیا ہے۔مجلس وحدت مسلمین کا سیاسی شعبہ مکمل جانچ پڑتال کے بعد تنظیمی طریقہ کار کے مطابق کامیاب ٹکٹ ہولڈرز کا اعلان جلد کرے گا۔ مجلس وحدت نے امیدوارں کے لیے ضروری قرار دیا ہے کہ ان پر کوئی اخلاقی یا کرپشن کا داغ نہ ہو، سیاسی فہم ،تعلیم اور تجربے کے حامل ایسے دیندار افراد جو حب الوطنی کے جذبے سے سرشار ہوں درخواستیں لے سکتے ہیں ۔ اس سلسلے میں مجلس وحدت مسلمین بلتستان ڈویژن نے قانون ساز اسمبلی کے لیے امیدوراوں کو درخواستیں دینا شروع کر دیا ہے۔ اس سلسلے میں ڈویژنل سیکریٹریٹ میں حلقہ 1 سے دو، حلقہ2 سے آٹھ، حلقہ3 سے تین ، حلقہ 4سے تین، حلقہ 5 سے تین اور حلقہ 6سے تین امیدواروں نے سید ناصرشیرازی اور علامہ آغا سید علی رضوی سے درخواستیں حاصل کر لی ہیں۔ ان میں حلقہ 1 سکردوسے شیخ زاہد حسین زاہدی، انجینئر محمد اسلم، حلقہ دو سے شیخ علی محمد کریمی، محمد علی،سلیم یاسر،کاچو امتیاز، محمد سعید،رسول میر ، سید اعجاز موسوی، حلقہ تین سے آغا مظاہر حسین موسوی، شیخ احمد علی نوری ، حلقہ چار سے فدا حسین، راجہ ناصر،صوبیدار محمد علی، حلقہ پانچ سے شیخ اکبر رجائی، ڈاکٹر شجاعت حسین میثم ، سید مبارک موسوی اور حلقہ چھ سے شیخ مبارک علی عارفی،لیکچرار فدا علی نے درخواستیں حاصل کر لی ہیں ، جبکہ صوبائی سیکریٹریٹ گلگت میں جی بی حلقہ 1 سے دو،حلقہ 2سے تین، حلقہ 3سے تین،حلقہ 5سے تین اور حلقہ 13سے ایک امیدوار نے ٹکٹ کے حصول کیلئے علامہ شیخ نیئر عباس مصطفوی سے درخواست وصول کرلی ہے، ان میں حلقہ 1سے الیاس صدیقی ، بختاور خان، حلقہ سے بہرام خان ایڈووکیٹ، سعید الحسنین ، مظہرعباس ، حلقہ سے امتیاز حسین شیخ نیئر عباس ، شیخ اکبر، حلقہ سے ڈاکٹر رضوان علی، ڈاکٹر علی گوہر، عیسٰی ایڈووکیٹ ، حلقہ سے اکبر حسین نے درخواستیں حاصل کیں ، درخواست حاصل کرنے والے دو دن تک فارمز جمع کریں گے ۔ مجلس وحدت مسلمین پاکستان بلتستان ڈویژن میں ٹکٹ کے لیے ہر حلقے سے درجنوں امیدوار ٹکٹ کے لیے درخواستیں جمع کریں گے ۔ کل بھی مختلف حلقوں سے مزید امیدواروں کو درخواستیں جاری کر دی جائیں گی۔

وحدت نیوز (اسلام آباد) پاکستان تحریک انصاف کے رہنماچودھری غلام سرور کی مجلس وحدت مسلمین پاکستان کے مرکزی ڈپٹی سیکریٹری جنرل علامہ امین شہیدی سے ایم ڈبلیو ایم سیکریٹریٹ اسلام آباد میں ملاقات ، جس میں پی ٹی آئی کی جانب سے غلام سرو رخاں اور زوالقرنین شاہ جبکہ مجلس وحدت مسلمین کے مرکزی ڈپٹی سیکریٹری جنرل علامہ امین شہیدی، کراچی ڈویثرن کے سیکریٹری سیاسیات سیدعلی حسین ، مرکزی آفس اسلام آبادکے انچارچ علامہ محمد اصغر عسکری اورپولیٹیکل کور کمیٹی کے رکن ایڈوکیٹ سید آصف رضا شامل تھے۔

