وحدت نیوز(کوئٹہ) مجلس وحدت مسلمین کوئٹہ ڈویژن کے ڈپٹی سیکریڑی جنرل علامہ ولایت حسین جعفری نے اپنے بیان میں کہا ہے کہ لاہور شہر کے چرچ میں بے گناہ انسانوں کا خون بہانا درندگی کی بدترین مثال ہے۔وفاقی اور پنجاب حکومت کی بیڈ گورننس اور انتظامی نااہلی کے باعث یوحنا آباد لاہور میں چرچ میں دھماکوں کی بھر پورمذمت کرتے ہیں۔ سانحہ لاہور پنجاب حکومت کی غیر سنجیدہ اقدامات کی بدولت ہوا ہے۔ نون لیگ کی حکومت اقتدار کی ہوس میں مبتلا ہے۔ عوام کی جان و مال کی حفاظت میں وفاقی اور پنجاب حکومت بالکل ناکام ہو چکی ہے۔ کالعدم جماعتیں وفاقی اور صوبائی حکومتوں کے زیر سرپرستی میں بے گناہ انسانوں کے قتل عام میں مصروف ہیں۔ وطن عزیز پاکستان کی بد قسمتی اس سے زیادہ اور کیا ہوسکتی ہے کہ پاکستان کے عوام آئے روز دہشت گردی کے بھینٹ چڑھ رہے ہیں۔ نون لیگ کی حکومت سے کسی خیر کی توقع رکھنا حماقت ہے کیونکہ دہشت گرد خود ان کے پالے ہوئے ہیں۔ حکومتی جماعت اس وقت دہشت گردوں اور کالعدم جماعتوں کی پشت پناہ بن چکی ہے۔ حکومتی اقدامات صرف میڈیا کی حد تک محدود ہے۔ دہشت گرد آزاد اور دندناتے پھر رہے ہیں۔ان کے خلاف اقدامات نہ کرنا حکومت کی کمزوری اور بے حسی کو ظاہر کرتی ہے۔ حکومتی پشت پناہی میں پلنے والے یہ ملک دشمن عناصر ملکی سلامتی و بقاء کے ازلی دشمن ہے۔ مساجد ، امام بارگاہوں ، چرچ اور مندر کو نشانہ بنانے والے کسی رعایت کے مستحق نہیں۔مجلس وحدت مسلمین حکومت سے نہ صرف مطالبہ کرتے ہیں بلکہ تنبیہ کرتے ہیں کہ دہشت گردوں کے ساتھ نرم رویہ نہ اپنائے بلکہ ان ناپاک عناصر کا فوری اور مکمل صفایا کیا جائے۔ ہم مسیحی بھائیوں کے غم میں برابر کے شریک ہیں۔
وحدت نیوز(لاہور) الحاج حیدر علی مرزا کی رسم قل امام بارگاہ گلستان زہرا وحدت روڈ ادا کی گئی،مجلس ترحیم سے خطاب کرتے ہوئے مجلس وحدت مسلمین لاہور کے سیکرٹری جنرل علامہ امتیاز کاظمی کا کہنا تھا کہ الحاج حیدر علی مرزا ایک سچے محب وطن پاکستانی اور اتحاد امت کے علمبردار تھے،انہوں نے ہمیشہ امت کی وحدت اور ملکی سلامتی اور دہشت گردی کے خلاف آواز اُٹھائی،آج تمام مکاتب فکر کے نمائندگان کی یہاں موجودگی اس بات کی دلیل ہے کہ کہ اُن کی شخصیت ایک ہر دل عزیز شخصیت تھی،علامہ امتیاز کاظمی نے لاہور دہشت گردی کی مذمت کرتے ہوئے کہا کہ انتہا پسندوں کے خلاف اب بھی حکمران خاموش ہیں یہاں دہشت گردی کے نام پر بے گناہوں کو ہراساں کیا جا رہا ہے،پنجاب میں کالعدم تنظیموں کو مکمل آزادی اور پروٹوکول حاصل ہے،وزیر داخلہ موصوف دہشت گردوں کے سہولت کاروں کو صفائیاں پیش کرتے ہیں کہ آپ کے خلاف ہم کچھ نہیں کرینگے،رسم قل میں سیاسی سماجی شخصیات سمیت سینکڑوں لوگ شریک ہوئے۔
