وحدت نیوز(ٹیکسلا) مجلس وحدت مسلمین پاکستان ،امامیہ آرگنائزیشن اور امامیہ اسٹوڈنٹس آرگنائزیشن پاکستان کےباہمی اشتراک سے جامعۃ القائم ٹیکسلا میں عظمت شہداء کانفرنس کا انعقاد کیا گیا جس سے مختلف علماء کرام نے خطاب کیا ۔تنظیمی عہدہ داروں ،علماء اور علاقے کے عمائدین نے اس کانفرنس میں بھر پور شرکت کی ۔ عظمت شہداء کانفرنس سے خطاب کرتے ہوئے مجلس وحدت مسلمین پاکستان کےمرکزی ڈپٹی سیکرٹری جنرل جناب حجۃ الاسلام والمسلمین علامہ احمداقبال رضوی نے کہاکہ آج پاکستان میں بنو امیہ کا دور دہرایا جا رہا ہے اور شیعیان حیدر کرار کو مختلف بہانو ں سے دیوار سے لگانے کی کوشش کی جارہی ہے ۔عزادار وں کے خلاف بے بنیاد مقدمات بنائے جا رہے ہیں اور انہیں پابند سلاسل کیا جارہا ہے ،خطباء و واعظین پر ایک ضلع سے دوسرے اضلاع تبلیغ دین کے سلسلے میں پابندی لگائی جارہی ہے ۔ عزاداری کے اوقات کو محدود کیا جارہا ہے ۔ماتم داری اور عزاداری کے جلوسوں کے روٹوں کو تبدیل یا اس کے ٹائم میں کمی کی جارہی ہے ۔ شیعہ وسنی مکتب فکر کی جانب سے ہر قسم کی مذہبی مجالس اورمحافل کے انعقاد پر قدغن لگائی جارہی ہے ۔ یہ ظلم ہے اور ہم ملکر اس ظلم کا مقابلہ کریں گے ۔ شیعہ وسنی میں کوئی اختلاف نہیں ۔ہمارا اختلاف تکفیری سوچ سے ہے جو ملک کی جڑوں کو دیمک کی طرح چاٹ رہی ہے ۔ جس سے ملک میں بدامنی اور فرقہ واریت کو ہوا دی جارہی ہے ۔ اس سوچ کے حامی آج اسٹبلشمنٹ کے اندر موجود ہیں ۔جو اس سوچ کو وطن عزیزمیں پروان چڑھانے میں ممدومعاون رہے ہیں ۔
آج شیعہ و سنی میں وحدت ہے ۔ ہم اپنے اپنے نظریے پر قائم رہتے ہوئے اور ایک دوسرے کے مقدسات کا احترام کرتے ہوئے انشاءاللہ عید کے بعد اپنی احتجاجی تحریک کو ایک نئی جہت دیں گے ۔ ہم ہر قسم کے ظلم کے خلاف ملکر مقابلہ کریں گے اور اپنے شہداء سے کیے گئے وعدوں کو نہیں بھلائیں گے ۔ ہم کب تک صبر کریں ؟کراچی ،کوئٹہ ، پاراچنار ،ڈیرہ اسماعیل خان ، گلگت بلتستان جہاں شیعیان حیدرکرار کی آبادیاں ہیں، کو مقتل گاہ میں تبدیل کردیا گیا ۔ ہماری زمینوں پر قبضہ کرایا جارہا ہے ۔ ہماری احتجاجی تحریک خالصتاً آئینی اور قانونی ہے ۔ ہماری اس تحریک کو دنیا میں سراہا جا رہا ہے ۔ ہم ہر قسم کے تشدد کے خلاف ہیں ۔ہم اپنا حق پر امن طریقے سے مانگ رہے ہیں ۔ اب ہماری آواز کو دبایا نہیں جا سکتا ۔ ہم اپنے حقوق کو لے کر رہیں گے ۔ انشاءاللہ عید الفطر کےبعد قائد وحدت نے لانگ مارچ کی کال دے دی ہے ۔اس لانگ مارچ کا قوم بھرپور ساتھ دے گی ۔اس لانگ مارچ کا رخ حکومت کے ایوانوں کی جانب ہو گا ۔ اب ہم خاموش نہیں رہیں گے اور ہر ظلم کا ڈٹ کر مقابلہ کریں گے ہم نے اس وطن عزیز کی خاطر قربانیاں دی ہیں اور ہم اپنے شہداء کے ناحق بہائے گئے خون سے بے وفائی نہیں کریں ۔ہم ملک پاکستان کو امن کا گہوارہ بنانے میں اپنا بھر پور کردار اداکرتے آئے ہیں اور ادا کرتے رہیں گے ۔