پی ٹی آئی کے رہنماوں سے ملاقات میں علامہ امین شہیدی کا کہنا تھا کہ ہم نے پورے ملک میں اصولی بنیادوں پر پی ٹی آئی کا ساتھ دیا ہے۔ کراچی میں امن امان کی بحالی کے لئےNA-246 کی الیکشن میں تحریک انصاف کا ساتھ دیا اور اسی طرح گلگت بلتستان الیکشن میں بھی مفاہمت کی پالیسی پر عمل کرینگے، گلگت بلتستان میں کسی بھی امیدوار پر کوئی پریشر نہیں ڈالا ، ایم ڈبلیو ایم میں شامل ہونے والے تمام امیدوار اپنی مر ضی سے شامل ہوئے ہیں۔ انکا کہنا تھا کہ امیدواروں کو ٹکٹ دینے کا فیصلہ کور کمیٹی امید وار کی قابلیت اور عوامی خدمت کو مد نظر رکھتے ہوئے کرے گی،علامہ امین شہیدی کا مزید کہنا تھا کہ گلگت بلتستان میں ہم نے کسی شخصی اور مذہبی بنیادوں پر نہیں بلکہ عملی میدان میں کام کر کے عوام کا دل جیتا ہے، ہم نے جی بی، کراچی سمیت ملک کے تمام حصوں میں مظلوم اور مشکلات میں گرِے عوام کا ساتھ دیا اور ہمیشہ حق کے لئے آواز بلند کی۔

پاکستان تحریک انصاف کے رہنماء غلام سرورخاں کا کہنا تھا کہ گلگت بلتستان الیکشن میں ایم ڈبلیوایم اور پی ٹی آئی دونوں نئی جماعتیں ہیںِ لہذٰا ہم یہ خواہش رکھتے ہے کہ دونوں جماعتیں مل کر کام کریں۔ان کا کہنا تھا کراچی الیکشن میں مجلس و حدت مسلمین کا کردار قابل تحسین تھا اور ہم ان کے شکر گزار ہیں کہ انہوں نے ہمارا ساتھ دیا ،کے پی کے کے حوالے سے گفتگو کرتے ہوئے ان کا کہنا تھا کہ خیبر پختونخواہ کے حوالے سے مجلس و حدت کے تمام تحفظات دور کرینگے،ملا قات میں دونوں رہنماوں نے گلگت بلتستان الیکشن مہم میں کمیٹیاں بنانے پر بھی غور کیا، اور جلد ہی دونوں جماعتوں کے اعلیٰ سطح وفد بھی ملاقات کرینگے۔

وحدت نیوز (اسکردو) جیسے جیسے گلگت بلتستان قانون ساز اسمبلی کے انتخابات نذدیک آرہے ہیں خطے کی موثرسیاسی اور سماجی شخصیات کی تیزی کے ساتھ مجلس وحدت مسلمین میں شمولیت کا سلسلہ جاری ہے، گذشتہ روزڈویژنل سیکریٹریٹ وحدت ہاؤس اسکردومیں ایک پروقار تقریب جس میں ایم ڈبلیوایم کے مرکزی سیکریٹری امور سیاسیات سید ناصرشیرازی ، مرکزی معاون سکریٹری امورسیاسیات علامہ مقصودڈومکی اور ڈویژنل سیکریٹری جنرل علامہ سید علی رضوی مہمان خصوصی تھے، روندو کی معروف سیاسی شخصیت راجہ ناصرعلی خان مقپون نے علمائے کرام اور برادری کے سینکڑوں افراد کے ہمراہ ایم ڈبلیوایم میں شمولیت کا باقائدہ اعلان کیا، جبکہ یاسین شاہ کی قیادت میں یوتھ آف روندوکے سینکڑوں کارکنان نے بھی ایم ڈبلیوایم میں شمولیت کا باظابطہ اعلان کیا، یوتھ آف روندوکے جوان ایک بڑی موٹر سائیکل ریلی کی صورت میں ایم ڈبلیوایم کے دفتر پہنچے جہاں ان کا شاندار استقبال کیا گیا، دوسری جانب تریکو کے عمائدین کی بھی بڑی تعداد ایم ڈبلیوایم میں شامل ہوگئی ہے،جن میں حوالدارعبدالرحیم، قلب علی، حاجی رستم، جوہر،ذوالفقار، نوازش ، حوالداررسول اور محمد کاظم شامل ہیں ، ایم ڈبلیوایم کے قائدین نے نو وارد اراکین کو پھولوں کے ہار پہناکر ایم ڈبلیوایم میں خوش آمدید کہا.