وحدت نیوز (سکھر) وارثان شہدائے شکارپور کمیٹی کی جانب سے ملک میں جاری دہشتگردی کے خلاف آل پارٹیز امن کانفرنس کا انعقاد کیا گیا، سکھر کے مقامی ہوٹل میں منعقدہ آل پارٹیز کانفرنس کی صدارت چیئر مین شہداء کمیٹی علامہ مقصودعلی ڈومکی و ایم ڈبلیو ایم سندھ کے سیکریٹری جنرل علامہ مختار امامی نے کی، جبکہ کانفرنس میں مختلف سیاسی و مذہبی جماعت کے نمائندوں اور ہندو، مسیحی اور سکھ برادری کے نمائندگان نے بھی خصوصی شرکت،کانفرنس سے خطاب کرتے ہوئے علامہ مقصودڈومکی نے کہا کہ پاکستان کو ایک منظم سازش کے تحت دہشت گردی کے ذریعے غیر مستحکم کرنے کی کوشش کی جارہی ہے، ملک بھر میں جاری دہشت گردی کو فرقہ واریت کا شاخسانہ قرار دینے کی مذموم کوششیں کی جاتی ہیں ، جبکہ پاکستان کے کسی حصے میں شیعہ سنی اختلاف یا جھگڑا نہیں بلکہ یک طرفہ دہشت گردی ہے جس میں شیعہ سنی ہی نہیں بلکہ ہندو ، سکھ اور مسیحی بھی نشانہ بن رہے ہیں ، انہوں نے کہا کہ سانحہ شکارپور کے بعد لانگ مارچ کے نتیجے میں سندھ حکومت کو شہداءکمیٹی کی جانب سے پیش کیئے جانے والے مطالبات پر عمل درآمد میں غیر سنجیدگی کا مظاہرہ کیا جارہا ہے،بعض مطالبات پر اب تک توجہ ہی نہیں دی گئی، اگر غیر سنجیدگی کی یہی صورتحال رہی تو سندھ کی تمام امن پسند قوتوں کے ساتھ ملکر نہ فقط دہشت گرد گروہوں بلکہ ان کی پشت پناہی کرنے والی حکومت کے خلاف پرروز احتجاجی تحریک کا آغاز کردیا جائے گا۔علامہ مقصودڈومکی نے کانفرنس کے اختتام پر تمام معزز مہمانان گرامی کا شکریہ اداکیا۔
وحدت نیوز (پشاور) مجلس وحدت مسلمین خیبر پختونخواکے سیکریٹری جنرل علامہ سید محمدسبطین حسینی نے لاہورچرچ میں بم دھماکے کی شدید الفاظ میں مذمت کرتے ہوئے اسے ایک انتہائی افسوسناک اوربزدلانہ اقدام قرار دیاہے۔ وحدت ہاوس سے جاری بیان میں سیکرٹری جنرل مجلس وحدت مسلمین خیبر پی کے نے کہا ہے کہ عبادت گاہوں کو نشانہ بنانیوالے دہشت گردانسان کہلانے کے حقدارنہیں۔ ایسی گھناونی کارروائیاں امریکہ و اسرائیل کے گماشتوں کی کارستانیاں ہیں۔ دھماکہ اسلام اورپاکستان کو بدنام کرنے کی مذموم سازش ہے۔ دنیا کا کو ئی مذہب نہتے انسانوں پرحملے کی ا جا زت نہیں دیتا۔حکومت اقلیتوں کی حفاظت کیلئے اپنی دینی، اخلاقی اورآئینی ذمہ داری پوری کرے۔ انہوں کا کہنا تھا کہ عیسائی عبادت گاہ پر کیا جانے والا دہشت گردانہ حملہ صرف اسلام دشمنی نہیں بلکہ انسانیت دشمنی ہے، آئین پاکستان اقلیتوں کو تحفظ فراہم کرتا ہے، ایسے سانحات آئین پاکستان کی دھجیاں اڑانے کے مترادف ہیں۔ عیسائی بھائیوں کے سوگ میں برابر کے شریک ہیں، گھناونی کارروائی کرنے والوں کو پاکستان حکومت کیفر کردار تک پہنچائے۔ مساجد ،امام بارگاہوں، مدارس،مزارات،گرجا گھروں اور بازاروں میں معصوم لوگوں کی زندگیوں سے کھیلنے والے کسی رعایت کے مستحق نہیں ۔انہوں نے کہا کہ امریکہ پاکستان میں دہشت گردی کو ہوا دے رہے ہیں اسی وجہ سے امریکہ سے پاکستانی سفیر واپس بلایا جائے ۔علامہ سید محمدسبطین حسینی نے کہاکہ پنجاب کے وزیر اعلیٰ کے طرف سے طالبان کو امن پیغامات دینے کا تحفہ طالبان کے طرف سے مل گیا۔اب پنجاب میں شرپسندوں کے خلاف کاروائی کا وقت آن پہنچا ہے۔
