وحدت نیوز(ملتان)مجلس وحدت مسلمین جنوبی پنجاب کے صوبائی سیکرٹری عزاداری سیل صفدر حسین خان نے کہا ہے کہ جنوبی پنجاب کے مختلف اضلاع میں عزاداروں کے خلاف مقدمات کے اندراج کا سلسلہ جاری ہے جو آئین پاکستان کے کھلم کھلا خلاف ورزی ہے، مظفرگڑھ، وہاڑی، ملتان اور خانیوال میں امام بارگاہ کی چار دیواری میں منعقد ہونے والے مجالس پر بھی ایف آئی آرز درج کی گئی ہیں جن کی ہم شدید الفاظ میں مذمت کرتے ہیں۔ عزاداری امام حسین  ہماری شہ رگ حیات ہے اس پر کسی قسم کا سمجھوتہ ناقابل قبول ہے، کربلا حریت اور آزادی کی سب سے بڑی درس گاہ ہے ہم نے کربلا سے یہ سبق سیکھا ہے کہ حق کی خاطر جانوں کا نذرانہ بھی پیش کرنا پڑے تو اس کی بھی پرواہ نہیں کرنی۔

صفدر حسین خان نے مزید کہا کہ عزادار اپنی مجالس کو برپا کریں اور حکومت کے کسی بھی اوچھے ہتھکنڈے کو قبول نہ کریں، صدیوں سے عزاداری کے خلاف سازشیں کی جا رہی ہیں لیکن کل بھی اس عزاداری کو روکنے والے ناکام رہے اور آج بھی ناکام و نامراد ہوں گے۔ اُنہوں نے کہا کہ روز عاشور کے بعد جنوبی پنجاب بھر میں ہونے والی ایف آئی آرز کے خلاف ہائیکورٹ میں جائیں گے۔ ہم جنوبی پنجاب اور پنجاب حکومت کو متنبہ کرتے ہیں کہ عزاداروں کے خلاف اوچھے ہتھکنڈوں سے باز رہیں وگرنہ حالات کی ذمہ داری انتظامیہ پر عائد ہوگی۔