وحدت نیوز(ملتان) مجلس وحدت مسلمین ضلع ملتان میں یونٹ سازی کا عمل جاری ہے، اس حوالے سے گزشتہ روز جامعہ شہید مطہری میں چوک کمہاراں والا یونٹ کا اجلاس منعقد ہوا جس میں یونٹ اراکین کے علاوہ صوبائی رہنما علامہ قاضی نادر حسین علوی، سلیم عباس صدیقی، مہر سخاوت علی سیال، ضلعی آرگنائزر فخر نسیم صدیقی سمیت دیگر سینیئرز بھی موجود تھے۔

اجلاس میں اکثریت رائے سے حکیم شعیب کو سیکرٹری جنرل نامزد کیا گیا، اس موقع پر ان کی کابینہ کا اعلان بھی کیا گیا، نامزد سیکرٹری جنرل اور اُن کی کابینہ سے صوبائی ڈپٹی سیکرٹری جنرل جنوبی پنجاب سلیم عباس صدیقی نے حلف لیا، جبکہ علامہ قاضی نادر حسین علوی نے گفتگو کرتے ہوئے موجودہ دور میں تنظیمی افراد کی ذمہ داریوں کے حوالے سے آگاہ کیا۔

 اُنہوں نے کہا کہ تنظیمیں قرب خدا اور امام کا وسیلہ ہیں ہمیں اپنی کوششوں کے ذریعے سے معاشرے میں پیغام محمد وآل محمد کو عام کرنا ہے۔ نامزد سیکرٹری جنرل حکیم شعیب نے مجلس وحدت مسلمین کی حالیہ کارکردگی کو سراہتے ہوئے کہا کہ اس وقت ملت کو ایسے پلیٹ فارم کی ضرورت ہے جو مظلوموں کے لیے آواز بلند کرے، ایم ڈبلیو ایم نے ہر موقع پر مظلوموں کے حق میں آواز بلند کی ہے۔