وحدت نیوز(ملتان) مجلس وحدت مسلمین صوبہ جنوبی پنجاب کے سیکرٹری جنرل علامہ اقتدار حسین نقوی نے پہلے مرحلے میں گیارہ رکنی صوبائی کابینہ کا اعلان کر دیا، نامزد صوبائی کابینہ کی تقریب حلف برادران جامعہ مسجد الحسین نیو ملتان میں منعقد ہوئی جس میں مرکزی ڈپٹی سیکرٹری جنرل علامہ احمد اقبال رضوی نے خصوصی شرکت کی۔ مرکزی ڈپٹی سیکرٹری جنرل نے نامزد صوبائی کابینہ سے حلف لیا۔ جنوبی پنجاب کی پہلی صوبائی کابینہ میں سلیم عباس صدیقی اور محمد اصغر تقی کو ڈپٹی سیکرٹری جنرل، احسان اللہ خان بلوچ کو سیکرٹری سیاسیات، سید عدیل عباس زیدی کو سیکرٹری نشرواشاعت، سید محمد ثقلین کو سیکرٹری میڈیا سیل، سید جواد رضا جعفری کو سیکرٹری تنظیم سازی، سید فرخ مہدی کو سیکرٹری تربیت وتبلیغات، مولانا اسد عباس آہیر کو امام سجاد فائونڈیشن، طاہر عباس مگسی کو سیکرٹری فلاح وبہبود، انجینیئر سخاوت علی کو سیکرٹری تعلیم اور علی رضا خان کو سیکرٹری روابط کی ذمہ داری دی گئی ہے۔ اس موقع پر صوبائی سیکرٹری جنرل علامہ سید اقتدار حسین نقوی، بہاولپور، مظفرگڑھ، علی پور، رحیم یارخان، میانیوالی، بھکراور خانیوال کے سیکرٹری جنرل اور اُن کے نمائندگان موجود تھے۔
وحدت نیوز(ٹیکسلا) ایک عالمہ اور مبلغہ کی بلاجواز گرفتاری کی پُرزور مذمت کرتے ہیں۔ اسلامی جمہوریہ ایران سے صرف تبلیغ کے لئے پاکستان آنے والی خاتون کو اس انداز میں ایئرپورٹ سے گرفتار کرنا سراسر ظلم و زیادتی ہے، پرزور احتجاج کرتے ہیں، طالبہ کو فوری طور پر رہا کیا جائے۔ ان خیالات کا اظہار کا مجلس وحدت مسلمین پاکستان کے مرکزی ڈپٹی سیکرٹری جنرل علامہ سید احمد اقبال رضوی نے ٹیکسلا میں عظمت شہداء کانفرنس سے خطاب کرتے ہوئے کیا۔ انہوں نے کہا کہ عالمہ اور مبلغہ جو اسلامی جمہوریہ ایران سے صرف تبلیغ کے لئے پاکستان آئیں تھیں، انہیں ایئرپورٹ پر ایف آئی اے نے گرفتار کیا اور انسداد دہشت گردی کے ادارہ (سی ٹی ڈی) کے حوالہ کر دیا، جس کی پرزور مذمت کرتے ہیں، ہم اس بربریت پر خاموش نہیں رہیں گے، جلد احتجاجی لائحہ عمل کا اعلان کیا جائے گا، حکومت فی الفور طالبہ کو رہا کرے۔
علامہ احمد اقبال رضوی کا کہنا تھا کہ ذلت ہمارے مکتب سے کوسوں دور ہے۔ ہمارے آئمہ (ع) نے ہمیں عزت اور سربلندی کے ساتھ جینے کا طریقہ سکھایا۔ انہوں نے ہمیں سکھایا ہے کہ ہمیشہ ظالم کے مقابل سینہ تان کر ڈٹ جانا۔ مکتب تشیع نے ہمیشہ ظلم کا مقابلہ کیا، جس کی وجہ سے تشیع کو ہمیشہ تہ تیغ کیا جاتا رہا ہے۔ جب جب سلاطین نے رعایا پر ظلم کیا کوئی بولے نہ بولے حسین (ع) ابن علی کا عزادار ضرور بولا ہے۔ ہم نے قربانیاں دیں، کسی بھی قوم اور گروہ کو جتنا قتل کیا جاتا ہے، اس کی تعداد میں اتنا اضافہ ہوتا جاتا ہے۔ تلواروں سے بچے کھچے لوگوں کی نسلیں باقی رہتی ہیں۔ سادات کو طول تاریخ میں نسل کشی کا نشانہ بنایا گیا، شیعیان حیدر کرار کو دیواروں میں چنوایا گیا، لیکن ثابت قدم رہے۔