اس موقع پرخطاب کرتے ہوئے ایم ڈبلیوایم میں شمولیت اختیار کرنے والی شخصیات کا کہنا تھا کہ مجلس وحدت مسلمین کی تمام مظلوم عوام بالخصوص گلگت بلتستان کے عوام کے لئے خدمات اور ہر میدان میں اٹھنے والی آوازکسی سے ڈھکی چھپی نہیں ہے، ہم ایم ڈبلیوایم کی خدمات کو قدرکی نگاہ سے دیکھتے ہیں ،انہوں نے کہا کہ ایم ڈبلیوایم کے پاس خطے کی ترقی اور خوشحالی کیلئے ایک مضبوط وژن موجود ہے،جس کے تحت خطے کی تقدیر کو بدلا جاسکتا ہے،عمائدین نے کہا کہ روندوکے بااثرراجہ خاندان کی ایم ڈبلیوایم میں شمولیت علاقے کیلئے نیک شگون ہے،ہم روندومیں ایم ڈبلیوایم کی کامیابی کے لئے بھر پورکردارادا کریں گے،انہوں نے کہا کہ آئندہ دنوں میں مزید اہم سیاسی ، سماجی اور مذہبی شخصیات ایم ڈبلیوایم میں شمولیت کا اعلان کریں گی۔

وحدت نیوز (کوئٹہ) مجلس وحدت مسلمین پاکستان کے مرکزی رہنما و امام جمعہ علامہ سید ہاشم موسوی نے اپنے ایک بیان میں کہا ہے کہ گوادر بلوچستان کا حصہ ہے اور ترقی کا حق بھی بلوچستان کو ملنا چاہیے۔ ہم چینی صدر کے دورہ پاکستان کا خیر مقدم کرتے ہیں لیکن چینی صدر کے دورہ پاکستان کے دوران 45ارب ڈالر کے 51 منصوبوں پر دستخط ہوئے جن میں گوادر پورٹ سے بھی متعلق معاہدہ شامل ہے۔گوادر کاشغر روٹ کا بھی معاہدہ ہوا جو نئے روٹ کے مطابق بنایا جا رہاہے۔ یہ معاہدے پاکستان اور چین کے درمیان نہیں بلکہ چین اور پنجاب کے درمیان ہوئے ہیں۔ گوادر کے بغیر یہ منصوبے نہیں ہوسکتے۔ اس لیے مجبوری میں بلوچستان منصوبے کو شامل کیا گیا۔ان منصوبوں سے چھوٹے صوبوں کو محروم رکھا گیا اس سے عوام کی بے چینی میں اضافہ اور نفرت کی دیواریں کھڑی ہوسکتی ہے۔ اس ملک کی چار اکائیاں ہیں۔ چاروں کو ایک جیسی اہمیت دی جائیں۔ وفاق کا بلوچستان کے ساتھ رویہ ہمیشہ سوتیلی ماں کا جیسا رہا ہے۔ پاکستان میں وسائل کا منصفانہ تقسیم سب سے بڑا مسئلہ ہے۔وسائل پر عدم اختیار اور دولت کی غیر منصفانہ تقسیم نے نہ ختم ہونے والی مسائل کو جنم دیا۔ ملک کی آبادی کا بڑا حصہ آج بھی غربت کی لکیر سے نیچے زندگی گزارنے پر مجبور ہے۔ حکمران مکمل ناکام ہوچکے ہیں، قوم ان سے نجات چاہتے ہیں۔ عوام کی حالت زار بدلنے کی تمام تر دعوے صرف لفاظی ہیں۔ ان دعووں میں اگر زرا بھر بھی صداقت ہوتی تو اس کے اثرات منظر عام پر نظر آتے ۔ حقیقت یہ ہے کہ حکومت نے عوام پر عرصہ حیات اس قدر تنگ کر دیا ہے کہ وہ معاشی بدحالی کے ہاتھوں چھوٹی چھوٹی خوشیوں سے بھی محروم ہوچکے ہیں۔ حکمرانوں کو اپنے قبلے کی درستگی کے بعد عوام کے مسائل کے حل کے لیے عملی کاوشیں کرناہوگی تا کہ عوام کو ریلف مل سکے اور وہ معاشی آسودگی کے بعدملک کی ترقی و خوشحالی میں اپنا کلیدی کردار ادا کرتے ہوئے استحکام پاکستان میں اپنا حصہ ڈال سکے کیونکہ معاشی طور پر خوشحال عوام ہی ریاست کی ضمانت فراہم کر سکتے ہیں۔