وحدت نیوز (کراچی) مجلس وحدت مسلمین کراچی ڈویژن کے شعبہ تربیت اور تنظیم سازی کے زیر اہتمام المحسن ہال میں دو روزہ تربیتی وتنظیمی ورکشاپ کا انعقادکیا گیا ، ورکشاپ سے مجلس وحدت مسلمین پاکستان کے مرکزی ڈپٹی سیکریٹری جنرل علامہ محمد امین شہیدی ، مرکزی سیکریٹری اطلاعات مہدی عابدی، مرکزی سیکریٹری تنظیم سازی یعقوب حسینی، مولانا نقی ہاشمی نے خطاب کیا،جبکہ تلاوت مولانا صادق جعفری اور نظامت کے فرائض ایم ڈبلیوایم کراچی ڈویژن کے سیکریٹری امور تربیت سید میثم رضا نے انجام دیئے، ورکشاپ میں کراچی کے تمام اضلاع سے تنظیمی ذمہ داران نے شرکت کی، علامہ امین شہیدی نے ایم ڈبلیوایم کے کارکنان میں الہیٰ صفات کی موجودگی پر زور دیا، انہوں نے کہا کہ ایم ڈبلیوایم نہ فقط اہل تشیع بلکہ تمام مظلوموں کے دل کی آواز ہے، ایم ڈبلیوایم کے کارکنان اپنے قوت جاذبہ کو پروان چڑھائیں جبکہ قوت دافعہ سے دوری اختیار کریں ، گھر گھر وحدت کا پیغام پہچانے کیلئے اپنی تمام تر صلاحیتیں بروئے کار لائیں ، گروہ بندی ، شخصیت پرستی اور تنظیم پرستی بدعت ہے اس سے اجتناب برتا جائے۔
وحدت نیوز(گلگت) دہشت گرد بزدلانہ حملوں کے ذریعے پاکستان کی مسیحی برادری کے حوصلوں کو کمزور نہیں کرسکتے۔ مسیحی برادری دہشت گردوں کے خلاف پاک فوج کی جانب سے جاری آپریشن کی مکمل حمایت جاری رکھے گی ۔لاہور میں چرچ پر حملے کی پرزور مذمت کرتے ہیں خود کش حملے کے نتیجے میں معصوم شہریوں کی ہلاکت پر غمزدہ خاندانوں کو تعزیت پیش کرتے ہیں۔ان خیالات کا اظہار مجلس وحدت مسلمین اقلیتی ونگ کے سیکرٹری جنرل رحمن مسیح سے میڈیا سے بات چیت کرتے ہوئے کہا۔
انہوں نے کہا کہ مسیحی برادری اس ملک کے محب وطن شہری ہیں اور کوئی ملکی دفاع کے سلسلے میں ہر قسم کی قربانی دینے کیلئے تیار ہیں۔ہمارا جینا مرنا پاکستان کے ساتھ ہے اور دہشت گرد مسیحی عبادت خانوں پر حملہ پاکستان پر حملہ ہے جس کی شدید مذمت کرتے ہیں اور دہشت گردوں کو پیغام دینا چاہتے ہیں کہ اس قسم کے بزدلانہ حملوں سے ہمیں مرعوب نہیں کیا جاسکتا۔دہشت گرد مسیحی برادری کو نشانہ بناکر عیسائی مسلم فسادات کو ہوا دینا چاہتے ہیں اور ہم اس سازش کو اپنے اتحاد کے ذریعے ناکام بنادیں گے۔انہوں نے کہا کہ ملک عزیز پاکستان اس وقت حالت جنگ میں ہے اور دشمن اختلافات کو ہوا دیکر اندرونی طور پر ملک کو کمزور کرنا چاہتے ہیں اور ہم مسیحی برادری پاکستان دشمنوں کے ان مذموم مقاصد کی تکمیل ہونے نہیں دینگے۔ انہوں نے خود کش حملوں میں جاں بحق ہونے والے کے ورثاء سے اظہار تعزیت کی اور پنجاب حکومت کی جانبداری کی شدید الفاظ میں مذمت کرتے ہوئے کہا کہ پنجاب حکومت دہشت گردوں کے سامنے بھیگی بلی بنی ہوئی ہے اور ظلم کے خلاف احتجاج کرنے والوں پر طاقت کا استعمال انتہائی بزدلانہ فعل ہے۔انہوں نے چیف آف آرمی سٹاف سے اپیل کی کرسچن برادری کی نسل کشی کا سلسلہ رکوانے میں کردار ادا کریں اور دہشت گردوں کا نیٹ ورک جو کہ پاکستان کے طول و عرض میں موجود ہے کے خلاف ضرب عضب طرز کا آپریشن کریں۔