وحدت نیوز(مظفرآباد) مجلس وحدت مسلمین آزاد کشمیر انتخابی میدان میں ، امیدواران اسمبلی کی وحدت سیکرٹریٹ آمد ، مجلس وحدت مسلمین آزاد کشمیر کی قیادت سے ملاقاتیں ، آمدہ الیکشن اور موجودہ سیاسی صورتحال کے حوالے سے تبادلہ خیال ، تفصیلات کے مطابق مجلس وحدت مسلمین کے امیدواران کی جانب سے کاغذات نامزدگی جمع کرائے جانے کے کئی وفود نے مجلس وحدت مسلمین آزاد جموں و کشمیر کے ریاستی دفتر کا دورہ کیا ، جہاں انہوں نے ریاستی سیکرٹری جنرل مجلس وحدت مسلمین آزاد کشمیر علامہ سید تصور حسین نقوی الجوادی ، ڈپٹی سیکرٹری جنرل و امیدوار اسمبلی حلقہ ایک لچھراٹ مولانا سید طالب حسین ہمدانی ، سیکرٹری سیاسیات و امیدوار حلقہ دو لچھراٹ سید محسن رضا جعفری ایڈووکیٹ ، ریاستی رہنماء و امیدورا اسمبلی حلقہ چار کھاوڑہ خالد محمود عباسی ، امیدوار اسمبلی حلقہ تین سٹی سید ارسلان بخاری و دیگر رہنماؤں سے ملاقاتیں گی ، سنی اتحاد کونسل آزاد کشمیر کے اعلیٰ سطحی وفد نے ریاستی دفتر میں علامہ سید تصور حسین نقوی الجوادی سے ملاقات کی ، سنی اتحاد کونسل کے وفد نے علامہ عبدالخالق نقشبندی کی سربراہی میں ملاقات کی ، مسلم کانفرنس کے سینئر رہنما پیر سید غلام مرتضیٰ گیلانی نے وفد کے ہمراہ وحدت سیکرٹریٹ کا دورہ کیا ، جہاں انہوں نے ریاستی سیکرٹری جنرل علامہ تصور جوادی ، مولانا طالب ہمدانی ، سید محسن رضا سبزواری ایڈووکیٹ و دیگر رہنماؤں سے ملاقات کی ، مسلم کانفرنس کے امیدوار اسمبلی حلقہ کوٹلہ میر عتیق الرحمن کی قیادت میں وفد نے مجلس وحدت مسلمین آزاد کشمیر کے رہنماؤں سے ملاقات کی، مسلم لیگ ن آزاد کشمیر کے مرکزی رہنما و امیدوار اسمبلی حلقہ تین سٹی بیرسٹر سید افتخار گیلانی نے وحدت سیکرٹریٹ کا دورہ کیا جہاں انہوں نے ریاستی سیکرٹری سیاسیات سید محسن رضا جعفری ایڈووکیٹ سے ملاقات کی ۔ ترجمان مجلس وحدت مسلمین آزاد کشمیر نے جاری کردہ پریس ریلیز میں کہا کہ ان ملاقاتوں کے دوران موجودہ سیاسی صورتحال اور آمدہ الیکشن کے حوالے سے تبادلہ خیال ہوا، مجلس وحدت مسلمین مظلوم و محروم طبقات کی جماعت ہے انشاء اللہ مایوس نہیں کرے گی ، ہم عوام میں جائیں گے ، عوامی فیصلے لیڈروں کو سنائیں گے ، عوامی مسائل کا حل ہماری بنیادی ترجیح ہے ، محروم طبقات کے حقوق کی بازیابی کے لیے جدوجہد کر رہے ہیں ، اس جدوجہد میں عوام الناس ہمارا ساتھ دے ، عوام ہمارا ساتھ کرپشن کے خاتمے ، مہنگائی بے روزگاری کے خاتمے ، غریت کے حالت بدلنے ، مسئلہ کشمیر اجاگر کرنے ، سیاحت کے فروغ اور ان جیسے بیسیوں مسائل کے خاتمے بارے عملی اقدامات کے لیے مجلس وحدت مسلمین پر اعتماد کریں ، مجلس آپکے معیار پر پورا اترے گی۔