وحدت نیوز (اسلام آباد) مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے کہا ہے کہ سعودیہ کی طرف سے واضح جنگ بندی کے اعلان کے بعد یمن کی شہری آبادی پر شدید فضائی حملے ننگی جارحیت اور بدترین دہشت گردی ہے۔سعودی حکومت نے تمام سفارتی اصولوں اور اخلاقی تقاضوں کا جنازہ نکال دیا ہے۔آل سعود اسلام دشمن قوتوں کی سازشوں کا شکار ہو کر امت مسلمہ کو ٹکروں میں تقسیم کرنے کے درپے ہے جس سے مسلم امہ کمزور تر ہوتی جائے گی۔انہوں نے کہا کہ سعودی کی طرف سے جنگ بندی کے اعلان کو دنیا کے تمام ممالک بشمول ایران کے سب نے تحسین کی نگاہ سے دیکھا تھا اور اس فیصلے کو حالات کے عین مطابق قرار دیا تھا لیکن اس اعلان کے چوبیس گھنٹوں کے اندر ہی دوبارہ پہ در پہ حملوں کے سلسلے نے یہ ثابت کر دیا کہ سعودی حکومت نا قابل اعتبار ہے۔ انہوں نے سعودیہ کے دوہرے معیار کو کڑی تنقید کانشانہ بناتے ہوئے کہا کہ مصر او ر شام میں منتخب آئینی حکومت کے خلاف اٹھنے والی عوامی تحاریک کی سعودیہ ہر طرح کی حمایت کرتا ہے جب کہ اس کے برعکس یمن میں غیر آئینی طور پر مسلط کیے جانے والے صدرکے خلاف اٹھنے والی آواز کو دبانے کے لیے مسلح ہو کر چڑھ دوڑتا ہے جو ثابت کرتا ہے کہ سعودیہ کی مخالفت اصولی نہیں بلکہ مفادات اورتعصب کی بنیاد پر ہے۔انہوں نے کہا کہ امت مسلمہ یہ سوال پوچھنے میں حق بجانب کہ غزہ پر اسرائیلی بربریت کے خلاف کبھی کسی عرب ملک کو آواز اٹھانے کا حوصلہ نہ ہوا لیکن یمن میں اپنے ہی مسلمانوں کا آخر کیوں خون بہایا جا رہے ۔اس گناہ عظیم اور انسانی حقوق کی کھلم کھلی خلاف ورزی کے پس پردہ کیا مقاصد ہیں۔عالم اسلام کو درپیش خطرات میں سعودیہ کو اپنے متنازعہ کردار کا محاسبہ کرنے کی اشد ضرورت ہے۔اگر سعودیہ نے اپنی روش نہ بدلی تو تاریخ عالم اسلام میں انتشار کی بنیادی وجہ سعودیہ کے غیر منصفانہ طرز عمل کو قرار دیں گے۔