وحدت نیوز (مورو) مجلس وحدت مسلمین سندھ کے صوبائی سیکرٹری جنرل علامہ مقصود ڈومکی نے مورومیں منعقدہ صوبائی شوریٰ کے اجلاس سے خطاب کرتے ہوئے دو ٹوک انداز میں کہا ہے کہ ہم اپنے اصولی موقف سے ایک انچ بھی پیچھے نہیں ہٹیں گے اور نہ ہی مطالبات کی کسی شق سے دستبردار ہونا قابل قبول ہے۔ پارہ چنار میں پرامن احتجاج پر ایف سی کی طرف سے گولیاں چلانے والے واقعہ کی تحقیقات کے لیے کمیشن کے قیام سے لے کر ملک میں دہشت گرد وں کے خلاف بھرپور آپریشن اور نیشنل ایکشن پلان کی روح کی مطابق نفاذ تک ہمارا احتجاج ختم نہیں ہو گا۔ہماری جدوجہد پْر امن پاکستان کے لیے ہے جہاں ہر شخص کو آئین کے مطابق مذہبی آزادی اور بنیادی حقوق حاصل ہوں۔
انہوں نے کہا کہ نون لیگ کی حکومت نے ملت تشیع کے ساتھ ہمیشہ امتیازی سلوک روا رکھا۔پاکستان کے اہل تشیع نہ صرف دہشت گردی کا شکار ہیں بلکہ حکومتی مظالم نے بھی ان کے لیے زندگی اجیرن کر رکھی ہے۔شہریوں کے جان ومال کے تحفظ کو یقینی بنانا ریاست کی اولین ذمہ داری ہے۔ ملک بھر میں دندناتے ہوئے دہشت گرد امن و سکون کے قیام میں موجود ہ حکومت کی ناکامی کی بین دلیل ہے۔نیشنل ایکشن پلان کو دہشت گردی کے تدارک کی بجائے سیاسی انتقام کے لیے استعمال کیا جا رہا ہے۔دہشت گردوں یا ان کے سہولت کاروں کے ساتھ کسی بھی جگہ نرمی کا مظاہرہ کرنا پاکستان کے اسی ہزار شہدا کے خون سے غداری ہے۔انہوں نے کہا کہ لانگ مارچ کا اعلان حکومتی بے حسی کی وجہ سے کیا گیا ہے۔ حکمرانوں کے پاس تدبر، حکمت اور بصیرت جیسی کوئی شے سرے سے موجود نہیں۔سیاسی شعور کے فقدان اور عوامی مشکلات سے دانستہ بے خبری نے نون لیگ کو عوام سے دور کر دیا ہے۔اگلے الیکشن میں نہ صرف ملت تشیع نواز لیگ کابائیکاٹ کرے گی بلکہ اسے بہت سارے حلقوں میں ذلت آمیز شکست کا سامنا کرنا پڑے گا۔انہوں نے کہا کہ مجلس وحدت مسلمین کے سربراہ علامہ راجہ ناصر عباس جعفری سے اظہار یکجہتی کے لیے پوری دنیا میں علامتی بھوک ہڑتال اور احتجاجوں کا سلسلہ جاری ہے۔
وحدت نیوز(کراچی) مجلس وحدت مسلمین ضلع ملیر کی جانب سے ماہ مبارک رمضان کی مناسبت سے دوسری شب دعا اور مناجات کا انعقاد ۱۲ رمضان المبارک کو مسجد محمدی ڈیرہ میں کیا گیا، اس شب دعا و مناجات میں مولانا یاور عباس نقوی اور مولانا شیخ محمد علی فاضل نے خطاب کیا جبکہ قاری محمد حسین نے دعائے توسل کی تلاوت کی، اس موقع پر قائد وحدت علامہ راجہ ناصرعباس جعفری کی گذشتہ ایک ماہ سے جاری انصاف کے حصول کے لئے جاری بھوک ہڑتال کی حمایت اور ان کی صحت وسلامتی کے لئے خصوصی دعائیں بھی کی گئیں۔
